Help Yoa Bible Study Fo Serve Jehovah

1-2. (a) How come some Bible studies hold back from serving Jehovah? (b) Wat we goin talk about in dis lesson?

YOU rememba worrying about coming one Witness Fo Jehovah? Maybe you wuz sked dat yoa frenz, family, or da guys you work wit would be mad wit you. Or maybe you wen feel like would be too hahd fo live da way God like. If dass da case, you can undastan how come some Bible studies hold back from coming one Witness Fo Jehovah.

² Jesus had kno dat dose kine feelings can stop somebody from serving Jehovah. (Mat 13:20-22) But he neva give up on da guys who wen hold back. He wen help dem fo (1) figga out wat stay holding dem back from serving Jehovah, (2) do moa fo serve Jehovah, (3) put Jehovah firs, an (4) kno wat fo do wen oddas give dem hahd time. How we can copy da way Jesus wen teach wen we use da You Can Live Good Foeva! book fo help one Bible study serve Jehovah?

HELP YOA STUDY FIGGA OUT WAT HOLDING HIM BACK

3. Wat wen make um hahd fo Nicodemus follow Jesus?

³ Nicodemus wuz one importan rula fo da Jews. But someting wuz holding um back from choosing fo follow Jesus. Jesus wuz ony preaching fo six monts wen Nicodemus wen see dat God wen sen him. (John 3:1, 2) But cuz Nicodemus wuz “sked a da Jew leada guys,” he wanted fo talk to Jesus nite time. (John 7:13; 12:42) An maybe he wen tink he had plenny fo lose if he wen follow Jesus.a

4. How Jesus wen help Nicodemus undastan wat God wanted him fo do?

⁴ Nicodemus knew da rules dat God gave da Israel peopo real good, but he neva undastan wat Jehovah wanted him fo do. How Jesus wen help um? Jesus wen spen time wit him, even talking wit him nite time. An Jesus wen make um clear to Nicodemus wat he had fo do fo come one followa of him. He had fo come sorry fo his sins, get baptize in da watta, an show fait in God’s Boy.​—John 3:5, 14-21.

5. How we can help one Bible study figga out wat holding him back?

⁵ Even if one Bible study undastan da scripchas pretty good, maybe we still gotta help um figga out wat stay holding um back from serving Jehovah. Could be his job taking too much of his time, or his family no like him come one Witness Fo Jehovah. Jus like Jesus, make time fo him. Maybe you can go someplace wit him an jus talk story. Dat might make um moa easy fo him open up about wat stay holding um back. Den help him fo see dat da changes he make should be fo make Jehovah happy, an not you.

6. How you can help one Bible study be confident dat he can make changes? (1 Fo Da Corint Peopo 16:13)

⁶ Wen yoa Bible study kno Jehovah goin help him do wass right, he goin be strong enuff fo make changes. (Read um 1 Fo Da Corint Peopo 16:13.) One Bible teacha can be like one skool teacha. One good skool teacha no ony teach stuff, but he help build up yoa confidence in wat you can do. Same lidat, one good Bible teacha no ony teach his study wat God like him do, but he help build up his confidence dat wit Jehovah’s help, he can make changes. How you can be one good teacha?

HELP YOA BIBLE STUDY LOVE JEHOVAH MOA

7. How Jesus wen help peopo love Jehovah moa?

⁷ Jesus wen kno dat if his followas wen love Jehovah, dey wuz goin like do wat dey wuz learning. Dass how come he wen teach dem stuff dat would help dem love Jehovah moa. Like da time wen he had say dat Jehovah iz like one faddah who give good tings to his kids. (Mat 7:9-11, NWT.) Some of da guys dat wen lissen to Jesus maybe neva have one faddah dat wen show dem love. Try tink about how dey musta feel wen Jesus wen tell da story about one loving faddah who wen take back his boy who wen do plenny bad tings. Jesus wen help peopo see dat Jehovah really love dem an like help dem.​—Luk 15:20-24.

8. How you can help one Bible study love Jehovah moa?

⁸ You can help yoa Bible study love Jehovah moa by always talking about his qualities. Erytime you study, help um fo conneck wat he stay learning wit how Jehovah help us. Like wen you talk about Jehovah giving his Boy fo us, help yoa study fo undastan dat Jehovah neva ony do dis fo erybody, but fo him. (Rome 5:8; 1 John 4:10) Wen yoa Bible study undastan how much Jehovah love him, dat goin help him love Jehovah moa.​—Gal 2:20, NWT.

