Keep Walking On “Da Road Dat Stay Good An Spesho”

1-2. Wat importan choice da Jews inside Babylon had fo make? (Ezra 1:2-4)

DA KING wen tell dat da Jews who was forced fo stay in Babylon fo 70 years could go back to Israel wea dey came from. (Read um Ezra 1:2-4.) Ony Jehovah coulda make dat happen. How come we know dat? Cuz Babylon no was da kine dat let guys go afta dey capcha dem. (Isa 14:4, 17) But somebody wen go take ova Babylon, an dat new king wen tell da Jews dat dey could go back wea dey came from. Cuz a dat erybody, speshly da ones in charge of dea families, had fo choose if dey was goin leave Babylon, o stay. But no was easy fo choose wat fo do. How come?

² Plenny guys no could make da trip cuz dey was makule. Mos of da Jew guys dat time was born in Babylon, dat was da ony place dey wen live. To dem Israel was jus one place dea ancestas had live. Odda guys living in Babylon had nice house an business, so was goin be hard fo go live someplace dat dey neva know.

3. Wat kine blessings da Jews who wen go back Israel was going get?

³ To da guys who wen trus Jehovah, even if was hard was goin be worth it fo go back. But da mos importan reason was cuz of dea worship. Even tho had moa den 50 temples in Babylon, none of dem was fo Jehovah. Da Rules from Moses wen tell dat dey had fo make sacrifices but neva have one altar wea dey could do um. An da prieses no was set up fo make dose sacrifices. On top of dat, had moa peopo dat neva worship Jehovah den da guys who wen respeck Jehovah an wat He like. So da tousands of Jews who wen respeck Jehovah no could wait fo go back home wea dey could worship him da right way again.

4. Wat kine help Jehovah was goin give da Jews who was goin back to Israel?

⁴ Da trip from Babylon to Israel was goin be hard an was goin take about four months. Tings dat look like was goin give dem problems, Jehovah wen take um away. Isaiah wen tell, “Move eryting outa da way . . . strait thru da Arabah valley, make one big road fo oua God! . . . Wea da groun not level, make um smooth! Make all da rough places come flat!” (Isa 40:3, 4) Try picha dis, one big road thru da desert, one flat area between da mountains. Would be ony easy fo da guys walking on um. Dat would be moa simpo fo dem go on one strait big road den fo go up an down o around mountains, hills, o down into valleys. Would be fasta too.

5. Wat dey wen call da spesho road between Babylon an Israel?

⁵ Today wen get one big road, we call um by one name o one numba. Da spesho road Isaiah wen write about had one name too. Da Bible tell: “One build up road goin stay ova dea. Peopo goin call um “Da Road Dat Stay Good An Spesho.” Da peopo dat do bad kine stuff . . . no can go on dat road.” (Isa 35:8) Wat dis promise wen mean fo da Israel peopo befoa time? An wat mean fo us today?

“DA ROAD DAT STAY GOOD AN SPESHO”—BEFOA AN NOW

6. How come dey wen call da road good an spesho?

⁶ “Da Road Dat Stay Good An Spesho”—az one awesome name fo one road! How come dey wen call da road dat? Wen dey was goin go back, “da peopo dat do da bad kine stuff”—any Jew guy who neva like stop doing pilau kine sex, worship odda gods, o anyting Jehovah said was bad—no could go back Israel. Da Jew guys who was goin back was goin be spesho fo God. (Rules 7:6) But still yet, da guys who wen leave Babylon had fo make changes fo make Jehovah happy.

7. Wat some of da changes da Jew guys had fo make? Give one exampo.

⁷ Like wen tell befoa, mos of da Jews was born in Babylon. Cuz of dat, dey wen get used to some of da tinking an ways of doing stuff like da guys ova dea wen do. Sixty-nine years afta da Jew guys wen go back Israel, Ezra wen find out dat some of da Jew guys wen marry wahines dat neva worship Jehovah (Egypt 34:15, 16; Ezra 9:1, 2) An den, Govna Nehemiah was shock fo find out da kids dat was born in Israel neva even talk dea language. (Rules 6:6, 7; Neh 13:23, 24) How dose kids was goin even learn fo love an respeck Jehovah if dey no could even undastan Hebrew—da language da Bible was in. (Ezra 10:3, 44) So dose guys had fo make big changes. But was goin be way easier fo make um in Israel, wea da right way fo worship slowly was coming back.​—Neh 8:8, 9.

8. How come tings dat wen happen long time ago matta to us now? (Go look da picha on da cova.)

⁸ Some peopo might tink: “Dass good fo know but wat dat mean fo us now?” Az jus like we stay on “Da Road Dat Stay Good An Spesho.” All us gotta stay on dat road cuz goin help us keep worshiping Jehovah now an wen he make eryting come all good. No matta we get pick fo go heaven o if we one of da odda sheep.b (John 10:16) From 1919 C.E., uku pile a guys, wahines, an keikis wen bag from Babylon Da Great, all da fake religions in da world, an wen start fo walk on dat spesho road. You probably stay one of dem. Even if peopo wen start fo walk on da road about 100 years ago, oddas was making um ready long time befoa dat.

