Help Da “Peopo Dat Get Da Right Kine Attitude”

1. How peopo might reack wen we preach to dem? (Jesus Guys 13:47, 48; 16:14, 15, NWT.)

PLENNY peopo in da firs century wuz happy wen dey firs wen learn da trut an fas dey wanted fo come Christians. (Read um Jesus Guys 13:47, 48; 16:14, 15, NWT.) Same ting today, some peopo come real happy wen dey hea fo da firs time da good kine tings. Den get some guys who no stay interested at firs but layta on dey like learn about Jehovah. Wat we should do wen we find “peopo dat get da right kine attitude” an like learn about da Bible?

2. How oua preaching work stay like da work somebody do in one garden?

² Wen we go preach, dass jalike da work somebody do in one garden. If da fruit stay ripe, he goin pick um, even tho he still taking kea da res of da garden dass not ready yet. Same ting, if we find somebody who like learn about da trut, we goin help um right away. But same time, fo da guys who not ready fo learn da trut, we goin keep trying fo help dem see why iz good fo dem learn about God an da Bible. (John 4:35, 36) We gotta learn how fo tell if somebody stay ready or not an wat we gotta do fo help dem. We goin learn about wat we can do fo help da guys who stay ready from da firs time we talk story wit dem. Anodda ting we goin talk about iz how fo help dose guys keep coming moa close to Jehovah an come one of his followas.

HOW FO HELP PEOPO WHO READY FO LEARN DA TRUT

3. Wat we should do if we find peopo dat like learn about Jehovah? (1 Fo Da Corint Peopo 9:26)

³ Wen we find peopo who like learn about Jehovah an da Bible, right den an dea we goin help dem. From da firs time we talk story wit dem, we not goin hold back from asking dem if dey like study or come to da meetings.​—Read um 1 Fo Da Corint Peopo 9:26.

4. Try tell wat wen happen to somebody who wuz ready fo study right away.

⁴ Ask if dey like study. Some peopo ready fo study right away. Like on one Thursday, one young wahine in Canada wen go up to da literature cart an had grab da You Can Live Good Foeva! brochure. Da sistah at da cart wen tell her dat it come wit one free Bible study. Da wahine wanted fo study so dey wen give each odda dea phone numbas. Layta dat day, da wahine wen text da sistah about wen dey goin study. Da sistah had tell she can come on da weekend. But da wahine wen ask, “You no can come tomorrow? I free.” Da nex day, on Friday, dey wen study. Da wahine had go her firs meeting dat weekend an still yet stay learning about Jehovah.

5. Wat we can do if we see somebody dass not ready fo study da Bible? (Go look da pichas.)

⁵ Not erybody goin be like dat young wahine an goin like study right away. Some guys need moa time. Maybe at firs we gotta talk story about stuff dey stay interested in. Still yet, if we no give up an we keep showing dem we kea, maybe afta a litto while dey goin like study. How we can ask peopo if dey like study? We wen ask dat question to some braddahs an sistahs dass good at starting Bible studies.

6. Wat we can say fo help somebody see dat studying da Bible iz good fo dem?

⁶ Da braddahs an sistahs wen tell dat iz moa betta fo no use words like “Bible study,” or “teach you” wen talking about how one Bible study work. But wat dey wen say dat work moa betta iz if you say words like “talk story,” an “learn da Bible.” Fo help da person like talk story wit you again, you could tell dem, “Goin blow yoa mind how da Bible ansa big kine questions you might get,” or “Da Bible iz not jus one religious book but it help us in eryday kine tings.” Den you can tell dem, “You can learn someting good in jus coupo minutes.” You no need say words like “regula,” or “ery week,” cuz dat could presha dem fo feel like dey gotta keep meeting wit you.

7. Wen some had figga dey wuz hearing da trut? (1 Fo Da Corint Peopo 14:23-25)

⁷ Ask dem fo come to one meeting. Back in da aposal Paul’s day, some guys wen figga dey wuz hearing da trut wen dey had come to dea firs meeting. (Read um 1 Fo Da Corint Peopo 14:23-25.) Same ting today, plenny come moa close to Jehovah moa fas wen dey come meetings. Wen you should ask dem fo come? In lesson 10 of da You Can Live Good Foeva! book, get one invite. But you no need wait till den. From da firs time you talk story wit dem, you can ask dem fo come to da weekend meeting. Maybe you can tell dem wat da Bible Talk Fo Erybody goin be about or someting from dat week’s Da Place Fo Watch From study.

8. Wat tings we can tell somebody about oua meetings wen we ask dem fo come? (Isaiah 54:13)

⁸ Wen you ask somebody fo come oua meeting, good fo tell um how we diffren from odda churches. Wen one study had come to Da Place Fo Watch From study fo da firs time, she had ask her teacha, “Da guy on stage, he kno erybody’s name or wat?” Da sistah wen tell dat all us like kno da names of erybody in da hui, jalike we kno da names of all oua ohana. Dis wuz someting diffren fo da study cuz mos peopo neva kno each oddas name at her church. Anodda ting dass diffren fo plenny peopo iz why we meet togedda. (Read um Isaiah 54:13.) We come togedda fo worship Jehovah, learn from Him, an build each odda up. (Heb 2:12; 10:24, 25) Dass how come oua meetings iz set up fo help us learn an not jus fo follow traditions. (1 Cor 14:40) Dey wen make da Kingdom Hall so dat we can pay attention real good. An cuz we no take sides, we no talk politics or argue wit each odda. Would be good fo show da study da video Wat We Do at Our Meeting Place? befoa dey come to meeting so dey kno wat goin be like.

