Josiah Wen Love God’s Rules

Josiah wuz ony eight year old, wen he come da Judah king. Dat time, peopo wuz doin magic kine stuff an idol kine worship. Wen he wuz 16, he wen try learn how fo worship Jehovah da right way. Wen he wuz 20, he start fo hemo da idols an altars from da land. Den wen Josiah wuz 26, he make ready fo fix Jehovah’s Tempo.

In Da Tempo, da Main Pries, Hilkiah, wen find da scroll of Jehovah’s Rules. Maybe dat wuz da same exack one Moses wen write. Shafan, da king’s secretary, wen bring da scroll to Josiah an read um to him. Wen he had hea Da Rules, he wen see dat da peopo no wuz listening to Jehovah fo plenny years. King Josiah tell Hilkiah: ‘Ho, Jehovah iz supa mad wit us. Go try ask him wat we gotta do.’ Jehovah wen give da ansa tru da wahine prophet Huldah: ‘Cuz da Judah peopo wen bag from me, I goin punish dem. But not wen Josiah stay king cuz he wuz humbo an wen lissen to wat I tell.’

Wen King Josiah hea wat she tell, he go to Da Tempo an call all da Judah peopo togedda. Den he read out loud Jehovah’s Rules to all dem. Josiah an da peopo promise fo do da bes dey can fo lissen to Jehovah.

Da Judah peopo neva celebrate da Passova long time. But wen Josiah had read in Da Rules dat suppose to do da Passova ery year, he tell da peopo: ‘We goin celebrate da Passova to Jehovah.’ So Josiah wen make ready plenny sacrifices an wen set up singas. Dey wen celebrate da Passova, an den fo da nex seven days dey wen do da Festival Fo Da Bread Dat No Moa Yeast. Neva have one Passova lidis since Samuel’s time. Some plenny Josiah wen love God’s Rules. You love fo learn about Jehovah?