9. Wat wen help Michael change his life?

⁹ Try look wat wen happen to dis guy Michael from Indonesia. He wen grow up in da trut but neva get baptize. Wen he wuz 18, he wen go work in anodda country az one truck driva. Layta he wen get married in Indonesia. But he still wen work in anodda country far away from his family. While he wuz gone, his wife an girl started fo study da Bible an wen make changes in dea life. Afta his maddah wen mahke, he wen go home fo take kea his faddah an wen start fo study da Bible too. Wen he wuz goin ova da “Dig Moa Deep” paht in lesson 27 in da You Can Live Good Foeva! book, someting wen touch his heart. Wen he wen tink about how sad Jehovah musta felt fo see his Boy suffa, Michael wen start fo cry. He wen see how much Jehovah an Jesus wen love him an he wuz supa tankful. Cuz of dat he wen make changes in his life an get baptize.

HELP YOA STUDY PUT JEHOVAH FIRS

10. How Jesus wen help his followas put da preaching firs? (Luke 5:5-11, NWT.) (Go look da picha.)

¹⁰ Some of da guys Jesus wen preach to wen kno right away dat he wuz da Messiah, but dey needed help fo make da preaching numba one in dea life. Peter an Andrew wuz wit Jesus fo a while awready wen he wen ask dem fo follow him full time. (Mat 4:18, 19) At da time, dey had one fishing bizness dat wuz doin really good an James an John wuz dea pahtnas. (Mar 1:16-20) Wen Peter an Andrew had “leave dea nets” fo go wit Jesus, garanz dey wen make plans fo provide fo dea family. Wat wen help dem make preaching moa importan den money? Jesus wen do one miracle fo show dem dat Jehovah wuz goin take kea dem no matta wat happen, if dey put him firs.​—Read um Luke 5:5-11, NWT.

11. Wat we can tell one study fo make his fait moa strong?

¹¹ We no can do miracles like Jesus but we can share how Jehovah wen help da guys who put Him firs in dea life. Like you rememba how Jehovah had help you wen you firs wuz goin meetings? Maybe you had fo talk to yoa boss an tell um why you no can work ovatime if wuz goin make you miss meetings. Tell yoa Bible study about all da times you wen see Jehovah take kea you cuz you wen put him firs, an how dat wen make yoa fait moa strong.

12. (a) Why iz good fo invite diffren braddahs an sistahs to one Bible study? (b) Wat else you can do fo help yoa study put Jehovah firs?

¹² Goin be good fo yoa study if dey see how odda guys wen make changes fo put Jehovah firs in dea life. Invite diffren braddahs an sistahs to yoa Bible study. An ask dem how dey wen come into da trut an wat kine changes dey wen make fo put Jehovah firs in dea life. On top of dat, take time wit yoa Bible study fo watch da videos in da “Dig Moa Deep” an “Learn Some Moa” pahts of da You Can Live Good Foeva! book. Like wen you go ova lesson 37, you can watch da video Jehovah Goin Take Kea Wat We Need, an den go ova da main Bible points from dat video.

HELP YOA STUDY KNO WAT FO DO WEN ODDAS GIVE DEM HAHD TIME

13. How Jesus wen get his followas ready fo wen oddas give dem hahd time?

¹³ Jesus wen tell his followas dat dey wuz goin get hahd time, even from dea ohana. (Mat 5:11, NWT; 10:22, 36) Befoa Jesus wen mahke, he wen tell his followas dat dey might mahke too. (Mat 24:9; John 15:20; 16:2) He wen tell dem fo be keaful, watch wat dey say an do, an no argue wit da guys dat go agains dem, so dat dey could keep preaching.

14. How we can help one study be ready fo catch cracks? (2 Fo Timoty 3:12)

¹⁴ We can copy Jesus an tell one Bible study dat he might catch cracks from da guys he work wit, his frenz, an his family cuz he studying da Bible. (Read um 2 Fo Timoty 3:12.) Some of da guys he work wit might make fun of him cuz he trying fo change da way he live. An oddas, even his ohana, might not agree wit wat he stay learning. Iz good fo talk about dis wit oua Bible studies right away so dat wen da ting happen it no catch um off guard an dey goin kno wat fo do.

