Stay Ready Fo Jehovah’s Day

1. Wat we gotta do fo make um thru Jehovah’s day?

WEN da Bible talk about “Jehovah’s day,” dass wen Jehovah goin wipe out all da guys dat go agains him an save his peopo. Befo time, Jehovah wen go wipe out da guys who wen go agains him. (Isa 13:1, 6; Eze 13:5; Zef 1:8) Oua time, “Jehovah’s day” goin start wit da attack on Babylon da Great an goin max out at Armageddon. Fo make um thru dat “day,” we gotta get ready now. Jesus wen teach fo no ony get ready fo da big trouble but gotta stay ready fo um.—Mat 24:21; Luk 12:40.

2. How 1 Fo Da Tessalonika Peopo can help us?

² In his firs letta dat Jehovah wen tell him write to da Tessalonika Peopo, da aposal Paul wen use word pichas fo help Christians stay ready fo Jehovah’s day. Paul wen know dat Jehovah’s day no wuz goin come right den. (2 Tess 2:1-3) Still yet he wen tell his braddas fo no wait an make ready like his day wuz goin come tomorrow. Us guys can do da same ting. Us go look wat Paul wen tell about: (1) how Jehovah’s day goin come, (2) who not goin make um thru dat day, an (3) how we can get ready so dat we can make um.

HOW JEHOVAH’S DAY GOIN COME?

3. How Jehovah’s day goin come jalike one guy who come nite time fo rip peopo off? (Go look da picha.)

³ “Jalike one guy who come nite time fo rip peopo off.” (1 Tess 5:2, NWT) Get three word pichas dat tell how Jehovah’s day goin come. Dis da firs one. Guys dat rip peopo off do um fas, an dey come nite time wen peopo no stay ready. Jehovah’s day goin come fas too, an mos peopo no goin be ready. Tings goin happen so fas, even fo real kine Christians might be shock. But we no goin get wipe out like da guys dat go agains God.

4. How Jehovah’s day jalike da pain dat hit one hapai wahine?

⁴ “Jalike wen da pain hit da hapai wahine.” (1 Tess 5:3, NWT) One madda who stay hapai donno da exack time she goin start fo have da bebe. But she know fo shua dat da time goin come. Wen dat time come, da pain goin hit fas an no can stop um. Same ting, we donno wen Jehovah’s day goin start. We know fo shua goin be fas wen Jehovah smash da guys dat go agains him an dey no can run away from um.

5. How da big trouble jalike wen da daytime come?

⁵ Jalike wen daytime come. Paul’s numba three word picha talk about guys who rip peopo off nite time. But now Paul talk about Jehovah’s day jalike wen da daytime come. (1 Tess 5:4, NWT) Wen guys stay stealin stuff nite time dey can get so caught up wit wat dey doin dey can lose track of da time. Wen da sun come up, can catch um off guard an dey no can hide. Same like dem, da guys who keep doin da stuff dat God hate, durin da big trouble dey no can hide. But us guys can get ready by doin da “good kine stuff, da right kine stuff, an . . . stick wit da trut,” an no do da stuff Jehovah hate. (Efe 5:8-12) Da nex two word pichas Paul use talk about da guys who no goin make um.

WHO NOT GOIN MAKE UM THRU JEHOVAH’S DAY?

6. Wat kine way mos peopo stay sleepin? (1 Fo Da Tessalonika Peopo 5:6, 7)

⁶ “Peopo dat stay sleeping.” (Read um 1 Fo Da Tessalonika Peopo 5:6, 7.) Paul wen say dat da guys who not goin make um thru Jehovah’s day iz like guys who stay sleepin. Dey donno wat stay goin on aroun dem an donno wat time stay. Az why dey no can tell wen importan stuffs stay happenin aroun dem an dey no can do nottin about um. Mos peopo today stay sleep spiritual kine. (Rome 11:8) Even tho get proof dat we stay livin “befo da world pau” an da big trouble comin pretty soon, dey no kea. Wen mayjah kine stuff start happenin in da world some guys start fo show small kine intrest in wat we stay preachin. But plenny of dem no stay awake, dey go back sleep. Even get some guys who believe dat da bad peopo goin get wipe out, but dey tink dat goin be long time from now. (2 Pet 3:3, 4) But az da day come moa close, we know from da Bible az moa an moa importan fo stay awake.

