HELP FO DA OHANA
How Fo No Lose Um Wen You Get Mad
Imagine yoa odda half wen say or do someting dat make you mad an you try fo hold um all in. An den, dey can tell someting stay wrong, so dey ask you about um ova an ova. Dat make you even moa irraz. So befoa tings blow up, how you can hando so you no lose um?
Wat gotta know
No good fo yoa healt wen you get all mad. Research wen show dat if you no control yoa anger, you get moa chance fo get high blood pressure, heart disease, depression, an stomach problems. Getting all mad can even be conneckted to getting hard time sleeping, worrying plenny, having skin problems, an one stroke. Dass why good fo lissen wen da Bible tell: “No come huhu, no come mad. . . , cuz dat ony goin hurt.”—Songs 37:8.
No good wen you hold in yoa anger too. Wen you let yoa anger keep growing, dat can be jalike one disease dat can hurt you inside. Fo exampo, you could start fo be real negative or judgy. Dat kine attitude can make you hard fo live wit an could mess up yoa marriage big time.
Wat can do
Look fo da good tings bout yoa odda half. Write down three tings dat you like about yoa odda half. Da nex time you get all mad at dem, try tink bout dose tings. Dis could probly help you control yoa anger.
Bible trut: “Tell mahalo plenny erytime.”—Colosse 3:15.
Try fo let um go. Try fo see tings da way yoa odda half see um. Dis goin help you fo put yoaself in dea slippahs an show “love an aloha” like da Bible tell. (1 Peter 3:8) Try ask yoaself, “Wat dey wen do, wuz so bad dat I no can fogive um?”
Bible trut: “If somebody go agains you an dat no goin bodda you, plenny peopo goin respeck you!”—Smart Guys 19:11.
Tell how you feel in one nice way. Say “I” wen you talk. Fo exampo, radda den saying, “Wen you no call me fo say wea you stay, iz like you no even kea,” say, “I wuz worried cuz wuz late, an I no wuz sure if you wuz safe or not.” Talking in one nice kine way can help you control yoa anger.
Bible trut: “Talk wit aloha...dass jalike food dat stay ono, cuz get salt fo taste!”—Colosse 4:6.
Lissen wit respeck. Afta you tell how you feel, let yoa odda half talk witout butting in. Wen yoa odda half pau talk, try say wat dey wen say again, fo make shua you undastan um. Wen you lissen, dass supa importan fo help you control yoa anger.
Bible trut: “Erybody gotta lissen real good firs befo dey talk.”—James 1:19.