You Tink God See You?

WAT GOD WEN MAKE TEACH US

Da firs hour afta one bebe iz born iz real importan cuz dass wen da maddah bond wit um. Dis close bond really help wit how da bebe grow up.a

Wat make one maddah like take kea her new bebe? In The Journal of Perinatal Education, Professor Jeannette Crenshaw tell, wen one maddah touch, look at, an feed her bebe, dat give her one higha level of one hormone called oxytocin. Wen one maddah do dese tings, anodda hormone come out dat help her feel close to her bebe an make her like take kea da bebe. How come dis iz importan?

Jehovah Godb wen make um so dat one maddah an one bebe feel close. King David wen tell dat God wuz da reason he wuz born an wen feel safe wit his maddah. He wen pray, “From da time I wen born, jalike you wen hanai me. From da time I come outa my muddah, you was da God dat take kea me.”—Songs Fo God 22:​9, 10.

TRY TINK: If God wen make all dis fo one maddah like take kea her bebe, den make sense dat God like take kea each one of us, “his kids.”​—Jesus Guys 17:29.

WAT DA BIBLE TEACH ABOUT HOW GOD KEA FO US

Jesus Christ who kno moa about God den anybody wen teach, “Dey sell two sparrow birds in da market fo one penny. But not even one sparrow bird goin fall down from da sky on top da groun if yoa Faddah no like. Yoa Faddah, he even know how much hairs you get on top yoa head! No sked! Cuz God know you guys worth mo den plenny sparrow birds.”​—Matthew 10:29-31.

Mos of us no bodda fo watch ery bird we see, o even kno wen one of dem fall to da groun. But oua Faddah in heaven, Jehovah, see ery one of dem! We wort moa plenny to Him den any numba of birds. So we learn dat God kea plenny fo you, an you no need worry if he see you o not!

Da Scripchas help us kno fo shua

• “Da One In Charge, he see eryting. He see wat da bad kine peopo do, an da good kine peopo do.”—SMART GUYS 15:3.

• “Da One In Charge, he keep track a da peopo dat erytime do wass right fo take kea dem. He lissen dem wen dey yell to him.”—SONGS FO GOD 34:15.

• “You stay tight wit me cuz I yoa guy, an dass how come I goin stay real good inside. Cuz you wen see how I stay all sore inside, an you know da hard times I get.”—SONGS FO GOD 31:7.

“I WEN FEEL LIKE JEHOVAH NEVA LOVE ME”

You tink tings would be diffren in oua life if we kno dat God loves us an keas about wat we do? Yeah could be diffren. Dis wat Hannah,c from England, tell:

“Ova an ova I wen feel like Jehovah neva love me an dat he neva ansa my prayas. I wen tink wuz cuz I neva have enuff fait in God. I wen feel like he wuz punishing me or he neva like lissen me cuz I no wuz importan to him. I wen feel like he neva kea.”

But now, Hannah kno fo shua dat Jehovah love an kea fo her. Wat wen help her fo change? “Wen change litto by litto,” she tell. “I rememba had one Bible talk long time ago about Jesus givin his life fo us an dat wen help me fo undastan Jehovah’s love. An wen Jehovah had ansa my prayas, I wen cry plenny cuz I had see dat he really love me. An by studying da Bible an goin to da Christian meetings, I wen learn moa about Jehovah, wat he stay like, an da way he feel about us. Now I kno fo shua dat Jehovah love an like help all us guys, an dat he like take kea ery one of us.”

Wat Hannah tell iz good fo hea. But how you can kno fo shua God undastan an rememba how you feel? Da nex paht of dis magazine goin ansa dis question.