Keep Um Simpo

Wat Jesus Wen Do

VIDEO: Jesus Show How Oua Faddah Kea Fo Us

1. Watch um da VIDEO, o read um Matthew 6:25-27. Den tink about da questions:

1. How Jesus wen show dat Jehovah kea fo us?

2. Even tho Jesus wen know plenny tings about da birds, wat one simpo ting he wen talk about? Why was dat one good way fo teach?

Wat We Learn From Jesus?

2. Wen da way we teach is simpo, peopo going rememba wat dey wen learn, an going touch dea hearts.

Copy Jesus

3. No talk too much. Instead of telling all you know about someting, stick to wat stay in da lesson. Afta you ask da question, try wait an give yoa learna one chance fo ansa. If dey donno da ansa, o say someting dat no match wit wat da Bible tell, try ask dem moa questions so dey can figga um out. Once dey get um, jus move on.

4. Help da learna conneck da new stuff he learning wit wat he awready know. Fo exampo, befoa you go ova da lessons about da chance fo come back to life, go ova fas kine wat dey awready wen learn about wat happen wen you mahke.

5. Watch how you use stories fo teach. Befoa you tell one story, try tink:

1. ‘Is my story simpo?’

2. ‘Da learna going undastand um?’

3. ‘Going help da learna rememba da main poin ​—not jus da story?’