Tink Like God Wen Come To Alcohol

FO SHUA, you love da plenny gifs Jehovah wen give you an you tankful dat he let you choose wat you like do wit um. Da Bible tell, wine is one gif from God. It even tell, “Peopo cook food fo dem laugh, an wine make peopo stay good inside, da way dey live.” (Teacha 10:19; Songs 104:15) But mos likely, you wen see dat some peopo get problems wit alcohol. Not ony dat, peopo all ova da world tink diffren about drinking alcohol. So den, wat can help Christians fo be akamai fo tink befoa dey drink?

No matta wea we live o wat culture we grew up in, wen we tink like God wen choosing wat fo do, an not wat odda peopo tink, we going be happy an live good.

You probly wen see choke peopo in da world drink all da time, an drink plenny. Some peopo drink alcohol cuz make dem relax. Odda peopo drink fo try deal wit dea pilikia. An in some places, peopo tink dat somebody who drink plenny alcohol stay all dat, o one hammah.

But fo Christians, God give dem good kine words fo dem follow. He wen tell us about da sad tings dat can happen wen you drink too much. Maybe we wen read at Smart Guys 23:29-35 about da jam up stuffs dat somebody who stay piloot go thru, an da pilikia dey get afta.a Daniel, one elda in Europe, rememba wat his life was like befoa he wen come one Christian. He wen say, “Befoa time I used to drink too much alcohol, an dat wen make me do stupid kine stuffs. Cuz of dat, I wen go thru some pretty ruff times, an I still stay all jam up wen I tink about um.”

How we can be akamai wen come to alcohol an stay away from da pilikia dat come from drinking too much? Da main ting, we gotta tink jalike God wen come to choosing wat fo do an how fo ack.

We go look wat da Bible tell about alcohol an da reasons why peopo drink um.

WAT DA BIBLE TELL ABOUT DRINKING ALCOHOL

Da Bible no tell az wrong fo drink some alcohol. It tell dat drinking wine can be good fun. Da Teacha 9:7 tell, “So eat yoa food an stay good inside. Drink yoa wine wit one good heart.” Jesus wen drink wine sometimes, an odda faithful guys who wen serve Jehovah wen drink too.​—Mat 26:27-29; Luk 7:34; 1 Tim 5:23.

But da Bible tell drinking some alcohol an getting drunk, az two diffren tings. It tell, “No get piloot.” (Efe 5:18) An tell too dat “da piloot guys . . . no way dey goin get God fo dea king!” (1 Cor 6:10) Fo shua, Jehovah tell az no good fo drink too much an get drunk. Instead of jus copying wat peopo aroun us do, we going choose fo do wat make Jehovah happy.

Some peopo feel dey can drink plenny alcohol an no get drunk. But dat kine tinking is abunai. Da Bible make um clear dat “fo love da booze too much” can cause somebody fo make serious kine mistakes an jam up dea relationship wit Jehovah. (Titus 2:3; Smart Guys 20:1) Jesus wen give one warning dat “getting piloot” can stop somebody from going God’s new world. (Luk 21:34-36) So den, wat can help one Christian fo stay away from da pilikia dat can happen cuz of drinking alcohol?

TINK ABOUT WHY, WEN, AN HOW MUCH YOU DRINK

Wen we stay choosing wat fo do wen come to drinking alcohol, az dangerous fo ony tink about wat mos peopo in oua culture stay doing. Wen come to eating an drinking, Christians like be akamai an do wat make Jehovah happy. Da Bible remind us, “Eryting you guys do, eat, drink, wateva​—do um all fo show how awesome God stay.” (1 Cor 10:31) Try look dese Bible truts an some questions fo tink about.

I drink alcohol so dat oddas no going make fun of me, o wat? Outa Egypt 23:2 tell, “No follow da oddas.” Jehovah was giving da Israel peopo one warning fo no follow afta da peopo who neva make him happy. Dose words still yet good fo Christians today. If we let odda peopo change da way we tink an choose wat fo do wen come to alcohol, bumbye, maybe we no going live da way Jehovah like us fo live an we going lose out on oua relationship wit him.​—Rome 12:2.

