“ Go All Out Fo Stay Pono Wit Each Odda”
DA APOSAL Paul wen tell da braddahs an sistahs in da Efesus hui fo “no get huhu wit each odda cuz you guys get plenny love an aloha fo each odda. Go all out fo stay pono wit each odda cuz God Spirit make you guys stay tight wit each odda awready. An you guys stick togedda cuz you guys awready stay pono wit each odda.”—Efe 4:2, 3.
We stay pono an tight wit each odda cuz of “God Spirit.” But Paul also wen tell we gotta work hahd fo stay pono wit each odda. So ery braddah an sistah gotta go all out fo do dis.
Try picha, someone had give you one new car. Who get da kuleana fo take kea of um? You, right? If you neva take kea of da car, you no can blame da guy who wen give um to you if da ting break down.
Same same, even tho oua unity iz one gif from Jehovah, all us gotta do oua paht fo take kea of um. If we not getting along wit one braddah or sistah, we gotta ask ouaself, “I doin my paht fo keep da hui togedda by fixing da problem?”
“GO ALL OUT” FO MAKE PONO
Like wat Paul wen write, not always easy fo be pono wit oua braddahs an sistahs, speshly if one of dem wen rub us da wrong way. You tink you always gotta go talk to da person about da problem? Not all da time. Try ask yoaself, “If I make one big deal out of um dat goin help us stick togedda, or make da problem moa worse?” Sometimes da bes ting fo do iz let um go an foget about um.—Smart Guys 19:11; Mar 11:25.
Try ask yoaself, “If I make one big deal out of um dat goin help us stick togedda, or make da problem moa worse?”
Da aposal Paul wen tell fo put up wit oddas wit “plenny love an aloha.” (Efe 4:2) One book wen say dis scripcha can mean “take dem how dey stay.” Dis mean we goin accept dat oua braddahs an sistahs goin make mistakes, jus like us. We all trying fo live da “new kine way.” (Efe 4:23, 24) But none of us can do um perfeck. (Rome 3:23) If we kno dat, goin be moa easy fo us put up wit each odda, let each odda go, an “stay pono wit each odda.”
Goin be moa easy fo us stick togedda an “stay pono wit each odda” if we let tings go, an foget about da tings dat peopo do fo hurt us. At Fo Da Efesus Peopo 4:3, da Greek word dass translated “stick togedda” can also be talking about strong bands dat conneck bones togedda. Jalike dose bands, peace, an love fo oua braddahs goin help us stick togedda even if we no like wat dey do.
So if one braddah or sistah rub you da wrong way, make you mad, or jus irritate you, try fo undastan dem, instead of tinking about all da bad stuff about dem. (Col 3:12) Since we all imperfeck, garantee we all wen hurt somebody too. If we rememba dat, dat goin help us “go all out fo stay pono wit each odda.”