9-10. Wat we can tell somebody so dey not sked fo come meeting? (Go look da picha.)

⁹ Some guys sked fo go meeting cuz dey tink if dey go, dey gotta come one Witness Fo Jehovah. Let um kno dat dey can jus come an lissen an no moa presha fo say or do anyting. We like da whole family come, even da young kids. Erybody goin sit togedda, an learn da same ting. Da parents kno dea kids stay safe cuz dey wit dem. (Rules 31:12) At da meetings we no colleck money cuz we had learn da trut fo free, so we teach da trut fo free. (Mat 10:8) An can tell dem dat dey no need clothes dat cost plenny money fo come, cuz God look at wat stay on da inside not how one person look on da outside.​—1 Sam 16:7.

¹⁰ If one person come meeting, make dem feel comfortable. Introduce dem to erybody. If you make him feel at home, he goin like come back. Wen da meeting start, you can show him how fo look up da scripchas an follow along.

WAT FO DO WEN YOU START ONE STUDY

11. How you can show you respeck yoa Bible study’s time?

¹¹ Wat we gotta rememba wen we studying wit somebody? Respeck dea time. Like if you wen set up one time fo meet up, rememba we no stay on Hawaiian time, so no be late. On top of dat, maybe iz good fo keep da firs study short. Some guys who wen study da Bible wit plenny peopo wen say fo cut um short, even tho dey like hea some moa. No talk too much an give um chance fo talk an tell how he feel.​—Smart Guys 10:19.

12. Wat iz oua goal from da start of one Bible study?

¹² From da firs study, yoa goal iz fo help yoa study get fo kno Jehovah an Jesus, an love dem. We can do dat by focusing on da Bible an not ouaself an da stuff we kno. (Jesus Guys 10:25, 26) Da aposal Paul wuz one good exampo. Wen he had teach peopo, he wen focus on Jesus, da one Jehovah wen sen fo help peopo learn from. (1 Cor 2:1, 2) Anodda ting Paul wen do wuz, make clear how importan it iz to help new Christians work on getting good qualities dat he wen tell iz wort plenny. (1 Cor 3:11-15) Qualities like fait, da smarts fo kno wat fo do, learning how fo undastan stuff, an respeck fo Jehovah. (Songs 19:9, 10; Smart Guys 3:13-15; 1 Pet 1:7) So copy da way Paul wen teach by helping yoa study build up dea fait an dea frenship wit Jehovah.​—2 Cor 1:24.

13. How we can be patient an no expeck too much from oua study? (2 Fo Da Corint Peopo 10:4, 5) (Go look da picha.)

¹³ Copy da way Jesus wen teach by bein patient an no expeck too much from dem. No ask questions dat goin make dem feel shame. If get someting dat iz hahd fo dem undastan, jus move on an you can go back to um layta. No force um fo believe someting if he not ready. But give him time fo tink about um an change his tinking. (John 16:12; Col 2:6, 7) Not goin be easy fo somebody stop believing someting he wen believe long time. (Read um 2 Fo Da Corint Peopo 10:4, 5) So firs we gotta help dem build one strong frenship wit Jehovah, den it goin be moa easy fo dem let go da stuff dey use to believe.​—Songs 91:9.

HOW FO HELP NEW GUYS WHO GO MEETINGS

14. How we should treat new guys dat come oua meetings?

¹⁴ Jehovah expeck us fo treat erybody da same no matta wea dey come from, how much money dey get, or dea culture. (Jam 2:1-4, 9) So how we can show love to da new guys who come oua meetings?

15-16. How we can help new guys feel comfortable at oua meetings?

¹⁵ Some peopo come oua meetings jus fo check um out or cuz somebody had tell dem fo go. Wen you see somebody new at da meeting, go talk to dem. Be friendly, but no be too much. Ask dem fo sit wit you an share yoa Bible an odda stuff we studying wit dem. Help dem fo feel comfortable. One guy who had go to da meeting wen tell one braddah ova dea dat he wuz shame cuz of his clothes. Da braddah wen tell him fo no worry cuz da Witnesses iz jus regula peopo. Layta on da guy wen get baptize, but he neva had foget wat da braddah wen tell him. One ting fo rememba, wen new guys come to da meeting, show you kea but no be niele.​—1 Pet 4:15.

¹⁶ We can make new guys feel comfortable by showing respeck in da tings dat we say about guys who iz not Witnesses an da stuff dey believe. Wen talking story, giving ansas, or doin pahts, we no like say anyting fo trip peopo up or dog wat dey believe, cuz den dey not goin like come back. (2 Cor. 6:3; Titus 2:8; 3:2) Wen come to dis, da braddah dat give Da Bible Talk Fo Erybody gotta really be keaful. He should make shua he use words dat goin make um easy fo da guys dass not Witnesses fo undastan.

17. Wass oua goal wen we find da “peopo dat get da right kine attitude”?

¹⁷ Eryday, iz getting moa importan fo help peopo come into da trut. An we still yet finding “peopo dat get da right kine attitude fo get da real kine life.” (Jesus Guys 13:48, NWT.) Wen we find dem, no hold back from asking dem if dey like study or come to oua meetings. Cuz wen we do dat, we can help dem take dea firs steps on “road dat take [dem] to life.”​—Mat 7:14, NWT.