Young Guys—Wat Kine Life You Like?

1. Wat wen make um hard fo Jehoash, Uzziah, an Josiah?

HOW you would feel if you wen come da king of God’s peopo wen you was real young? How you would use da powa you get? Da Bible talk about some young guys who wen come Judah kings. Like Jehoash was 7 years ol, Uzziah was 16, an Josiah was 8. Musta been hard aah fo dem? Even if was hard, Jehovah an oddas wen help dem do plenny good kine tings.

2. How come az good fo learn from wat wen happen to Jehoash, Uzziah, an Josiah?

² We not one king o queen, but still yet we can learn plenny tings from dese three guys inside da Bible. Dey wen make good choices, but dey wen make bad choices too. From wat dey wen do, we going see how come we gotta choose good kine frenz, stay humbo, an keep coming moa tight wit Jehovah.

CHOOSE GOOD FRENZ

3. How Main Pries Jehoiada wen help King Jehoash make good choices?

³ Copy da good choices Jehoash wen make. Wen Jehoash was young his faddah wen mahke an da Main Pries, Jehoiada, wen teach him about Jehovah. Jehoash was akamai cuz he wen lissen to wat Jehoiada wen tell um. Cuz of dat, Jehoash wen choose fo serve Jehovah an help da peopo fo do da same ting. He even wen make shua fo fix up Jehovah’s temple.—2 Rec 24:1, 2, 4, 13, 14.

4. How come az good fo treasure Jehovah’s rules? (Smart Guys 2:1, 10-12)

⁴ If somebody stay teaching you fo love Jehovah an live da way he like, dass one gif you should treasure. (Read um Smart Guys 2:1, 10-12.) Get plenny diffren kine ways parents can train you. Try look Katya, one sistah, who wen get help from her faddah fo make good kine choices. Eryday wen her faddah take her school, dey talk story about da day’s tex. She tell, “Talking wit him wen help me fo do da right ting wen I had problems.” Wat if da rules yoa parents make dat come from da Bible, you tink az too strick an you no can do wat you like? One sistah, Anastasia, rememba dat her parents wen take time fo tell her how come dey wen make dose rules. She say, “Dey no was trying fo control me, but dey was trying fo proteck me cuz dey love me.”

5. How wat you do going affeck yoa parents an Jehovah? (Smart Guys 22:6, NWT; 23:15, 24, 25)

⁵ Yoa parents going be happy if you lissen an do wat da Bible tell. Moa importan, you going make Jehovah happy, an you going come moa tight wit him. (Read um Smart Guys 22:6, NWT; 23:15, 24, 25.) Dass why good fo copy wat Jehoash wen do wen he was young.

6. Who Jehoash started fo lissen to, an wat wen happen? (2 Records 24:17, 18)

⁶ Learn from da bad choices Jehoash wen make. Afta Jehoiada wen mahke, Jehoash wen choose frenz who was no good. (Read um 2 Records 24:17, 18.) He wen choose fo lissen to da Judah leadas who neva love Jehovah. You probly tinking Jehoash shoulda stay away from dose scrubs. (Smart Guys 1:10) But he wen lissen to his fake frenz. Wen Jehoash’s cousin, Zekariah, wen try set him straight, Jehoash wen get his guys fo kill um. (2 Rec 24:20, 21; Mat 23:35) Dass so mess up an stupid! Jehoash wen start his life out good, but he wen turn into one apostate an one killa. Afta dat, his own guys wen kill him. (2 Rec 24:22-25) If he ony wen keep lissening to Jehovah an da guys who wen love Him, his life woulda turn out way diffren. Wat you can learn from wat wen happen to Jehoash?

7. Wat kine frenz you should choose? (Go look da picha.)

⁷ One ting we learn from da bad choice Jehoash wen make is we gotta choose frenz dat love Jehovah an like make Him happy. Dose kine frenz going help us do good tings. We no need ony be frenz with guys dass same age az us. Rememba dat Jehoiada was way olda den Jehoash wen dey was frenz. Look da frenz you get now an ask yoaself, “Dey help me make my faith in Jehovah moa strong? Dey help me live da way God like? Dey talk about Jehovah an da tings in da Bible? Dey no shame fo tell me if I doing someting wrong?” (Smart Guys 27:5, 6, 17) Straight up, if yoa frenz no love Jehovah, you no need um. If you get frenz who love Jehovah, no let um go, dey going always kokua you!—Smart Guys 13:20.

