Plenny Respeck Fo God Goin Help You

1-2. Jalike Lot, how can be hard fo us today?

DA WAY da world tell peopo fo live, we feel jalike Lot. “Wen bodda him plenny how da odda guys wen go buckaloose da way dey neva lissen da Rules From God.” (2 Pet 2:7, 8) Love an plenny respeck fo God wen cause Lot fo no live da way da peopo aroun him wen live. Us too live in one time wea peopo no respeck God an jus live da way dey like. If we copy Lot we can do da same ting an live good an no follow da world.—Smart Guys 14:2.

² Jehovah love us so much he gave us help inside da book of Smart Guys. An dass good fo all us no matta how ol we stay if we go look wat stay inside dea.

RESPECK FO GOD PROTECK US

3. From wat Smart Guys 17:3 tell, why we gotta proteck oua heart? (Go look da picha.)

³ One reason we like proteck oua heart, da one dat rep who we stay on da inside, iz cuz Jehovah look real good at oua heart. He can see wat nobody else can see, da way we really tink an da way we really feel about stuff. (Read um Smart Guys 17:3.) If we fill up oua mind wit da stuff Jehovah like an we do um, Jehovah goin love us an give us life, an we not goin have room fo da rubbish kine tinkin of Satan an da peopo dat stay inside dis world. (John 4:14; 1 John 5:18, 19) Oua love an respeck fo Jehovah goin grow an we goin hate fo hurt Jehovah. Wen we get presha fo do bad kine stuff we goin tink, no ways I goin hurt Jehovah, he wen do so much fo take kea me!—1 John 4:9, 10.

4. How plenny respeck fo Jehovah wen proteck one sista from doin sometin pilau?

⁴ Marta, one sista from Croatia, had presha fo do sometin pilau. She wen say dat she had hard time fo tink clea an fo stop herself from doin um. But havin plenny respeck fo Jehovah wen proteck her.b How dat wen happen? Marta wen tink real hard about wat would happen if she wen go thru wit wat she wanted fo do. We can do da same ting. Da worses ting we could eva do iz make Jehovah sad an miss out on worshippin him foeva.—Start 6:5, 6.

5. Wat you learn from wat wen happen to Leo?

⁵ Plenny respeck fo Jehovah goin help us fo no be frens wit da guys who do bad kine stuff. One bradda in Congo named Leo wen find dat out. Four yeas afta he wen get baptize, he started fo hang aroun da guys dat do bad stuff, but he wen tink nottin wuz wrong wit dat an no wuz goin affeck him. But he wuz wrong cuz he started fo suck um up plenny an do anykine pilau sex. But den he wen tink about wat his parents wen teach him an how he wuz happy befo. Dat wen wake him up. Wit kokua from da eldas, he wen make um right wit Jehovah. Now he stay happy an he one elda an one spesho pionea preacha.

6. Wat two wahines we goin talk about?

⁶ We go check out Smart Guys chapta 9, wea it talk about one akamai wahine an one stupid wahine an wat we can learn from dem. (Compare Rome 5:14; Gal 4:24.) Satan’s world no can get enuff of porn an pilau kine sex. (Efe 4:19) Dass why iz importan fo make shua oua respeck fo God grow so we no do wass bad. (Smart Guys 16:6) All us, no matta we one guy o one wahine, iz good fo us check out Smart Guys chapta 9. Ova dea both wahines invite da guys “dat get hard time fo tink strait,” fo come ova an go eat. (Smart Guys 9:1, 5, 6, 13, 16, 17) But get one big diffrence how tings turn out fo da guys dat go to dose places.

NO FOLLOW DA STUPID WAHINE

7. Wat happens to da guys who follow da stupid wahine in Smart Guys 9:13-18? (Go look da picha.)

⁷ We go check out wat da stupid wahine, da one dey call “da wahine dat . . . no get it” tell. (Read um Smart Guys 9:13-18, NWT.) She tell da guys dat no can tink strait fo come ova. Wat happen to dem? Da guys dat go ova dea no can do nottin cuz dey mahke. Earlia in Smart Guys chapta 2 wen talk about one wahine dass not yoa wife an “her house go fall down into death.” (Smart Guys 2:11-19, NWT) Smart Guys 5:3-10 warn about one odda wahine dass not yoa wife. She “goin drag you down to da place wea you goin mahke.”

8. Wat kine choice we gotta make?

⁸ Da guys who lissen da stupid wahine gotta make one choice, dey goin go, o dey not. Maybe all us gotta make dat kine choice too. Somebody might presha us fo fool aroun o we come across porn on da intanet o someplace else, wat we goin do?

9-10. How come we should stay away from pilau kine sex?

⁹ Get plenny reasons why we like stay away from pilau kine sex. Da stupid wahine in Smart Guys tell “da watta dat you cockaroach from somebody, taste mo ono.” (Smart Guys 5:15-18) But wat iz dat watta? Inside da Bible it talk about sex between husband an wife like watta dass ono. So da sex between husband an wife who stay in one legit marriage, dey can enjoy um wit each odda. Da cockaroach watta on da odda hand iz sex dass kapu to Jehovah. Dey do um in secret jalike wen somebody come cockaroach yoa stuff. An dey tink iz moa ono cuz dey tink dey can get away wit um. But no, Jehovah see erytin! No moa nottin ono about hurtin Jehovah. (1 Cor 6:9, 10) But get some moa.

¹⁰ Pilau kine sex can cause peopo fo feel shame, like dey rubbish, nottin. It even cause peopo fo come hapai wen dey neva like, an even buss up da ohana. So make sense aah dat we no go eat da stupid wahine’s house? If not bein frens wit Jehovah no wuz bad enuff, on top of all dat, pilau kine sex can give us diseases dat can make us mahke. (Smart Guys 7:23, 26) Inside Smart Guys 9:18, NWT it tell, da guys dat ova dea goin stay “down inside da Mahke Peopo Place.” If we know wat goin happen, how come plenny peopo still follow an go even tho dey know how goin end?—Smart Guys 9:13-18, NWT.

