Two New Jesus Luna Guys
ON OCTOBA 5, 2024 at da annual meeting, dey wen let erybody kno someting real spesho. Braddahs Jody Jedele an Jacob Rumph had get pick fo come paht of Jesus Luna Guys. Both of dem been serving Jehovah long time.
Jody Jedele an his wife, Damaris
Braddah Jedele wuz born in Missouri, U.S.A. an his parents wuz Witnesses Fo Jehovah. He wen live wea ony had litto bit Witnesses. Cuz of dat, plenny braddahs an sistahs from all ova wen help preach ova dea an Braddah Jedele got fo meet dem. Da love dey had wen affeck him. He wen get baptize on Octoba 15, 1983. He wen love da preaching work, so afta he wen pau high school, he wen come one full time pionea preacha in Septemba 1989.
Wen Braddah Jedele wuz growing up, his parents would take him an his sistah fo visit Bethel. Goin dea wen help dem like go serve at Bethel, an dass wat both of dem wen do. Braddah Jedele wen start working at Wallkill Bethel in Septemba 1990. Firs, he wen start working in da Cleaning Departmen an den in Medical Services.
Aroun dat time, had Spanish huis dat wuz growing, so dey needed braddahs. So Braddah Jedele wen hui up wit one of dem an started fo learn Spanish. Right afta dat, he wen meet Damaris, one sistah who wuz one full time pionea in da same circuit. Layta on, dey wen get married an wen go Bethel togedda.
In 2005, dey had fo leave Bethel fo take kea dea faitful parents. Dat time, dey wuz full time pioneas. Braddah Jedele had help teach da Pionea Service School, an he wuz on da local Hospital Liaison Committee an Regional Building Committee.
In 2013, Braddah an Sistah Jedele had get da invite fo go back Bethel fo help wit da Warwick construcktion projeck. Since dat time, dey wen go serve at Patterson an Wallkill too. Braddah Jedele wen work in da Local Design/Construcktion Departmen an in Hospital Information Services. In March 2023, he wen start fo serve az one helpa fo da Guys Dat Kea Fo Da Preaching Work. Wen he had tink bout all da diffren kine work he wen do fo Jehovah, he tell, “Wen you get new tings fo do fo da hui, sometimes you can feel all nerjus an sked. But dass wen you gotta trus in Jehovah, cuz he da one make happen wat he like.”
Jacob Rumph an his wife, Inga
Braddah Rumph wuz born in California, U.S.A. Wen he wuz one kid, his maddah wuz one Witness, but she neva preach or go meetings dat time. Still yet, she wen try teach him da truts from da Bible. Ery yea, he would go visit his granmaddah who wuz one Witness. She wen help him fo like kno moa about da Bible, so wen he wuz 13 years old, he we ask fo somebody fo study wit him. On Septemba 27, 1992, wen he was one teenaga, he wen get baptize. Wuz so good dat his maddah wen start fo preach an go meetings again. An his faddah an siblings wen start fo learn da Bible, an all dem wen get baptize too.
Wen he wuz young, Braddah Rumph wen see how da pioneas wuz so happy. So afta he wen pau high school in Septemba 1995, he wen start fo pionea. In 2000, he wen move to Ecuador fo preach wea needed moa help. Dass wea he wen meet Inga, one pionea sistah from Canada, an bumbye dey wen get married. Afta dey wen get married, dey wen serve in one town in Ecuador wit one small group of braddahs an sistahs. Today, da local hui ova dea stay strong.
Bumbye, Braddah an Sistah Rumph wen get pick fo come spesho pioneas, an den layta on dey wuz in da circuit work. In 2011 dey wen get da invite fo go da 132nd class of Gilead. Afta dey wen grad, dey wen go five diffren countries an serve in all kine ways, like doing missionary work, circuit work, an working at Bethel. Braddah Rumph also wen get da chance fo teach da Skool Fo Kingdom Evangalizas.
Cuz of da COVID-19 pandemic, Braddah an Sistah Rumph wen go back to da United States. Dey wen get da invite fo go Wallkill Bethel, wea Braddah Rumph wen get training in da Service Departmen. Layta on, dey wen get pick fo go back to da Ecuador branch, wea Braddah Rumph wen serve on da Branch Committee ova dea. In 2023 dey wen get moved to Warwick. In January 2024, Braddah Rumph wen get pick fo help da Service Committee. Wen he tink about wea he had serve, he tell, “Wat make da work spesho iz not da place, but da peopo you work wit.”
We so tankful fo da hahd work dese braddahs do, an we “feel good inside bout [dem guys].”—Php 2:29.