7. How da guys who goin get wipe out from God jalike da peopo dat drink plenny?

⁷ “Da peopo dat drink plenny.” Paul sed da guys who goin get wipe out from God jalike guys who drink plenny. Peopo who suck um up too much, dey no tink o reack fas to da tings goin on aroun dem, an dey do stupid stuff. Same ting wit da guys who go agains God, dey no lissen wen he warn dem. Dey live dea life in one way wea in da end dey goin mahke. But Christians gotta tink clea like dey sober. (1 Tess 5:6) One guy who went school fo study da Bible sed fo be sober mean dat you calm, you no panic, an you tink clea so you can choose fo do good kine stuff. How come we gotta stay calm an no panic? So dat we no get caught up in political kine stuff o anytin else dat peopo get beef wit. Da closa Jehovah’s day come, da moa hard goin be fo no take sides. But we no gotta worry about how we goin hando. God’s spesho spirit can help us fo stay calm an tink clea an fo make good choices.—Luk 12:11, 12.

WAT WE CAN DO FO MAKE READY FO JEHOVAH’S DAY?

8. Wat word pichas get in 1 Fo Da Tessalonika Peopo 5:8 dat show us wat we need fo be ready? (Go look da picha.)

⁸ Put on “body armor . . . an . . . one helmet.” Paul sed we jalike army guys dat stay ready fo war. (Read um 1 Fo Da Tessalonika Peopo 5:8.) Wen get war peopo expeck one army guy fo be ready fo fight anytime. Same ting wit us, trus an love an aloha iz jalike body armor, an oua hope iz jalike one helmet. If we put on dose tings, dat goin help us stay ready fo Jehovah’s day.

9. How oua trus goin proteck us?

⁹ Body armor proteck one army guys heart. Trus an love proteck oua heart, who we stay on da inside. Dat goin help us fo keep servin Jehovah an followin Jesus. We trus dat if we go all out wit oua heart an work hard fo Jehovah, he not goin foget fo do good kine tings fo us. (Heb 11:6) We goin like stick tight to oua leada, Jesus, even if goin be hard. Oua trus can come moa strong if we learn from odda guys oua time who had all kine pilikia an problems but still wen stick tight to Jehovah. An we can stay away from da trap of lovin money too much if we copy da guys who wen live dea life simpo an make Jehovah ichiban.b

10. How love an aloha fo God an fo peopo help us keep goin?

¹⁰ Love an aloha iz importan fo us tink clea an stay ready. (Mat 22:37-39) Love fo God help us keep preachin, even if dat can cause us problems. (2 Tim 1:7, 8) Cuz we love da guys dat no love Jehovah, we keep on preachin in oua area, even callin dem on da phone o writin dem one letta. We no stop tinkin dat maybe one day peopo goin change an start fo do wass right.—Eze 18:27, 28.

11. If we get love an aloha fo oua braddas an sistas, how dat goin help us? (1 Fo Da Tessalonika Peopo 5:11)

¹¹ We get love an aloha fo oua braddas an sistas too. We show dat love an aloha wen we “give each odda good kine words, an help each odda come mo solid inside.” (Read um 1 Fo Da Tessalonika Peopo 5:11.) Jalike two army guys fightin nex to each odda, we gotta help each odda fo keep chargin. Wen da war stay ragin, one army guy might hurt da guy nex to him accident kine, but no ways he would do um on purpose. So same ting wit us, we would neva hurt oua braddas an sistas on purpose o try pay um back if dey hurt us. (1 Tess 5:13, 15) Anodda way we show oua love an aloha iz wen we respeck da guys takin kea da local hui. (1 Tess 5:12) Wen Paul wen write dis letta da local hui in Tessalonika jus wen start. Dey probly no wuz eldas long time an maybe dey wen make mistakes. Still yet, had to respeck dem. We goin need oua local eldas fo show us wat fo do moa an moa az da big trouble come moa close. Maybe us goin get cut off from world headqwatahz an da branch, dass why iz importan fo love an respeck oua eldas now. So neva mind if da eldas make mistakes, we gotta tink clea fo see dat Jehovah usin Jesus fo show da eldas wat fo do.

