STUDY 7

Teach Wat Stay Correck An Help Peopo Believe Um

Luke 1:3

MAIN TING: Use info dat you can trus fo help yoa lissenas figga out wat stay tru.

Use info from places you can trus. Make shua wat you tell come from da Bible, an read from um wen can. If you share one science fact, someting from da news, one life story, or odda info dat back up wat you talking about, check dat yoa info stay correck befoa you use um.
Use da info da right way. Explain da scripchas da way da Bible writa wen mean um, in one way dat match up wit da Bible’s message, an dat line up wit wat “da akamai worka guy da boss trus” write. (Mat 24:45) If you use odda kine info, no change um. Make shua you use da info da way da writa wen mean um.

No exaggerate da info or numbas. Watch out dat “some peopo” no turn into “mos peopo,” “sometimes” no come “erytime,” an “maybe” no turn into “garantee.”
Help dem undastan an tink about da info. Afta you read one scripcha or share some info, ask good kine questions, or give yoa lissena one exampo fo help dem get da point an make up dea own mind about wat fo believe.