Questions Readas Get

Afta Jesus wuz born, how come Joseph an Mary wen stay in Betlehem an neva go back home Nazaret town?

Da Bible no really tell. But it give us odda info dat maybe tell us why dey neva go back Nazaret.

One angel wen tell Mary she wuz goin come hapai an born one boy. Wen da angel wen tell her dat, Mary an Joseph wuz livin Nazaret town Galilee side, wea Joseph wen grow up. (Luk 1:26-31; 2:4) Afta dey wen come back from Egypt, dey wen go back Nazaret, an dass wea Jesus wen grow up. (Mat 2:19-23) So dass how come we tink about Nazaret wen we talk about Jesus, Joseph, an Mary.

Mary wuz related to Elizabet, who wen live in Judah. Elizabet wuz married to Zekariah, an John da Baptiza wuz her boy. (Luk 1:5, 9, 13, 36) Mary wen go stay wit Elizabet in Judah fo three monts. Den she we go back Nazaret. (Luk 1:39, 40, 56) Dass how come Mary wen know her way aroun Judah good.

Joseph wen lissen to da rule fo “go back da town dea ohana come from fo sign up.” So Joseph wen leave Nazaret an go Betlehem, “King David town,” da place dey wen tell befo time da Messiah wuz goin be born. (Luk 2:3, 4; 1 Sam 17:15; 20:6; Mic 5:2) Afta Jesus wuz born, Joseph neva make Mary go all da way back Nazaret wit one new bebe. So dey wen stay Betlehem, 6 miles away from Jerusalem. Dat would make um easy fo bring dea bebe wit dem wen dey make animal sacrifice at da tempo.—Pries 12:2, 6-8; Luk 2:22-24.

Earlia, God’s angel wen tell Mary dat her boy would come “one king jalike King David.” Maybe Joseph an Mary wen tink wuz importan dat Jesus wuz born in King David town. (Luk 1:32, 33; 2:11, 17) O maybe dey thought wuz one good idea fo stay ova dea an wait fo see wat Jehovah wanted dem fo do nex.

We donno how long dey wuz in Betlehem wen da astrologers wen show up. But dey wuz livin in one house, an Jesus wuz one boy, not one bebe. (Mat 2:11) Seem like dey neva go back Nazaret right away, an dey wen stay in Betlehem fo litto bit.

Herod wen tell fo “kill all da small boys” in Betlehem . . . two yea ol an younga. (Mat 2:16) One angel wen warn Joseph about dat. So him, Mary, an Jesus wen dig out to Egypt an stay ova dea til Herod wen mahke. Afta dat, Joseph wen take his ohana to Nazaret town. How come dey neva go back Betlehem? Cuz dey wuz tryin fo dodge Arkelaus, Herod’s boy, who wuz one pilau rula in Judea. Ova dea in Nazaret, wuz moa safe fo raise Jesus fo worship Jehovah.—Mat 2:19-22; 13:55; Luk 2:39, 52.

Seem like Joseph wen mahke befo Jesus wen open da way fo go heaven. So Joseph goin come back alive on top da eart. Dat time plenny peopo goin be able fo get da full scoops on how come him an Mary wen stay Betlehem afta Jesus wuz born.