Wass One Prophecy?

Da Bible’s ansa

One prophecy iz one message God tell somebody. Da Bible tell dat da guys dat wen talk fo God, “write . . . wat God wen give um. Dey tell wat da Good An Spesho Spirit wen show um fo tell.” (2 From Peter 1:20, 21) So one guy dat talk fo God is somebody who get one message from God an den tell um to oddas.​—Jesus Guys 3:18.

How da guys dat talk fo God get a message from God?

God wen use diffren ways fo tell wat he tinking to da guys dat talk fo him:

• God wen write um. God wen do dis at least one time wen he had write down da Ten Main Rules an give um to Moses.​—Outa Egypt 31:18.

• Da angels tell da message. Fo exampo, God wen use one angel fo tell Moses wat fo tell Pharaoh. (Outa Egypt 3:2-4, 10) Wen wuz importan fo use da same words God wen tell, God had um write um down, like wen he had tell Moses “Write down all dis stuff I tell you fo do. Cuz fo me make one deal wit you an da odda Israel peopo, you guys gotta do eryting I stay tell you fo do.”​—Outa Egypt 34:27.a

• Visions. Sometimes dey wuz awake wen dey had see um. (Isaiah 1:1; Habakkuk 1:1) Some wuz so real dey dat dey wen play one paht in um. (Luke 9:28-36; Jesus Show 1:10-17) Odda times dey wen get da vision wen dey wuz in one trance. (Jesus Guys 10:10, 11; 22:17-​21) God wen even use dreams fo give da message wen dey wuz sleeping.​—Daniel 7:1; Jesus Guys 16:9, 10.

• God make um tink wat he like. God wen put his tinking in dea head. We see dis wea da scripcha tell “eryting inside da Bible stay dea cuz God breave um inside da guys dat wen talk fo him befo time.” (2 Fo Timoty 3:16) God wen use his spesho spirit fo “breave” his ideas into da heads of da prophets. Da message come from God, but da prophet had choose da words.​—2 Samuel 23:1, 2.

Prophecy always gotta tell wat goin happen in da future?

No, Bible prophecy no gotta tell wat goin happen bumbye. But mos of da prophecies conneck to da future in one way or anodda. Fo exampo, da prophets wen keep tellin da Israel peopo fo stop doing bad tings. Dese warnings wen tell wat would happen to dem in da future if dey lissen or no lissen. ( Jeremiah 25:4-6) at dey wen choose fo do had affeck how da future wen turn out fo dem.​—Da Rules Secon Time 30:​19, 20.

Some Bible prophecies dat no talk about da future

• One time da Israel peopo wen ask God fo help. He wen sen one prophet fo tell dem he no wuz goin help dem cuz dey neva lissen.​—Local Leadas 6:​6-​10.

• Wen Jesus had talk to da wahine from Samaria, he wen kno tings about her past ony cuz God wen tell him. Cuz of dat, she could tell he wuz one prophet even tho he neva tell anyting about da future.​—John 4:​17-​19.

• Wen Jesus’ wuz in court, had guys dat wen cova his face, hit um, an wen tell “Eh, you one guy dat talk fo God, aah? So, tell us who wen hit you!” Dey neva like Jesus tell da future, but wanted him fo use powa from God fo tell who hit um.​—Luke 22:​63, 64.