11. How come watchin porn iz abunai?

¹¹ One ting dat jam up plenny guys dat we gotta watch out fo iz porn. Plenny peopo tink iz minaz but actually da ting iz abunai. How come? Cuz can cause you fo no respeck yoaself o respeck odda peopo. An once you start watchin um iz hard fo stop, an da tings you wen see az hard fo hemo from yoa mind. An instead of stoppin da wrong kine tinkin, goin make you like do um even moa. (Col 3:5; Jam 1:14, 15) Dass how come plenny peopo who watch porn end up ackin on um an doin pilau kine sex.

12. How we proteck ouaself from pichas dat make us have wrong kine tinkin?

¹² Wat goin happen if porn pop up on oua electronics? We like shut um down fas. Wat goin help us fo do dat? We gotta rememba dat oua frenship wit Jehovah iz da mos importan ting to us. But wat if iz not porn? Da pichas can still make us have da wrong kine tinkin. An we no like even take bebe steps fo do um inside oua heart. (Mat 5:28, 29) Wat one elda in Thailand named David do, wen pichas dass not porn pop up? He go aks himself, “Jehovah like me look at dat o wat?” Dass wat wen help him fo shut um down right away.

13. Wat goin help us fo be akamai?

¹³ Havin plenny respeck fo Jehovah goin cause us fo be akamai an dat goin make us no like do anytin fo hurt him. Plenny respeck fo Jehovah, dass da “start fo undastan stuff.” (Smart Guys 9:10) Inside Smart Guys chapta 9 da firs part, we go talk about one odda wahine dat “know wat fo do erytime.”

ACCEPT DA INVITE FROM DA AKAMAI WAHINE

14. Wat Smart Guys 9:1-6 invite us fo do?

¹⁴ Read um Smart Guys 9:1-6. Wen da akamai wahine dat know wat fo do erytime aks peopo fo come ova, dass really from Jehovah. He da Creator, he wen make erytin an he know erytin. (Smart Guys 2:6; Rome 16:27) Inside da word picha it talk about one big house wit seven big poses. Dat jus show dat Jehovah like plenny peopo come ova an be akamai an know wat fo do erytime.

15. Wat God like us do?

¹⁵ Jehovah give plenny an he like erybody fo come smart. We see dat in da exampo of da wahine dat know wat fo do erytime in Smart Guys chapta 9. She go cook meat, make ready da wine, an put food on da table. (Smart Guys 9:2) An she tell da guys dat no can tink strait fo “Come hea! Go eat my food!” How come all us should go ova dea? Jehovah like us be smart an he no like us learn da hard way. He like us figga out how fo stay away from trouble so we no get hurt an we not goin have any regrets. (Smart Guys 2:7) If we get plenny respeck fo Jehovah we goin like make him happy, an we goin be happy fo lissen an do da tings he tell us.—Jam 1:25.

16. How respeck fo God wen help Alain do da right ting, an wat wen happen?

¹⁶ We go try look wat Alain, one elda an school teacha, wen do. He had plenny respeck fo God an dat wen help him fo make one good choice. Da guys he wen work wit wen look at porn az one way fo learn about sex. But Alain neva fall fo dat. He wen say, “No ways I wuz goin watch dat! I wen tell dem az cuz I love God an get plenny respeck fo him.” Alain wen know wat fo do cuz he wen follow da akamai wahine. (Smart Guys 9:6) Cuz he wen do dat, his workmates wen tink dat wuz unreal, an some of dem started fo learn da Bible an go to da meetins.

17-18. Wat good stuff happen to da guys dat accept da invite from da akamai wahine now, an wat dey no can wait fo? (Go look da picha.)

¹⁷ Jehovah show us how fo have one happy future an he use da exampo of da two wahines. Da guys dat take da invite from da stupid wahine ony focus on wat goin make dem feel good now. Dey tink dey gettin away wit wat dey doin, an no tink about wat goin happen in da future. Dey no realize dat wat dey doin goin affeck dem layta on, cuz dey goin end up “inside da Mahke Peopo Place.”—Smart Guys 9:13, 17, 18, NWT.

¹⁸ Goin be diffrent fo da guys who take up da invite from da akamai wahine who “know wat fo do erytime.” Da guys dat go her house goin get plenny spiritual kaukau dat dey need fo stay close to Jehovah. (Isa 65:13) Jehovah wen use Isaiah fo say, “Lissen me! Eat good kine stuff. Den you goin stay real good inside cuz you stay eat all da good kine food.” (Isa 55:1, 2) We goin learn fo love wat Jehovah love, an hate wat he hate. (Songs 97:10) An we goin be happy fo help odda peopo learn too. We goin be like da guys on da high places inside da town dat tell da odda peopo, “Anybody dat donno know wat stay happen, all dey gotta do is come ova hea.” Da good stuff dat stay happen not ony good fo us now. Wat we learn goin help us “stick wit da way dat goin help you undastan stuff” an goin help us live foeva.—Smart Guys 9:3, 4, 6.

19. From wat Da Teacha 12:13, 14 say, wat we gotta do? (Go look da box “Respeck Fo God Iz Good Fo Us.”)

¹⁹ Read um Da Teacha 12:13, 14. Havin plenny respeck fo Jehovah goin proteck our heart, help us fo live clean, an stay close to him durin dis time befo da world pau. Cuz we love an respeck Jehovah, we goin like invite az much peopo az can fo learn wat fo do erytime an be happy.