One younga guy spock peopo walkin into one Meetin Place

YOUNGA GUYS LIKE KNOW

How Come Go Oua Meetin Place?

Two days ery week, Witnesses Fo Jehovah get togedda at dea Meetin Place fo go worship God. Wat stay happen ova dea? An how come iz good fo you if you come?

Wat stay happenin at da Meetin Place?

Da Meetin Place iz wea you can learn good kine stuff from da Bible dat goin kokua you fo:

learn da trut about God.
know how come tings stay happenin nowdays.
make you one betta person.
get fo real kine frens.

You wen know? Da place we meet stay called one Meetin Place fo Witnesses Fo Jehovah cuz dass wea we meet togedda fo talk plenny about God’s Govament.—Matthew 6:9, 10; 24:14; Luke 4:43.

How come good fo you go?

Da stuff you learn goin help you. Da Bible truts dey talk about at da meetins fo Witnesses Fo Jehovah goin help you fo get da smarts fo know wat fo do. (Wat Da Smart Guys Tell 4:5) Dat mean da Bible goin help you fo be akamai wit wat you choose fo do wit yoa life. An ansa big kine questions like:

Dis one sampo of wat some of da talks stay called at oua weekend meetins:

How Come Iz Good Fo Follow Wat Da Bible Tell?
Wen You Havin Hard Time Wea You Can Get Help?
Wat God’s Govament Doin Fo Us Now?

‘One guy I know from school had come meetin. He wen sit by us an we wen share oua books wit him. An afta wuz pau, he said he wen really like wat peopo wen say in da meetin. He wen tell dat at his church dey no moa study stuffs like us.’—Brenda.

You wen know? Stay free fo come to da Meetin Place an no need pay nottin.

Hangin out wit us goin make you feel good. Da Bible tell at Fo Da Hebrew Peopo 10:24, 25 fo “no stop come togedda…[an] give each odda good kine words.” An dass why us guys meet togedda. Nowdays you see peopo dat ony kea about demselves but ova hea at oua meetins, get peopo dat kea about God an oddas. An dat goin make you feel good inside.

‘Afta one junk day, I feel all buss up an wipe out. But wen I go to da Meetin Place, da peopo always make me feel betta. Wen iz pau, I always feel good inside an ready fo hando anodda day.’—Elisa.

You wen know? Get moa den 120,000 congregations of Witnesses Fo Jehovah all ova da eart an dey stay meetin at ova 60,000 diffren places. Ery year, dey build about 1,500 new Meetin Places cuz get so much guys dat like come to da meetins.a

Wat odda younga guys tell

‘Wen I wuz younga, my fren from high school wen come to da meetin wit me an she wuz blown away by how many peopo wuz learnin da Bible. From keiki to kupuna. Short time ago, my boss came an he no could believe how much we wen use da Bible. Seein how stoked he wuz, wen make me like go to da meetin even moa.’—Jessica.

‘I know da meetins help me hando wateva come up in da day an da worries I get. Afta meetin iz pau, I always feel betta an know I can keep on goin. Ova dea, we learn how fo live one good life, how fo be one even moa betta person, an plenny odda stuffs lidat.’—Timothy.

‘One unco I wen aks fo come to da meetin wen tell me afta ‘I jus wen come fo prove dat wat you guys wen believe no wuz right. Come fo find out, all da stuff I wen believe wuz wrong!’ He wuz shocked fo see how nice da Witnesses wuz. He wen tell: ‘Even tho i jus wen meet you guys right now, you guys wen make me feel like part of da ohana.’’—Jacob.

‘Plenny times I thought ‘Soon az meetin pau, I jus goin bag.’ But durin meetin I foget about um an den afta meetin I stay talkin story wit da peopo an I no rememba how come I felt like jus leavin right afta. If I neva go meetins, I wouldn’t have dese fo real kine frens like da ones I get right now.’—Madison.

a Fo find one Meetin Place close by, go check out da “Meetin Place Fo Witnesses Fo Jehovah” page an try click on “Check Out One Place Close By You.”