Copy Da Faitful Angels

1-2. (a) How we diffren from da angels? (b) How we same same jalike da angels?

CUZ we Jehovah’s peopo, we stay paht of one family dat love each odda an worship Jehovah. Dis family iz oua braddahs an sistahs from all ova da world, an millions of angels too. (Dan 7:9, 10) Wen we tink about da angels, maybe we tink plenny about how dey diffren from us. Fo exampo, da angels been alive way moa long den we been alive. (Job 38:4, 7) Dey moa strong den us. Dey moa spesho an do wat stay right moa den humans could eva do, cuz we no stay perfeck.​—Luk 9:26.

² Even tho we stay diffren from da angels, in plenny ways we stay same same like dem. Fo exampo, da angels copy Jehovah’s good kine qualities. Us can too. Jalike da angels, we can choose wat fo do. Like dem, we get oua own name, we can ack diffren, an we get diffren kine kuleana. An same same jalike da angels, we get one strong pull inside us fo make us like worship Jehovah.​—1 Pet 1:12.

3. Wat we can learn from da faitful angels?

³ Cuz we same like da angels in plenny ways, dea good kine exampo can build us up an teach us plenny importan tings. In dis lesson, we goin talk about how da angels stay humbo, love peopo, hang in dea, an work hahd fo keep da hui clean, an how all us can copy dem.

DA ANGELS STAY HUMBO

4. (a) How da angels show dey humbo? (b) How come da angels humbo? (Songs 89:7)

⁴ Da faitful angels stay humbo. Even tho dey get plenny experience, get plenny powa, an stay supa smart, dey lissen wat Jehovah tell. (Songs 103:20) Wen dey do wat Jehovah tell dem fo do, dey no brag or show off how strong dem. Dey happy fo do wat Jehovah tell um fo do, even if nobody kno dea name.a (Start 32:24, 29; 2 Ki 19:35) Dey no take da respeck dat belong to Jehovah. How come da angels so humbo? Cuz dey love Jehovah an get plenny respeck fo him.​—Read um Songs Fo God 89:7.

5. How da angel wen show he wuz humbo wen he had correck da aposal John? (Go look da picha.)

⁵ Try look wat wen happen dis one time dat angels wen show dey humbo. About 96 C.E., had one angel dat nobody wen kno his name who wen show awesome kine tings to da aposal John. (Jesus Show 1:1) How John wen ack? He wen try fo worship da angel. But dat angel wen stop um real fas an tell um, “No do dat! I ony one worka fo God jalike you an yoa braddahs an sistahs dat tell da trut bout Jesus. Show love an respeck fo God!” (Jesus Show 19:10) Ho, real humbo! Da angel no wuz interested in getting all da glory. Right away da angel wen tell John fo worship Jehovah. Same time, da angel neva tink he wuz betta den John. Even tho da angel wen serve Jehovah fo way moa longa an wuz way moa strong den John, he wuz humbo an wen call John one worka fo God, jalike him. An even tho da angel had fo correck John, he neva scold um or treat um harsh kine. He wen talk nice kine to him. He probly wen figga dat John had bow down to him cuz wat he wen see had blow his mind.

6. How we can copy how da angels stay humbo?

⁶ How we can copy how da angels stay humbo? Us guys too can work hahd fo Jehovah witout making burot an acking like we all dat. (1 Cor 4:7) An we no like tink we betta den oddas jus cuz we stay one Witness moa long den dem, or get one kuleana dey no moa. In fact, da moa kuleana us guys get, da moa humbo we gotta be. (Luk 9:48) Jalike da angels, we like work fo oddas. We no like make peopo tink we moa importan den dem.

7. How we can show we humbo wen we gotta correck or counsel somebody?

⁷ We can show we humbo too if we gotta correck somebody, like one of oua braddahs or sistahs or oua own kid. Wen we do dat, sometimes we might have fo tell um strait. But jalike da angel dat wen correck John nice kine, we can tell um strait witout making da person getting da counsel feel all bum out. If we no tink we betta den oddas, dat goin help us show respeck an love wen we give counsel from da Bible.​—Col 4:6.

DA ANGELS LOVE PEOPO

8. (a) Like Luke 15:10 tell, how da angels show dey love peopo? (b) Wat paht da angels get wen come to preaching? (Go look da picha.)

⁸ Da angels no make like humans stay notting. Radda, dey love peopo. Da angels stay happy wen somebody who wen screw up stay sorry fo wat dey wen do, or wen somebody who had stop serving Jehovah go back to him. We stay happy too wen somebody learn about Jehovah an make changes in dea life fo serve Him. (Read um Luke 15:10.) Da angels even help us wen we preach. (Jesus Show 14:6) Even tho dey not da ones who preach to peopo, dey help da guys who worship God find peopo who like learn about him. Of course, we no can tell fo shua dat da angels wen sen us to one exack person. Jehovah can use odda ways, like his spesho spirit, fo help peopo who like kno about him, or fo help his worka guys find dem. (Jesus Guys 16:6, 7) But he still use his angels plenny fo help us wen we preach. So wen we preach da good kine tings, we can be shua dat da angels goin be dea fo us.​—Go look da box “Dey Wen Get One Ansa To Dea Prayas.”b

9. How we can copy how da angels love peopo?

⁹ How we can copy how da angels love peopo? Wen dey tell at da meeting dat somebody had get reinstated, we can be happy jus like da angels. We can make shua we tell oua braddah dat we love him an we happy he serving Jehovah again. (Luk 15:4-7; 2 Cor 2:6-8) We can even copy da angels by goin all out wen we preach. (Teacha 11:6) An jus like da angels help us wen we preach, we can help oua braddahs an sistahs wen dey go field service. Like, we can go wit somebody who stay new in da trut? Or, we can help da makule ones or da ones who get problems wit dea healt fo go preach wit us?

