Help Fo Wahines Who Wen Go Tru Abuse
“ MILLIONS of women an girls all ova da world wen go tru some kine of abuse. You one of dem? We go check out why God kea about you an why he like you be safe, an wat he goin to da guys dat treat wahines real bad.”
Dis wen come from da jw.org article “Women’s Safety—The Bible’s Perspective.” Get one link at da end of dat article dat let you download um in one PDF. Den you can print um, an fold um into one tract. One sistah in da United States name Stacy wen tell, “I had print copies, an me an anodda sistah wen take um to one women’s shelta in my local hui’s territory.”
One lady dat work at da shelta had ask fo moa copies fo give out to da wahines living ova dea. So da sistahs wen give 40 moa tracts an 30 jw.org contack cards. Layta on, da manager of da shelta wanted da Witnesses fo show da wahines dea how fo study da Bible.
Stacy an two odda sistahs wen go to one nodda shelta. Dey wen give out five tracts to da workas ova dea, an da workas wen ask if dey could have some moa. One worka wen tell da sistahs, “We need dis tract. Dis goin help plenny wahines hea.” Layta on, wen da sistahs had go back to da shelta, some of da wahines wanted fo see wat one Bible study wuz like. An two of dem wen say dey wanted fo check out da nex weekend meeting at da Kingdom Hall.
Stacy tell, “It blow oua minds how happy peopo stay afta dey read dis tract. Printing um out iz one nice way fo share da trut about God’s Govament wit women who wen go tru abuse. Wuz so good fo see how dese wahines wen reack to da trut, an we so excited fo see how Jehovah goin help us keep sharing da good news wit dem.”