Jehovah Had Make Samson Strong

Hana hou! Plenny Israel guys had go back to worshipping fake kine gods again. So Jehovah wen let da Filisha guys take ova dea land. But had some Israel peopo dat wen love Jehovah. One of dose guys wuz Manoah. Him an his wife neva have kids. Had one time wen Jehovah sen one angel to Manoah’s wife. Da angel tell her: ‘You goin have one boy, an dis boy goin be one Nazir guy dat goin save da Israel peopo from da Filisha guys.’ You kno wat one Nazir guy wuz? Dey wuz guys who no could cut dea hair cuz dey wuz spesho workas fo Jehovah.

Bumbye, Manoah’s boy wuz born, an dey name him Samson. Wen Samson got olda, Jehovah wen make him supa strong. He could kill one lion wit ony his hands! One time, all by himself, Samson wen wipe out 30 Filisha guys. Da Filisha guys had hate his guts an wen keep trying fo kill him. One nite, dey had set up one plan wen Samson wuz sleeping in Gaza. Dey go by da city gate an wen try wait dea fo him come out in da morning. But Samson had wake up in da middo of da nite an go down to da city gate an buss da gate off da wall. He wen put da gate on his shouldas an carry um all da way to da mountain top nea Hebron.

Layta on, da Filisha guys wen go talk to Samson’s girlfren, Delilah. Dey tell her: ‘We goin give you plenny money if you help us figga out how come Samson so strong. Cuz we like catch him an put him in jail.’ Delilah wuz one greedy buggah, so she wen help dem. She try ask Samson how come he wuz so strong but he neva tell her. But she wen nag an nag him eryday, an dat had drive him nutz. Cuz he no could hando um no moa, he wen tell her his secret. He tell her: ‘My hair neva eva wen get cut in my life cuz I one Nazir guy. If I cut my hair, I not goin be strong anymoa.’ Wat you tink? Samson wen mess up big time cuz he tell her dat, yeah?

Right away, Delilah wen go to da Filisha guys an tell dem: ‘I wen find out his secret!’ Afta dat, she get Samson fo sleep on top her lap. Den she call one guy fo come cut his hair. Den Delilah yell: ‘Samson, da Filisha guys stay hea!’ Samson wen wake up, but his powa wuz all gone. Da Filisha guys wen grab him, rip out his eyes, an throw him in jail.

Had one day wen tousans of Filisha guys wen all come togedda in da tempo of dea god, Dagon. Dey wuz all yelling: ‘Oua god wen help us fo catch Samson! Bring him out so dat we can laugh at him!’ Dey wen put him between two humangus pos an had make fun of him. Samson yell out: ‘Jehovah, try make me come strong jus dis one moa time!’ By dis time, Samson’s hair wen grow back an wuz long again. He push real hard da pos of da tempo an da whole building had fall down. Erybody wen mahke, even Samson.