15. Wat can help one Bible study hando wen his family giving him hahd time?

¹⁵ If yoa study’s family giving um hahd time, help him fo tink about why his family mad dat he studying da Bible. Maybe his family tink dat he getting brain washed cuz dey wen hea bad stuff about Witnesses Fo Jehovah. Even some of Jesus family wen tink he wuz goin pupule. (Mar 3:21; John 7:5) Teach yoa study fo be patient an talk nice to his family an oddas.

16. How we can help one Bible study fo share wat he learning in one nice way?

¹⁶ Even if somebody in da study’s family like kno moa about wat he learning, would be smart if he no tell da family memba eryting all one time. Oddawise dey goin feel like dass too much, an dey not goin like talk story about um again. Tell yoa Bible study fo share jus enuff so dey goin like kno moa layta on. (Col 4:6) Or maybe he can tell da family fo check out jw.org so dey can read about Witnesses Fo Jehovah weneva dey like, an az much az dey like.

17. How you can help yoa study ansa questions about Witnesses Fo Jehovah? (Go look da picha.)

¹⁷ Maybe you can try use “Questions Plenny Peopo Ask” on jw.org fo help yoa Bible study kno wat fo say if somebody ask him about wat he believe. (2 Tim 2:24, 25, NWT.) At da end of ery lesson, no foget use da “Wat Some Peopo Tell” paht of da You Can Live Good Foeva! book. Practice wit yoa Bible study so he can ansa dem in his own words. No hold back fo help him find one betta way fo tell wat he believe. All dis goin help him stan up fo his fait.

18. How you can help yoa study fo preach wit da hui? (Matthew 10:27)

¹⁸ Jesus wen tell his followas dey had fo go preach. (Read um Matthew 10:27.) Wen one study start fo preach wit da hui, he goin see Jehovah help him an he goin learn fo trus him moa. How you can help yoa Bible study like do dis? If one campaign stay coming up, help yoa study fo see wat he gotta do fo come one publisha. Tell him dass da easiest way fo start preaching. Tell him anodda ting he can do iz start giving talks at da middo of da week meetings. Cuz dat goin help him build moa confidence fo share da stuff dat he believe.

SHOW YOA BIBLE STUDY YOU BELIEVE IN HIM

19. How Jesus wen show he believe in his followas, an how us can copy him?

¹⁹ Befoa Jesus wen go back heaven, he wen tell his followas dey wuz goin be togedda again wit him. Dey neva undastan dat Jesus wuz talking about dem goin heaven. He knew dey needed time fo undastan some tings, like goin heaven, but he neva focus on dat. He wen show dem dat he knew dey wanted fo make Jehovah happy. (John 14:1-5, 8; 16:12) Like Jesus, good fo show oua study dat we kno he like make Jehovah happy too.

20. How one sistah neva stop believing in her study?

²⁰ No stop believing yoa Bible study like do da right ting. Try look wat wen happen to one sistah named Chifundo in Malawi. She wen start studying da Bible wit one young Catholic wahine named Alinafe in da You Can Live Good Foeva! book. Wen dey wuz pau wit lesson 14, Chifundo wen ask da study wat she thought about using idol kine stuff. Alinafe wen get all mad an she wen say, “Eh dass my choice!” Chifundo wen tink dat Alinafe wuz goin stop da study. But she neva. Dey wen keep studying an Chifundo wen hope dat Alinafe would get da point wen come to idols. Some monts afta dat wen dey wuz in lesson 34, Chifundo wen ask her how studying da Bible an learning about Jehovah wen help her so far. Alinafe wen say dat she wen learn plenny good tings an dat Witnesses Fo Jehovah no do anyting dat da Bible say iz wrong. Litto while afta dat, Alinafe wen stop using idols an wen get baptize.

21. How we can help one study make da choice fo serve Jehovah?

²¹ We kno dat Jehovah iz da main one dat help one Bible study fo serve Him, but we get one paht too. (1 Cor 3:7) We no jus teach him wat Jehovah like him do, but we help him love Jehovah moa. We help him fo show his love fo Jehovah by putting Him firs in his life. We teach him dat Jehovah goin help him wen oddas give him hahd time. Wen we show oua Bible study dat we believe dat he like make Jehovah happy, dat goin give him da strength fo keep serving Jehovah.