How Da Meetings Of Witnesses Fo Jehovah Can Help You?

Anybody wen eva ask you fo come one meeting fo Witnesses Fo Jehovah? If you neva go yet, maybe you feel small kine sked, yeah? Maybe you tink: ‘Wat dey do ova dea? How come az importan? How come dey like me go?’ In dis lesson, you goin learn how meeting wit odda peopo can help you in yoa life an fo come moa close to God.

1. How come da Witnesses Fo Jehovah meet togedda?

One of da guys who wen write da Bible wen tell wat is da mos importan reason fo meeting wit odda peopo: “An ova hea, wea all God peopo come togedda, I goin tell, ‘Da One In Charge, he do real good tings fo me!’” (Songs Fo God 26:12) Same same jalike how was back den, Witnesses Fo Jehovah feel real good inside wen dey come togedda. All ova da world dey meet ery week fo sing, pray, an tell good tings about God. Get odda times ery year dey come togedda fo big kine meetings.

2. Wat you goin learn at oua meetings?

At da meetings, we learn from da Bible, an we “tell wat eryting mean.” (Read um Nehemiah 8:8.) Wen you come meeting, you goin learn about Jehovah an wat kine person he stay. You goin come moa tight wit God wen you find out how much love an aloha he get fo you. Plus too, you goin see how he can help you fo live da bes life eva.​—Isaiah 48:17, 18.

3. How da peopo you meet an talk wit at oua meetings can help you?

Jehovah tell us “tink bout how fo help each odda do all kine good kine stuff an show peopo choke love an aloha. No stop come togedda fo meet each odda.” (Fo Da Hebrew Peopo 10:24, 25) At oua meetings, you goin get fo know peopo who kea fo real kine about each odda, an same same jalike you, dey like learn moa about God. You goin hear dem talk story about da good kine tings dey wen find inside da Bible. (Read um Fo Da Rome Peopo 1:11, 12.) You goin talk to odda peopo who stay good inside even tho dey get pilikia dey trying fo hando. Ho, ony good, aah, fo come to da meetings ery time! No wonda Jehovah like us fo do um!

DIG MOA DEEP

4. Meetings of Witnesses Fo Jehovah

Back in da firs century, Jesus’ guys erytime wen come togedda fo worship Jehovah. (Fo Da Rome Peopo 16:3-5) Read um Fo Da Colosse Peopo 3:16, an den talk story about da question afta.

• How Jesus’ guys from befoa time wen worship Jehovah?

VIDEO: Wat We Do At Oua Meeting Place? (2:12)

• Wat you wen see dat was same same in wat happen at oua meeting place an wat tell at Fo Da Colosse Peopo 3:16?

• From wat you wen see in da video, get anyting else about da meetings you like?

Read um 2 Fo Da Corint Peopo 9:7, an den talk story about da question afta:

• How come da Witnesses Fo Jehovah no ask you fo money wen you go to da meetings?

Togedda wit yoa teacha, try look at wat we goin talk about at one of da meetings dis week.

• Wat part of da meeting you tink goin help you da mos?

You wen know?

On jw.org, can help you find one meeting fo go to no matta wea you stay in da world.

1. At oua meetings get talks, exampos on how fo preach, an videos. Get song an prayer fo start an pau da meeting

2. In parts of da meeting, peopo goin have chance fo ansa if dey like

3. No matta if you young o old, you get one big ohana o az ony you, erybody can come

4. Is free oua meetings. Witnesses Fo Jehovah not goin ask you fo money fo come oua meetings

5. Gotta make one plan fo go meeting

Try look wat Jesus an his ohana wen do. Ery year, dey had fo walk 60 miles thru da mountains between Nazaret an Jerusalem fo go to da temple. Read um Luke 2:39-42, an den talk story about dese questions:

• You tink was hard fo dem go Jerusalem?

• How come you might have to try hard fo go to da meeting?

• You tink az worth it o wat? How come?

• How come az good fo go meetings erytime?

WAT WE WEN TALK ABOUT

Goin meetings goin help you fo learn moa about Jehovah, fo come moa tight wit him an fo worship him wit odda peopo.

Wat You Wen Learn

• How come Jehovah like us fo come togedda?

• Wat kine tings you goin learn at meetings fo Witnesses Fo Jehovah?

• Wat odda kine ways you tink goin meetings can help you?

LEARN SOME MOA

Wat if you stay small kine sked about goin to one meeting? Try look how one braddah who wen feel lidat wen come fo love da meeting.

We Neva Goin Foget How Dey Wen Greet Us (4:16)

See how one young braddah wen have good fun at da meetings an wat he had fo do fo keep goin.

I Liked the Meetings So Much! (4:33)

Try see how odda guys feel about goin to da meetings.

“How Come Go Oua Meeting Place?” (Web article)

Find out how one violent gang memba’s life wen change afta he wen go one meeting fo Witnesses Fo Jehovah.

“All Da Time I Had My Gun” (Da Place Fo Watch From, July 1, 2014)