8. Wat you should tink about if you use social media?

⁸ Social media can be one good way fo stay in touch wit yoa ohana an frenz. But plenny peopo use um fo show off wen dey pos pichas an videos about da tings dey get an wat dey doing. If you get social media try ask yoaself, “I doing um fo show off to peopo? I like share someting good wit peopo, o I like make myself look good? I let da peopo who use um affeck da way I tink, talk, an ack in one bad way?” Braddah Nathan Knorr who was one of Jesus Luna Guys befoa wen tell dis, “No try fo make peopo happy. You going end up making nobody happy. Make Jehovah happy, an you going make all da guys who love Him happy too.”

GOTTA STAY HUMBO

9. How Jehovah wen help Uzziah? (2 Records 26:1-5)

⁹ Copy da good choices Uzziah wen make. Wen he was young, King Uzziah was humbo. He wen learn fo do wat Jehovah like. He wen mahke wen he was 68 years ol, an fo mos of his life Jehovah wen bless him. (Read um 2 Records 26:1-5.) Uzziah wen wipe out plenny of Israel’s enemies an he wen proteck Jerusalem real good. (2 Rec 26:6-15) Garans Uzziah was happy wit eryting Jehovah wen help him fo do.—Teacha 3:12, 13.

10. How tings had turn out fo Uzziah?

¹⁰ Learn from da bad choices Uzziah wen make. King Uzziah was use to telling erybody wat fo do. So maybe he wen tink he neva have fo lissen to anybody, even Jehovah. One day he wen do someting da kings no was suppose to do. He wen burn incense in da temple on top da incense altar. (2 Rec 26:16-18) Azariah da Main Pries Guy wen try set um straight, but Uzziah wen get all mad. Was some sad dat Uzziah neva stay faithful to Jehovah, an cuz of dat Jehovah wen give um leprosy. (2 Rec 26:19-21) His life woulda been way betta if he wen stay humbo!

11. Wat kine tings we can do fo show if we humbo o not? (Go look da picha.)

¹¹ Wen Uzziah wen get powa, he wen foget dat was Jehovah da one who wen give him da powa an da stuff he get. Wat us learn from dat? We gotta rememba dat all da good stuff we get come from Jehovah. Radda den acking all burot fo da stuff we do, we give Jehovah da props fo helping us fo do um.b (1 Cor 4:7) We gotta be humbo an realize dat cuz we not perfeck, sometimes we gotta catch cracks. One 60 year ol braddah wen write, “I wen learn fo no take myself too serious. Wen I catch cracks fo da dumb tings I do, I try fo do betta an give my bes to Jehovah.” Da trut is, wen we get plenny respeck fo Jehovah an be humbo, oua life going be way betta.—Smart Guys 22:4.

KEEP ON COMING MOA CLOSE TO JEHOVAH

12. Wen Josiah was young, how he wen look fo Jehovah? (2 Records 34:1-3)

¹² Copy da good choices Josiah wen make. Wen Josiah was 16 years ol, he started fo look fo Jehovah. He wanted fo learn about Jehovah an live how He wanted him fo live. But still yet, he was one young king. Dat time, plenny peopo was worshipping da fake kine gods, an wen take courage fo stand up agains dat. But he wen do um! Befoa he was 20 years ol, he started fo hemo da idol kine gods from da peopo.—Read um 2 Records 34:1-3.

13. Wat giving yoa life to Jehovah mean to you?

¹³ Even if you real young, you can choose fo copy Josiah an look fo Jehovah an find out wat kine God him. Wen you do dat, you going like give yoa life to him. How dat going affeck da way you live? Luke, who wen get baptize wen he was 14, wen tell, “From now on, I going make Jehovah da main ting in my life an try make him happy.” (Mar 12:30) Going be so unreal fo you if you like do da same ting!