MAKING DA ROAD READY

9. How Isaiah 57:14 tell us “Da Road Dat Stay Good An Spesho” wen come ready?

⁹ Fo da Jew guys dat wen bag from Babylon, Jehovah wen make shua fo hemo anyting dat would jam dem up. (Read um Isaiah 57:14.) Wat about “Da Road Dat Stay Good An Spesho” today? Hundreds of years befoa 1919, Jehovah wen use guys dat wen respeck him fo help clea da way fo oddas bag from Babylon Da Great. (Go check Isaiah 40:3.) Dese guys wen help prep da spiritual road so layta, guys wit one good heart could bag from Babylon Da Great an go inside da spiritual paradise. Ova dea peopo was worshiping Jehovah da right way again. How dey wen make da road ready? We go check out some of da tings dey wen do.

10-11. How printing an translating wen help moa peopo fo know wat stay inside da Bible? (Go look da picha.)

¹⁰ Printing. Peopo wen make copies of da Bible by hand up till aroun da year 1450. Wen take long time fo do dat. Was hard fo find one copy of da Bible an if you did wen cos plenny money. But wen dey had use one printing machine fo copy da Bible was moa easy fo make plenny an give um to da peopo.

¹¹ Translating. Fo Hundreds of years could ony find da Bible in Latin, an ony peopo who wen go plenny school could undastan dat. Wen moa peopo had start fo print stuff, guys who wen respeck God plenny wen go fo broke an wen translate da Bible into languages dat erybody talk. Now da guys dat read da Bible could try see fo demself if wat da pries guys was teaching dem match up wit wat da Bible really tell.

12-13. Try give one exampo how da guys who wen really like learn da Bible aroun 1835 wen start fo show da bad kine stuff bulai religions was teaching.

¹² Tings dat help peopo undastan da Bible. Da guys who wen study da Bible real good had learn plenny from wat dey wen read in dea. Da pries guys wen come all huhu cuz da guys dat wen study da Bible had share wat dey wen learn. Aroun 1835 one group of guys dat kea plenny about God wen start fo make tracts dat wen show da bulai kine tings da churches was teaching.

¹³ Aroun da same time had one guy, Henry Grew, he had plenny respeck fo God. He wen print one tract dat talk about wat happen wen you mahke. He wen prove from da Bible dat being immortal is one gif from God, not someting we born wit like da church wen teach. In 1837 one minister George Storrs wen find one of dose tracts wen he wuz riding on one train. Afta he had read um he wen know fo shua dat he wen learn one importan trut. He wanted fo tell odda peopo wat he wen learn. In 1842 he wen give one bunch of talks dat was about “An Inquiry—Are the Wicked Immortal?” One young guy name Charles Taze Russell wen learn plenny from da tings George Storrs wen write.

14. How da work on da spritiual road dat wen happen befoa time wen help Braddah Russell an da guys he was wit? (Go look da picha.)

¹⁴ How da work oddas wen put in fo make ready da spiritual road had help Braddah Russell an da guys he was wit? Awready had Bible lexicons, concordances, an odda translations of da Bible dey could use dat wen help dem start dea work. Dey even wen get help from da hard work dat guys like Henry Grew, George Storrs, an oddas wen put in wen dey had study da Bible. Braddah Russell an da guys he was wit wen work on da spiritual road cuz dey had make plenny books an tracts dat talk about wat da Bible teach.

15. Wat importan tings wen happen in 1919?

¹⁵ In 1919, Babylon Da Great neva have control ova God’s peopo anymoa. Dat year, jus in time fo help da guys wit one good heart get on “Da Road Dat Stay Good An Spesho,” one “akamai worka guy dat da boss trus” wen show up. (Mat 24:45-47, NWT) Da work some guys wen do befoa time fo make da road ready, wen help oddas start fo walk on da road fo learn moa about Jehovah an wat he like do. (Smart Guys 4:18) Dey was able fo live da way Jehovah wen like. Jehovah neva expeck his peopo fo make da changes dey gotta all one time. But he wen help dem make changes ova time. (Go look da box “Jehovah Help His Peopo Makes Changes Ova Time.”) We goin be so happy wen we can make Jehovah feel good inside wit eryting we do.​—Col 1:10.

“DA ROAD DAT STAY GOOD AN SPESHO” STILL STAY OPEN

16. Eva since 1919, wat kine work wen get done on “Da Road Dat Stay Good An Spesho”? (Isaiah 48:17; 60:17)

¹⁶ Fo ery road stay in good shape gotta work on um. “Da Road Dat Stay Good An Spesho” stay bein worked on eva since 1919, so dat moa an moa peopo can get help fo get outa Babylon Da Great. Da akamai worka guy dat da boss trus wen get to work an den in 1921 dey wen make one tool fo help new guys learn Bible truts. Had almos six million copies of dat tool, The Harp of God, in 36 languages, an plenny guys wen learn da trut from um. Now, we get one real good tool fo help guys learn da Bible, You Can Live Good Foeva! In dis time befoa da world goin come pau, Jehovah stay use his hui fo keep giving us spiritual kine food dat can help us stay on “Da Road Dat Stay Good An Spesho.”—Read um Isaiah 48:17; 60:17.

17-18. Wea “Da Road Dat Stay Good An Spesho” go to?

¹⁷ Wen peopo tell dey like study da Bible, dass wen dey start fo walk on “Da Road Dat Stay Good An Spesho”. Some ony travel litto bit an den dey get off da road. Odda guys do eryting dey can fo stay on da road till dey reach da end of da road. Wat dey goin find dea?

¹⁸ Fo da guys dat goin heaven, “Da Road Dat Stay Good An Spesho” goin take dem to “God Beautiful Place” in heaven. (Jesus Show 2:7) Fo guys dat goin live on da earth, dat road goin take dem to one perfeck life at da end of da 1,000 years. If you stay on da road right now, no look back an no get off um till you reach da end in da new world. Have one safe trip!