Why We Gotta Respeck Jehovah?

1-2. Wat Songs Fo God 25:14, NWT tell we gotta do if we like be tight wit Jehovah?

WAT you tink iz importan if you like stay good frens wit somebody? You probly goin say dat good frens gotta have love an aloha fo each odda an get each oddas back. You tink az importan fo have respeck fo each odda fo be good frens? Da main scripcha fo dis lesson tell, if we like be tight wit Jehovah we gotta “get plenny respeck” fo him.—Read um Songs Fo God 25:14, NWT.

² All us gotta keep up oua respeck fo Jehovah. Wat iz respeck fo Jehovah? How we can show um? An wat we can learn from Obadiah, Jehoiada, an Jehoash dat goin help us do um?

WAT DAT MEAN FO RESPECK GOD?

3. Wen we show respeck, how dat proteck us?

³ Respeck can keep us safe, can help us ack smart so we no get hurt. If we respeck da ocean, we no goin go out in da surf if da waves too big fo hando. O we not goin walk too close to da edge of one cliff so we no fall off. Same ting wit oua frens, if we get respeck fo da odda guy we no would say o do anytin mean fo hurt each odda.

4. Wat Satan like us tink about Jehovah?

⁴ Satan like us be sked of Jehovah. He like us tink wat Elifaz wen tell, dat Jehovah mad all da time an he like punish us an we no can make him happy. (Job 4:18, 19) Satan like us come so sked of Jehovah dat we no like serve him anymoa. We no need be sked of Jehovah lidat. If we get plenny respeck fo him da ony ting we goin be sked of iz doin anytin dat can hurt him.

5. Wat dat mean fo respeck God?

⁵ Somebody who respeck Jehovah love him an no like do nottin fo hurt him o jam anytin up wit him. Jesus all da time wen show God respeck. (Heb 5:7) Jesus no wuz sked of Jehovah. (Isa 11:2, 3) He had plenny respeck fo him an wanted fo lissen wat he tell. (John 14:21, 31) Jalike Jesus, we respeck Jehovah plenny cuz he get love an aloha, he smart, he always do da right ting, an he get all da powa. We know dat Jehovah get plenny love an aloha fo us an we can make him happy wen we lissen, o hurt him wen we no lissen.—Songs 78:41; Smart Guys 27:11.

LEARN FO RESPECK GOD

6. Wat one way we can learn fo respeck Jehovah? (Songs Fo God 34:11)

⁶ Wen we born we no moa respeck fo Jehovah yet, we gotta grow um. (Read um Songs Fo God 34:11.) One way fo do dat iz fo look good at da tings he wen make. If we see his smarts, his powa, an his aloha in da tings he make, oua respeck fo him goin grow moa big. (Rome 1:20) Dat wen happen to one sista named Adrienne. Cuz she wen see how akamai Jehovah iz in da tings he make, she know he ony do wass bes fo her. Cuz she wen tink hard about um, she wen figga she no like do nottin dat goin jam up her frenship wit him. Try take some time dis week fo look good at sometin Jehovah wen make. Den yoa love an respeck fo him goin grow too.—Songs 111:2, 3.

7. How praya help oua respeck fo Jehovah grow?

⁷ Anodda way fo grow oua respeck fo Jehovah iz by prayin to him all da time. Wen we pray to him we know him moa betta. Wen we aks him fo help us hando one problem, we see his powa. Wen we tank him fo givin us his Boy, we see his love fo us. An wen we aks him fo help us figga out one problem, we see how akamai him. Dose kine prayas make oua respeck fo Jehovah come moa big. Den we no goin like do nottin fo jam up oua frenship wit him.

8. Wat we can do fo keep oua respeck fo Jehovah strong?

⁸ We can keep oua respeck fo God strong wen we study da good an da bad exampos inside da Bible. We go talk about two guys who had plenny trus in Jehovah—Obadiah, da guy dat wen take kea King Ahab’s palace, an da Main Pries Guy Jehoiada. Den us go see wat we can learn from da Judah King Jehoash, who wen start off good but den wen bag from Jehovah.

