“Why God Neva Do Notting?”

WEN DISASTAS HIT, YOU EVA TINK, “WEA GOD WUZ?” OR SOMETING REAL BAD WEN HAPPEN TO YOU AN MAKE YOU WONDA IF GOD KEA ABOUT YOU?

Maybe you feel like Sheila from da United States. Cuz she wen grow up in one family dat wuz real religious she tell, “From small kid time I wanted fo kno God cuz he wen make us. But I still neva feel close to him. I had believe he wuz watching me but ony from far away. I neva tink God hate me, but I neva feel like he kea fo me eidda. Sheila wen doubt dat God wen love her cuz she tell, “My family wen go tru hahd times one afta anodda an had look like God neva do notting fo help us.”

Maybe you stay shua dat God iz real too. But still yet you not shua he really kea about you. Job one good guy in da Bible who had plenny fait in God had same kine doubts. (Job 2:3; 9:4) Afta Job wen go tru hahd times one afta each odda, an neva look like wuz goin get betta, he wen ask God, “How come you hide yoa face? How come you ack jalike I agains you?”—Job 13:24.

Wat we learn from da Bible? God da one make bad tings happen? Get any proof dat show God kea about peopo an about ery one of us? Can each of us really kno if he see us, undastan us, feel fo us, or help us wit oua problems?

In da res of dis magazine, we goin learn how God kea about us wen we look at da tings he wen make. (Fo Da Rome Peopo 1:20) Den we goin look at wat da Bible tell. Da moa we get fo “kno God fo real kine” tru wat he wen make an da scripchas, da moa we goin kno fo shua dat he kea an “get one big heart fo you.”—1 From John 2:3; 1 From Peter 5:7.