STUDY 8

Use Word Pichas Dat Teach

Matthew 13:34, 35

MAIN TING: Make yoa teaching moa betta wit simpo word pichas dat yoa lissenas goin like hea an dat teach importan tings.

Pick simpo word pichas. Jalike Jesus, use small tings fo explain big tings, an easy tings fo explain hahd tings. No put stuff dat no need, dat ony goin make um hahd fo undastan. Make shua dat da tings in yoa word picha fit wat you trying fo teach so dat no throw off yoa lissenas.

Look aroun. Check out da tings dat stay goin on aroun you, study Christian publications, an lissen to peopo who real good at teaching. Wen you do dat, try see if get word pichas you can use fo make yoa teaching betta. Write um down an save um someplace fo layta.
Tink about who you talking to. Pick word pichas dat get tings yoa lissenas like. Watch out dat yoa word picha no goin make yoa lissenas shame or huhu.
Teach da main point. Use word pichas fo teach da main points, not da mynah stuff. Make shua yoa lissena goin rememba da point you trying fo teach an not jus da word picha.