I drink alcohol ony fo show I strong, o tuff? In some cultures, drinking all da time an drinking plenny, az normal an ok. (1 Pet 4:3) But try look wat tell at 1 Fo Da Corint Peopo 16:13, “Eh! Watch out! Stay solid an trus God! No sked! Stay strong!” But alcohol can really help somebody fo stay strong, o fo be tuff? No. Alcohol can make um hard fo somebody tink good an make good kine choices. So drinking plenny alcohol no prove dat somebody stay strong, but radda show dat dey weak. Isaiah 28:7 talk about somebody who drink too much stay jam up, so dey fall down an no can figga wats right.

Fo stay strong, we gotta do wats right an we gotta “watch out . . . stay solid, an trus God.” (Songs 18:32) We can do dis wen we watch out fo any dangers an make good kine choices so we no jam up oua relationship wit Jehovah. Jesus had one strong relationship wit Jehovah, an plenny peopo wen respeck him cuz he no was sked fo go all out an do wat stay right.

I drink alcohol so I no worry about my pilikia, o wat? God wen have one song writa write down, “Wen I tink bout tings dat bodda me plenny, you [Jehovah] make me feel shua notting bad goin happen. Cuz a dat, I stay feel real good inside!” (Songs 94:19) If yoa problems stay bringing you down, trus Jehovah fo help, not alcohol. One good way fo help you no worry az much, is pray moa to Jehovah. Anodda ting plenny peopo do dat work, is ask one solid fren in da local hui fo good advice. Da fo real trut is, drinking alcohol fo deal wit pilikia can make somebody come weak an lazy fo do wat stay right. (Hos 4:11) Daniel, da braddah from befoa, wen tell, “I had hard time wit stress an feeling guilty. I wen drink fo no worry az much, but dis wen give me moa problems. I wen lose my frenz an da respeck I had fo myself.” So den, wat wen help Daniel? “I wen figga out dat I had fo trus Jehovah, not alcohol. Wit Jehovah’s kokua I was finally able fo hando my pilikia an get ova um,” he tell. Garans, Jehovah stay always ready fo help us, even if wat we stay going thru feel jalike no moa hope.​—Php 4:6, 7; 1 Pet 5:7.

If you drink alcohol sometimes, try figga how often o how much you drink an ask yoaself, “Somebody in my ohana o one close fren wen tell dey stay worried about my drinking?” If yeah, dis could be one sign dat you stay starting one habit o one problem you no even know about. “I stay drinking moa den I used to, o wat?” Maybe dass da case wit somebody who no stay addicted to alcohol yet, but could be going dat way. “Is hard fo me fo no drink alcohol fo couple days, o moa?” If yeah, den drinking might be one habit awready, o one addiction. Fo get ova da problem, you might need professional kine help.

Cuz drinking can cause plenny problems, some Christians wen choose fo no drink any alcohol. Maybe oddas choose not fo drink jus cuz dey no like how da ting taste. If somebody you know wen choose fo do dat, you can make nice an show you respeck wat dey wen choose witout ragging on dem.

Maybe you wen see how akamai stay fo set some limits fo yoaself. Maybe one Christian going set one limit on how much he going drink. O maybe he going set one rule fo how much times he going drink, maybe once a week o small kine wen he stay eating. Oddas wen set limits on da kine alcohol dey going drink, like drinking wine o beer small kine but no hards, not even in mix drinks. Wen somebody set limits on drinking, going be moa easy fo him stick to um. If one solid Christian choose fo do dat an stick wit his choice, he no need feel shame.

Wen choosing wat fo do wen come to alcohol, we gotta tink about how oddas feel. Fo Da Rome Peopo 14:21 tell, “Mo betta no eat meat, o no drink wine, o do odda kine stuffs dat goin trip up yoa braddahs an sistahs an make um fall down.” How you can do dis? Show love fo yoa braddah. If you tink dat having one drink going offend somebody, den love going make you choose not fo drink dat time. Wen you do dat, you show you respeck an love oddas, an kea moa about dem den yoaself.​—1 Cor 10:24.

Also, maybe da govament get laws about alcohol. Of course one Christian going follow dese laws. Maybe get one law dat tell wat age you can start fo drink alcohol. O da laws tell you no can drink an drive o use some machines.​—Rome 13:1-5.

Jehovah wen give us plenny awesome kine gifs, an one of um is choosing how we going use um, like wat we going eat an drink. We go make choices dat show we tankful fo dis gif by choosing fo do stuff dat make Jehovah happy.