Hulda Wen Reach Her Goal

IN INDONESIA, on da small island of Sangir Besar, get three of oua sistahs. Some years ago dey was working on da beach togedda. Erybody on da island know dem fo dea preaching an fo helping peopo undastan da Bible. But dis time, dey was doing someting way diffren.

Da firs ting dey wen do was go into da ocean an pull out heavy rocks back on to da beach. Some of da rocks was az big az soccer balls. Nex ting da sistahs wen do was sit on small wood stools an use hammahs fo smash da rocks into pieces smalla den one chicken egg. Afta dat, dey wen put da small rocks into plastic buckets an carry um up da stairs to wea dey wen live. Den, dey wen put da rocks into big bags an load um on to da trucks so da rocks could be used fo build roads.

One of dese sistahs was Hulda. Da way her life was, she was able fo do dis work moa den da oddas. Mos times she wen use all da money she wen make fo pay fo wat her family wen need. But dis time she wanted fo save some of da money fo someting else. She wanted one tablet so she could go online an use da JW Library^® app. Hulda wen know da videos an da odda stuff in da app was going make her preaching moa betta an help her undastan da Bible.

Hulda wen work two hours ery morning fo a month an a half, smashing nuff rocks fo fill up one small pickup. Afta all dat, she wen get nuff money fo buy one tablet.

“Even tho I was supa tired an my body was all soa from smashing rocks,” Hulda tell, “ony fas I wen forget how soa I was wen I got fo use da new tablet fo help me study fo da meetings an be one betta preacha.” She wen say dat da tablet wen help her during da pandemic cuz all da local hui stuffs was happening online. We stay stoked wit Hulda dat she wen reach her goal.