God Make Da Firs Guy An Wahine

Jehovah wen plant one garden in one place dey call Eden. Dat garden had choke flowas, trees an animals. Den God wen make da firs guy Adam outa da dirt from da groun an den wen blow on top his face. You kno wat wen happen nex? Da guy wen come alive! Jehovah wen put Adam in charge of da garden, an den God wen tell um fo name all da animals.

Jehovah wen give Adam one supa importan rule. He wen tell Adam, ‘You can eat da fruit from all da trees inside da garden except fo one spesho tree. Cuz if you eat da fruit from dat tree, you goin mahke.’

Layta, Jehovah tell, ‘I goin make one helpa fo Adam.’ He wen make Adam go pass out sleep, an den God wen use one rib from Adam fo make one wife fo Adam. Her name wuz Eve. Adam an Eve wen come da firs ohana. How Adam wen feel bout his new wife? Adam wuz so happy, he wen tell, ‘Look wat Jehovah wen make from my rib! Yessah! Dis somebody fo me.’

Jehovah wen tell Adam an Eve fo make plenny bebes an fill da eart. He wanted dem fo be happy working togedda fo make da whole eart one paradise, or nice kine park, jus like da Eden garden. But tings neva work out lidat. How come? We goin learn moa in da nex story.