10. Wat we can learn from wat Sara wen go tru?

¹⁰ Wat if get someting making um hahd fo us do az much az we like fo Jehovah? We can find odda ways fo work wit da angels wen we preach. Try look wat Sara,c one sistah in India, wen go tru. Afta about 20 years pioneering, Sara wen come real sick an no could get outa her bed anymoa. Cuz of dat, she wen get supa bum out. But cuz of da help she wen get from her spiritual ohana an reading da Bible, litto by litto, Sara wen come happy again. Of course, she had fo find new ways fo preach. Cuz she no could even sit up fo write lettas, she could ony use da telephone fo preach. So she wen call up da peopo she wen preach to befoa, an dey wen tell her about oddas who maybe wanted fo talk about da Bible. Wat wen happen? In ony coupo monts, Sara had 70 Bible studies, way moa den she could hando! So she wen give some of dem to oddas in da local hui. Now plenny of da learnas come to oua meetings. Da angels mus be so happy fo work wit braddahs an sistahs, like Sara, who do all dey can fo preach!

DA ANGELS SHOW HOW FO HANG IN DEA

11. How da faitful angels wen show dey hang in dea long time?

¹¹ Da faitful angels, dey one good exampo of how fo hang in dea long time. Fo tousands of years, dey had fo hando all kine bad kine stuff an tings dat no stay fair. Dey wen see Satan an plenny odda angels, who used to work wit dem, go agains Jehovah. (Start 3:1; 6:1, 2; Jude 6) Da Bible tell about one faitful angel who had fo fight one demon wit plenny powa, fo days. (Dan 10:13) An den, from da time of Adam an Eve, da angels ony wen see litto bit peopo choose fo serve Jehovah. But no matta all dat, dese angels stay happy fo serve Jehovah an go all out fo him. Dey kno dat wen da time stay right, God goin hemo all da stuffs dat no stay fair.

12. Wat can help us fo hang in dea?

¹² How we can copy how da angels hang in dea long time? Jalike da angels, maybe us guys see tings dat no stay fair or deal wit peopo who go agains us. But like dem, we get fait dat wen da time stay right, God goin hemo all da bad kine stuff. So jus like da angels, “we gotta hang in dea, an no get wore out fo do good kine stuff.” (Gal 6:9) An God promise fo help us hang in dea. (1 Cor 10:13) We can pray to Jehovah fo his spirit, an dat goin help us be patient an happy. (Gal 5:22, NEW WORLD TRANSLATION; Col 1:11) Wat if peopo stay go agains you? Gotta full on trus Jehovah, an no freak out. Jehovah always goin help you an make you strong.​—Heb 13:6.

DA ANGELS HELP KEEP DA HUI CLEAN

13. Wat spesho work da angels get in da time befoa da world come pau? (Matthew 13:47-49)

¹³ Befoa da world come pau, da angels wen get one spesho kine work from Jehovah. (Read um Matthew 13:47-49.) Get uku million peopo from all ova da world who like hea da good kine tings. Some of dem make changes fo come fo real kine Christians, but oddas no like. Da angels spesho job iz fo “take away da bad guys from da guys dat stay do wat da Rules From God tell um fo do.” Dis mean dat dea spesho work iz fo help keep da hui clean. Dis no mean dat erybody who wen stop hanging out wit us fo wateva reason no can come back, or dat neva goin get pilikia in da hui. Still yet, we can be shua dat da angels stay working hahd fo keep oua huis clean.

14-15. How we can copy da angels an show we like keep da hui clean? (Go look da pichas.)

¹⁴ How we can copy da angels an show we like keep da hui clean? We gotta work hahd fo keep oua frenship wit Jehovah strong. We do dis wen we pick frenz who love him an wen we stay away from anyting dat would hurt oua frenship wit him. Dis iz how we help keep da hui clean. (Songs 101:3) We can even help oua braddahs an sistahs fo stay faitful to Jehovah. Fo exampo, wat we goin do if we find out one of oua braddahs or sistahs wen do someting real bad? Cuz we love dem, we goin tell um moa betta dey talk to da eldas. If dey no do dat, we gotta tell da eldas about wat wen happen. We like oua braddah or sistah who need spiritual kine help fo get um az soon az can!​—Jam 5:14, 15.

¹⁵ Az sad, but wen peopo do pilau kine stuff dey not suppose to do, dey gotta get hemo from da hui. Wen dis happen, we “betta not hang aroun” dem.d (1 Cor 5:9-13) Dass how da hui stay clean. An wen we choose fo no hang out wit da guys who get hemo from da hui, dis iz actually one good ting fo dem. Wen we lissen Jehovah an no hang out wit dem, maybe dat goin help dem see dat dey gotta come back to Jehovah. If dey do, we happy an feel real good inside, jus like Jehovah an his angels.​—Luk 15:7.

16. Wat kine ways you goin try copy da angels?

¹⁶ So awesome dat Jehovah let us learn about da angels an work wit dem! We go copy dea good qualities like how dey stay humbo, how dey love peopo, how dey hang in dea, an how dey like keep da hui clean. If we copy da faitful angels, us too can worship Jehovah az paht of his ohana foeva.