14. How some young guys stay copy King Josiah?

¹⁴ Wat kine tings can make um hard fo serve Jehovah wen you young? Johan, who wen get baptize at 12, wen talk about da presha he wen get from da kids in school fo vape. Fo be strong enuff fo no give in to dat presha, Johan tell himself dat vaping can jam up his health an his frenship wit Jehovah. Rachel, who wen get baptize at 14, tell wat help her fo deal wit da preshas in school. She say, “I try fo look fo tings dat remind me about da Bible an Jehovah. Like in history class I tink about someting dat wen happen in da Bible, o one prophecy. An wen I talking story wit somebody, I try tink of one scripcha I can share wit dem.” Da tings you go thru maybe not da same like King Josiah, but still yet you can be akamai an loyal jalike him. Wen you hando presha wen you young, going get you ready fo all da odda hard stuff you gotta hando layta on.

15. Wat wen help Josiah stay faithful to Jehovah? (2 Records 34:14, 18-21)

¹⁵ Wen King Josiah was 26, he wen start fo fix up da temple. Wen dey was doing dat, dey wen “find da Book Wit Da Rules dat Da One In Charge wen tell Moses fo write.” Wen he wen hea wat it sed, ony fas he wen do wat it tell. (Read um 2 Records 34:14, 18-21.) You like read da Bible eryday? If you trying, how dat going? You keep track of da verses dat help you? Luke, da guy we wen talk about earlia, he write down all da good tings he wen find. Doing someting lidat going help you fo rememba verses an wat you can learn from um. Da moa you get fo know da Bible an love um, da moa you going like serve Jehovah. An jalike King Josiah, you going like do wat da Bible tell.

16. How come Josiah wen mess up big time, an wat we learn from dat?

¹⁶ Learn from da bad choice Josiah wen make. Wen Josiah was 39 years ol, he wen mess up an he wen mahke cuz of dat. Radda den checking wit Jehovah wat fo do, he wen trus himself. (2 Rec 35:20-25) Wat we can learn from dat? No matta how ol us o how long we been learning da Bible, we gotta keep looking fo Jehovah. Fo do dat, we gotta pray erytime fo know wat fo do, study da Bible, an lissen real good to advice from solid Christians. If we do dat, get less chance we going mess up, an we going be moa happy.—Jam 1:25.

YOUNG GUYS, YOA LIFE CAN BE ALL GOOD

17. Wat we can learn from da three kings of Judah?

¹⁷ Wen you young you get chance fo do all kine stuff. Wat wen happen to Jehoash, Uzziah, an Josiah show dat young guys can make good choices an live one way dat make Jehovah happy. Yeah, dass not automatic eryting going be good. But still yet, we can copy da good choices dese kings wen make, an no mess up like dey had. Den we can have one happy life.

18. Who else in da Bible we can learn from so oua life turn out good? (Go look da picha.)

¹⁸ Da Bible talk about odda young guys who wen come tight wit Jehovah, an cuz of dat, He was happy wit dem, an dea life wen turn out good. David was one of dem. Wen he was young he wen choose fo come God’s fren, an layta on came one king who was loyal. He wen mess up sometimes, but Jehovah wen look at him az faithful. (1 Ki 3:6; 9:4, 5; 14:8) If you study about David’s life, dat going help you serve Jehovah an stay faithful too. O you can learn about odda guys like Mark o Timoty. Dey wen start fo serve Jehovah wen dey was ony young an dey wen stay faithful to him. Jehovah was happy wit dem, an dea life wen turn out good.

19. How yoa life can turn out?

¹⁹ Wat you do now can affeck yoa life layta on. If you trus Jehovah an not yoaself, he going help you fo make akamai choices. (Smart Guys 20:24) You can be happy an live one good life. No foget dat wat you do fo Jehovah is worth plenny to him. No moa one betta way fo use yoa life den fo serve oua Faddah, Jehovah.