12. How oua hope proteck oua mind?

¹² Jalike on helmet proteck one army guys head, oua hope fo da future proteck oua mind an help us fo tink right. (Php 3:8, NWT) If oua hope stay strong, we goin see dat wat dis world can give us iz ony rubbish. Oua hope goin help us fo stay balanced an no panic. Dis wen happen to Wallace an Laurinda, who stay servin in Africa. In less den three weeks, one wen lose dea madda an one wen lose dea fadda. Cuz of da COVID-19 pandemic, dey no could go home fo be wit dea ohana. Wallace wen write: “Knowin dey goin come back alive help me fo tink how dey goin be in da new world, not how dey wuz befo dey wen mahke. Wen I gettin hard time cuz I stay sad cuz I miss dem, dis hope help my mind an heart stay calm.

13. Wat us can do fo get da good an spesho spirit?

¹³ “No jam up wat da good an spesho spirit like do.” (1 Tess 5:19) Paul tell us not fo jam up da good an spesho spirit. Wen we get God’s spirit, dat help us fo do wass right an go all out fo work fo him. (Rome 12:11) Wat us can do fo get da good an spesho spirit? We gotta pray to God an aks fo um, study da Bible, an be part of his hui dat get his spirit. Doin dat goin help us get “da fruit [of] God’s spesho spirit.”—Gal 5:22, 23 NWT.

14. Wat we gotta do fo keep gettin God’s spirit? (Go look da picha.)

¹⁴ Afta God give us his spesho spirit we gotta make shua we no do nottin fo jam um up. God ony goin give his spirit to da guys who keep tinkin an ackin in one clean way. He not goin give um to da guys who keep tinkin an ackin pilau. (1 Tess 4:7, 8) Fo keep gettin spesho spirit we no can tink dat prophecies iz ony junk, not wort nottin. (1 Tess 5:20) Prophecies, dass da messages from God’s spirit, like da ones dat talk about Jehovah’s day an how we gotta stay ready. We no goin tink Jehovah’s day not goin happen in oua lifetime. We gotta show dat we tink goin come real soon by goin all out in da way God like us fo live.—2 Pet 3:11, 12.

“GO CHECK OUT ERYTING”

15. Wat can help us no fall fo da bulai kine tinkin of da demons? (1 Fo Da Tessalonika Peopo 5:21)

¹⁵ Pretty soon da guys dat go agains God goin tell erybody “We get peace an erytin stay safe!” (1 Tess 5:3, NWT) Da bulai kine tinkin dat come from da demons goin be erywea an mos peopo goin believe um. (Jesus Show 16:13, 14) But wat about us? We not goin believe um if we “go check out eryting.” (Read um 1 Fo Da Tessalonika Peopo 5:21) Da Greek word fo “check out” means fo tes sometin jalike peopo would tes gold an silva fo make shua wuz fo real. So da stuff we read an hea, we gotta tes um out fo make shua iz fo real. Dat wuz importan fo da Tessalonika peopo an az moa importan fo us az da big trouble come moa close. We no goin jus believe wat odda peopo say. We goin tink good fo make shua wat we read o hea match up wit wat da Bible an Jehovah’s hui tell. If we do dat, we not goin fall fo wen da demons try trick us wit dea bulai kine tinkin.—Smart Guys 14:15; 1 Tim 4:1.

16. Wat hope we get, an wat we gotta do?

¹⁶ Az one hui, God’s peopo goin live thru da big trouble. But fo each of us we donno wat goin happen tomorrow. (Jam 4:14) Still yet if we live thru da big trouble o if we mahke befo dat, if we stick close to Jehovah he goin let us live foeva. Da guys who goin go heaven goin be wit Christ. Da odda sheeps goin live on top one paradise eart. All us gotta tink hard about oua hope fo da future an stay ready fo Jehovah’s day!