BE JALIKE OBADIAH WHO NO WUZ SKED

9. How havin plenny respeck fo Jehovah help Obadiah? (1 Kings 18:3, 12)

⁹ Da firs time da Bible talk about Obadiahb it tell “he get awesome respeck fo Da One in Charge.” (Read um 1 Kings 18:3, 12.) How dat respeck wen help him? Da king wen trus him so much dat he wen put him in charge of his whole house. (Compare Nehemiah 7:2.) Cuz Obadiah had plenny respeck fo God, wuz unreal how he no wuz sked fo do wass right. He wen live same time az King Ahab who wuz “mo bad den all da odda king guys befo him.” (1 Ki 16:30) Ahab’s wife, Jezebel, wen hate Jehovah so much she neva like nobody worship him anymoa an wen even kill da guys dat talk fo God. (1 Ki 18:4) Fo real kine, no wuz easy fo Obadiah worship Jehovah durin dat time.

10. In wat unreal way Obadiah wen show he no wuz sked?

¹⁰ Wuz unreal how Obadiah wen show he no wuz sked. Da time Jezebel wuz huntin down da guys dat talk fo God fo kill um, Obadiah wen take 100 of dem an hide um inside two big cave an give dem bread an watta. (1 Ki 18:13, 14) If he wen get busted, garanz Obadiah would mahke. Fo shua Obadiah neva like mahke, but he wen love Jehovah an da guys dat worship him moa den he wen love himself.

11. How Jehovah’s peopo oua time jalike Obadiah? (Go look da picha.)

¹¹ Nowdays plenny of Jehovah’s peopo live wea oua work iz kapu. Dey respeck da govament but, jalike Obadiah, dey no goin let nottin stop dem from worshippin Jehovah. (Mat 22:21) Dey show dey get respeck fo God wen dey lissen wat he tell an not wat peopo tell dem fo do. (Jesus Guys 5:29) Dey do um even if dey gotta preach an meet togedda secret kine. (Mat 10:16, 28) Dey like make shua dea braddas an sistas get da spiritual kaukau dey need. In one place in Africa wea wuz kapu fo be one Witness befo, one bradda named Henri wen go voluntea fo make shua da braddas an sistas had da spiritual kaukau dey need. He tell, “Normally I hold back from doin dat kine stuff, but I know fo shua dat da respeck I get fo Jehovah wen help me fo no be sked.” You tink you could do dat o wat? If you get plenny respeck fo God, can.

BE JALIKE MAIN PRIES JEHOIADA AN STICK TIGHT TO GOD

12. How Main Pries Jehoiada an his wife show dey wen stick tight to Jehovah?

¹² Da Main Pries Guy Jehoiada had plenny respeck fo Jehovah. Dat wen help Jehoiada fo stick tight to Jehovah an help oddas fo no stop worshippin him. Dat time Ataliah wen go make herself da queen even tho she no wuz supposed to. Jalike her madda Jezebel, da peopo had plenny reason fo be sked of her. She wuz so pilau an wanted so much powa, she even wen go try kill her own gransons so dey no would come da king. (2 Rec 22:10, 11) Da Main Pries Guy Jehoiada an his wife Jehosheba wen save Jehoash who wuz one of dose kids. Dey wen hide him an take kea him. Dey wen help make shua da bloodline of kings in David’s ohana neva end. Jehoiada, he wen stick tight wit Jehovah an he no wuz sked of Ataliah.—Smart Guys 29:25.

13. Wen Jehoash wuz seven yea ol, how Jehoiada wen stick tight to Jehovah one moa time?

¹³ Wen Jehoash wuz seven yea ol, one moa time Jehoiada wen show dat he wen stick tight to Jehovah. He wen make one plan an if wen work, Jehoash wuz goin come da nex king in David’s bloodline like wuz supposed to. If da plan neva work, garanz Jehoiada wuz goin get killed. But Jehovah wen make um work out. Da princes an da Levites wen have Jehoiada’s back an dey wen make Jehoash king an kill Ataliah. (2 Rec 23:1-5, 11, 12, 15; 24:1) Jehoiada wen “make one strong promise” to Jehovah from him an da peopo dat dey wuz goin keep on bein Jehovah’s peopo. (2 Ki 11:17) He even wen put da security guards by da gates so nobody could go inside dat no stay clean.—2 Rec 23:19.

