Questions Readas Get
Pretty soon, how Jehovah goin make da govaments “tink da way he like um fo tink”?
Wen talking about wen da big trouble goin start, Jesus Show 17:16, 17, NWT, tell, “Da ten horns you wen see an da Wild Animal, dey goin hate da hooka. Dey goin rip away eryting she get so dat she no moa notting, not even clotheses. Dey goin eat her up an burn her up wit fiyah. Cuz God wen make dem guys tink da way he like um fo tink. Az why dem guys goin give da Wild Animal dea powa fo come king. Dey get dat powa till eryting God tell happen.” Oua publications use to tell dat wen God make “dem guys tink da way he like um fo tink,” Jehovah goin make da govaments “tink” fo hemo bulai kine religions.
But we gotta make one change to dat. Jehovah goin make da govaments “give da Wild Animal dea powa fo come king,” an dass how he goin make dem “tink da way he like um fo tink.” Fo undastan how dis goin happen, we go ansa dese questions.
Who da guys in da prophecy? “Da hooka”, or “Babylon Da Great”, iz all da bulai religions. Da “red wild animal” iz da United Nations. Befoa, it wuz da League of Nations dat had start in 1919 fo make shua all da govaments in da world get along. (Jesus Show 17:3-5, NWT) “Da ten horns” iz all da govaments dat back up da wild animal.
How da hooka an da red wild animal conneckted? Da hooka stay sitting on top da wild animal. Dat mean she support um an trying fo control um.
Wat goin happen to da hooka? Da wild animal, an da ten horns “goin hate da hooka.” Dey goin hate her so much dat dey goin take away eryting she get, an show eryone how pilau she stay. Dey goin wipe her out jus like wat Jehovah had say wuz goin happen. (Jesus Show 17:1; 18:8) All bulai kine religions goin be history. But befoa dat, Jehovah goin make da govaments do someting dat neva happen befoa.
Wat Jehovah goin make da govaments do? He goin make da govaments “tink da way he like um fo tink,” which iz “dey goin give dea powa an dea right fo come king to da Wild Animal,” da United Nations. (Jesus Show 17:13) Wat you tink? Dis goin be da govaments own idea, fo give dea powa an right fo come king ova to da wild animal? No! Da prophecy show dat Jehovah da one dat make um do dat. (Smart Guys 21:1; go check out Isaiah 44:28.) Dis goin happen litto by litto? No! Dis change goin happen fas. Den da wild animal goin do wat Jehovah like, an wipe out all bulai religion.
Wat we expeck fo happen in da future? We no expeck fo see news reports dat govaments stay slowly giving dea powa to da United Nations. We can expeck dat Jehovah goin make da govaments give dea powa to da wild animal all of a sudden. Wen dat happen, we goin kno dat da big trouble goin start. So den, “mo betta we stay ready” cuz all dese changes goin happen pretty soon!—1 Tess 5:6.