YOUNGA GUYS LIKE KNOW
How Fo Shut Down Negative Kine Tinking?
Wat you tink about yoaself?
Always see da good in tings
“I try fo relax an no get mad. Dass why I like try fo smile an be happy eryday.”—Valerie.
Always see da bad in tings
“Da firs ting I tink wen I hea someting good iz no way—az too good fo be tru, no can be right.”—Rebecca.
Always see tings fo real kine
“Wen you always see da good in tings, you settin yoaself up fo come bum out. An if you always see da bad in tings, you goin live one sad life. Wat wen help me iz always seeing tings fo real kine.”—Anna.
How come dass importan?
Da Bible tell dat “da peopo dat stay good inside, Jalike dey stay party ery day.” (Smart Guys 15:15) So fo shua, peopo who stay away from negative kine tinking an look at dea life in one good way, dey always goin be moa happy. An goin be moa easy fo dem make frenz. Cuz who like hang out wit peopo who always stay tinking negative kine?
But even if you somebody who always see da good tings in life, you still goin have to deal wit some pilikia. Fo exampo:
In da news all you hea about iz war, terrorism o crime.
You gotta go tru all kine pilikias in yoa family.
You make choke mistakes cuz you not perfeck.
One of yoa frenz wen say o do someting fo make you feel sad.
Instead of making like dose pilikias not dea, o worrying about um too much, try fo see um fo real kine. Looking at um fo real kine goin help you fo stay away from negative kine tinking. An help you fo hando wateva pilikias you goin tru witout getting all bum out from um.
You can hando all da storms in life, cuz you kno fo shua, latah on, dat da sun goin come out
Wat fo do
Rememba you not perfeck, you goin make mistakes.
Da Bible tell: “Get peopo all ova da world dat do wat da Rules From God tell um fo do, But no mo even one a dem dat do wass right erytime, An no do notting bad eva.” (Teacha 7:20) Cuz you not perfeck an goin make mistakes, no mean you one loser, ony mean you human.
How fo keep um real: Work on yoaself, but no expeck fo be perfeck. One young guy name Caleb wen tell, “I try real hard not fo tink too much a my mistakes. But I try fo learn from um so dat I can come moa betta.”
No compare yoaself to oddas.
Da Bible tell: “No get big head. No try make da odda guy try like beef. No try be mo betta den da odda guy.” (Fo Da Galatia Peopo 5:26) Wen you look social media pichas of stuffs you no wuz invited to, dat can make you feel butt hurt. You can feel like yoa bes frenz no like you anymoa.
How fo keep um real: Jus kno dat you not goin be invited to eryting. An social media no tell da whole story. Alexis tell, “Social media ony show da exciting kine stuff in dea life. Dey usually leave out da boring stuff.”
Live good wit erybody—speshly da ohana.
Da Bible tell, “Try yoa bestes fo be da one dat do eryting fo live good wit erybody wit aloha.” (Fo Da Rome Peopo 12:18) Rememba, you no can control how odda peopo ack, but you can control how you ack. You can choose fo live good wit erybody wit aloha.
How fo keep um real: Pray hahd fo no make da problems in yoa ohana moa worse. But make peace like you would wit yoa frenz. Melinda, one teenaga wen tell, “Nobody perfeck. We all goin step on each oddas toes. Iz oua kuleana fo choose fo live good togedda or not.
Learn fo be tankful.
Da Bible tell: “Tell “Mahalo! Plenny!”” (Fo Da Colosse Peopo 3:15) If you stay tankful, you goin look at da good tings in yoa life, an not da bad tings.
How fo keep um real: No make like yoa problems no stay, but rememba fo see da good tings in yoa life too. “Eryday, I write in my notebook one good ting dat wen happen to me,” tell Rebecca, one young wahine. “I like rememba dat I get plenny good tings fo tink about.”
Take one good look at wat kine frenz you get.
Da Bible tell: “You hang out wit da bad kine guys, dat goin jam you up fo you no be one good guy!” (1 Fo Da Corint Peopo 15:33) Wen you hang aroun peopo dat stay judgy, talk stink, an always mad, fo shua dat kine stuffs goin rub off on you.
How fo keep um real: Wen yoa frenz go tru hahd times, dey might feel sad an depressed sometimes. Kokua dem, but no let dea problems bodda you too much. “We no like spen too much time wit negative kine peopo ,” one young wahine Michelle tell. “In math, wen you add two negative numbas you ony goin get one bigga negative numba.”
Read moa about um
We stay living in da time da Bible tell “befoa da world goin come pau, erybody goin presha out.” (2 Fo Timoty 3:1) You find um hahd fo keep seeing da good in tings, wen get so much bad stuff dat stay happening in dis world? Go Read “Will Suffering Ever End?”