14. How Jehovah wen show plenny respeck to Jehoiada?

¹⁴ Jehovah wen tell befo, “da peopo dat show respeck fo me, I goin show respeck fo dem.” He wen fo real kine take kea Jehoiada. (1 Sam 2:30) He wen put his story inside da Bible so we can learn from um. (Rome 15:4) An wen Jehoiada wen mahke, he wen show um plenny respeck an “dey bury him wit da king guys inside Jerusalem, David big town, cuz he wen do good kine stuff inside Israel fo God an his Temple.”—2 Rec 24:15, 16.

15. Wat us can learn from Jehoiada’s story? (Go look da picha.)

¹⁵ Da story about Jehoiada can help all us fo grow oua respeck fo God. Eldas can copy Jehoiada by lookin fo ways fo proteck da hui. (Jesus Guys 20:28) Da olda ones can learn dat if dey make like Jehoiada, Jehovah can still yet use dem fo do wat he like. He no goin throw dem on da side. Younga guys can learn from how Jehovah wen treat Jehoiada an copy him an show respeck to da olda ones, speshly da guys who been workin fo Jehovah long time. (Smart Guys 16:31) An all us can learn from da princes an da Levites who had Jehoiada’s back wen we “lissen to da guys dass showin you da way fo go.”—Heb 13:17, NWT.

NO BE LIKE KING JEHOASH

16. How we know King Jehoash wuz one scrub?

¹⁶ Jehoiada wen help King Jehoash be one good guy. (2 Ki 12:2) So wen da king wuz young he wanted fo make Jehoiada happy. But afta Jehoiada wen mahke, Jehoash started fo lissen to da princes dat wen bag from Jehovah an wen go agains him. Wat wen happen? Da king an da peopo started fo pray to “da odda idol kine gods.” (2 Rec 24:4, 17, 18) Even if dat wen hurt Jehovah, he still yet wen sen da guys dat wen talk fo him fo try bring da peopo back but dey neva lissen. Dey neva even lissen to Zekariah da guy who wen talk fo God, who wuz da pries an Jehoiada’s boy. Den King Jehoash wen kill Zekariah, his own cuzin, even tho his family wuz da one wen save his life an help him plenny.—2 Rec 22:11; 24:19-22.

17. How wen turn out fo Jehoash?

¹⁷ Jehoash wen lose his respeck fo Jehovah an tings wuz ony down hill from dea. Dass jus wat Jehovah sed wuz goin happen to da guys who make like he nottin. (1 Sam 2:30) Even tho he had plenny army guys, one smalla army from Syria wen take dem out an hurt him real bad. Den his own palace guys even wen go kill da king cuz he wen kill Zekariah. Jehoash no wuz even good enuff fo be buried in “da places fo bury da king guys.”—2 Rec 24:23-25; Mat 23:35.

18. How can Jeremiah 17:7, 8 help us no be like Jehoash?

¹⁸ Wat us can learn from Jehoash? Once Jehoiada wen mahke an no wuz dea fo support Jehoash anymoa, Jehoash started fo lissen to da guys dat wen bag from Jehovah. He wuz jalike one tree dat no moa deep roots an fall down az soon da wind come cuz nottin dea fo hold him up. Dis show us dat fo have plenny respeck fo God we no can ony depend on oua ohana an oua braddas an sistas. Fo stay close to Jehovah, we gotta make oua love an respeck fo Jehovah strong. We do dat wen we study da Bible, tink hard about um, an pray.—Read um Jeremiah 17:7, 8; Col 2:6, 7.

19. Wat Jehovah aks us fo do?

¹⁹ Jehovah no really aks us fo do too much. All he aks us fo do iz wat he tell at Da Teacha 12:13, “Get choke respeck fo God, an do wat he tell you fo do, cuz az da kuleana fo erybody.” Wen we get plenny respeck fo God, we goin be able fo stick tight to him no matta wat goin happen in da future, jalike Obadiah an Jehoiada. Not goin have nottin dat goin hemo us from Jehovah.