Show Respeck Fo Oddas

1. Why we like um wen peopo show us respeck? (Smart Guys 22:1)

YOU like um wen peopo show you respeck? Erybody need respeck. It make us happy wen we get um. Dass why da Bible tell dat wen peopo show you respeck, az “mo betta den silva an gold.”​—Read um Smart Guys 22:1.

2-3. Wen we gotta show respeck fo oddas?

² Sometimes iz hahd fo show respeck fo oddas. One reason iz ony easy fo see wass wrong wit odda peopo. An den get plenny peopo aroun us dat no moa respeck. But we no like be like dem. How come? Cuz Jehovah like us “get respeck fo erybody.”​—1 Pet 2:17.

³ In dis lesson we goin learn wat mean fo respeck oddas an how fo show um in da (1) ohana, (2) wit oua braddahs an sistahs, (3) an dose outside da hui. Da main ting we goin learn iz how fo show respeck even wen iz hahd.

WAT MEAN FO RESPECK ODDAS?

4. Wat mean fo respeck oddas?

⁴ Wen we talk about “respeck”, we talking about how we tink about peopo an how we treat dem. Wen we tink about da good tings in peopo, da good stuff dey wen do, or da position dey get, dat goin make us like show respeck fo dem. Fo real kine respeck come from da heart.​—Mat 15:8.

5. Wat can help us show respeck fo oddas?

⁵ Jehovah like us show respeck fo oddas. Fo exampo, he tell us we gotta show respeck to da “govmen guys in charge.” (Rome 13:1, 7) Some say, “I goin show oddas respeck az long az dey no ack up.” Dass da right way fo tink, o wat? No. We show respeck to oddas, not cuz of how dey ack but cuz Jehovah like us do um an we like make him happy.​—Josh 4:14; 1 Pet 3:15, NWT.

6. Can show respeck fo somebody who no show you respeck? Try tell why. (Go look da picha.)

⁶ Some might tink, “Can show respeck to somebody dat no respeck you?” Can. We go look some exampos. King Saul wen make his boy Jonathan come shame in fron odda peopo. (1 Sam 20:30-34) Still yet, Jonathan wen show him respeck an wen fight togedda wit him in wars. (Egypt 20:12; 2 Sam 1:23) Main Pries Eli wen say Hannah wuz drunk. (1 Sam 1:12-14) Still yet, Hannah wen show him respeck even tho erybody wen kno dat he wuzn’t doin his job az da Main Pries an az one faddah. (1 Sam 1:15-18; 2:22-24) Da Athens guys wen talk stink about Paul an call him one “mynah bird.” (Jesus Guys 17:18) Still yet, Paul wen show dem respeck. (Jesus Guys 17:22) All dis show dat we can show respeck fo oddas even wen iz hahd, cuz we love Jehovah an like make him happy. We go talk about who we should respeck an how come.

SHOW RESPECK FO YOA OHANA

7. Wat can make um hahd fo us treat oua ohana wit respeck?

⁷ Why iz hahd? Cuz we spen so much time wit oua family, we kno da good an da bad about dem. Some in da family might have one sickness or get mayjah anxiety dat make dem say an do stuff dass mean. An dat can make um hahd fo us show dem da respeck. Oddas jus strait up say an do stuff fo hurt us. An cuz some no show respeck to each odda in da family, erybody get mad at each odda, get drama, an no moa peace in da house. An cuz of dat, eryting iz all messed up in da family. Da ohana iz jalike one body. Jus like arthritis can stop da body pahts from working togedda smooth, wen you no show respeck, dat keep da family from working togedda good too. You no can fix arthritis, but you can make tings moa smooth in yoa ohana by showing each odda respeck.

8. Why we gotta show respeck fo family membas? (1 Fo Timoty 5:4, 8)

⁸ Why show respeck? (Read um 1 Fo Timoty 5:4, 8.) In Paul’s firs letta to Timoty, he wen talk about how family membas should take kea of wat each odda need. He wen say dat da main reason why we goin show respeck to guys in da family iz not cuz we gotta, but cuz we love Jehovah an dass paht of oua worship. Jehovah iz da one who wen make da family. (Efe 2:19; 3:14, 15) So wen we show respeck to family membas, iz like we showing respeck to Jehovah. Dass da numba one reason why we show respeck to guys in oua family!

9. How one husban an wife can show respeck fo each odda? (Go look da pichas.)

⁹ How fo show respeck. One husban who show respeck fo his wife wen dey stay by demselfs an in fron of peopo, show dat she stay wort plenny to him. (Smart Guys 31:28; 1 Pet 3:7) He not goin beat her up, make her shame, or tell her she good fo notting. Ariel,a one braddah from Argentina say, “Cuz of my wife’s sickness, sometimes she say stuff dat hurt me. Wen she do dat, I gotta remind myself dat da tings she saying iz not how she really feel. Wen tings start fo get nutz, I rememba 1 Fo Da Corint Peopo 13:5, an dat help me fo no get mad an talk to her wit respeck.” (Smart Guys 19:11) One wife show dat she respeck her husban by saying good tings about him to oddas. (Efe 5:33, NWT.) So she not goin be sassy, put him down, or call him names cuz she kno dat goin jam up dea marriage. (Smart Guys 14:1) One sistah in Italy whose husban get anxiety wen say, “Sometimes I feel like he jus bein one dramalani. Befoa, da tings I would say an da faces I would make wen show dat I neva respeck him. But I wen find out dat da moa I wen hang out wit guys dat had show respeck fo oddas, da moa I wen like show respeck fo my husban.”

10. How young peopo can show dey respeck dea parents?

¹⁰ Young guys, lissen to wat yoa maddah an faddah tell you fo do. (Efe 6:1-3) Talk to dem wit respeck. (Egypt 21:17) Wen dey get olda, dey goin need yoa help even moa. So do wat you can fo take kea dem. Try look wat wen happen to Maria, whose faddah iz not one Witness. Wen her faddah wen come sick, he made um hahd for Maria take kea him. She wen say: “I wen pray not ony fo respeck my faddah, but fo show um too. I wen tink, if Jehovah like me respeck my parents, den make sense dat he goin give me da strength fo do um. I wen come fo see dat even if my faddah no eva change an he make um hahd fo me, I still gotta respeck him.” Wen we respeck da guys in oua family even wen iz hahd, dat show we respeck Jehovah, da one who wen set up da family.

SHOW RESPECK FO YOA BRADDAHS AN SISTAHS

11. Why can be hahd fo show respeck to oua braddahs an sistahs?

¹¹ Why iz hahd? Oua braddahs an sistahs try fo follow da Bible. But sometimes dey talk mean to us, dey tink wrong tings about us, or dey jus irraz. Can be hahd fo show dem respeck wen dey ack lidat. (Col 3:13) Wat goin help us fo hando?

12. How come iz importan fo show respeck fo oua braddahs an sistahs? (2 From Peter 2:10,11, NWT)

¹² Why show respeck? (Read um 2 From Peter 2:10, 11, NWT.) In Peter’s secon letta, he wen write about some Christians dat wuz talking bad about “da guys God give kuleana to,” da eldas. How da angels wen ack wen dey had see dat? “Cuz dey wen respeck Jehovah,” dey neva even say one bad word about dose guys. Da angels wen let Jehovah hando dem. (Rome 14:10-12; go check Jude 9.) We can learn one lesson from da angels. If dey neva disrespeck da guys dat wen talk bad about da eldas, den even moa we should try oua bes fo no disrespeck oua braddahs an sistahs. (Rome 12:10) If we go all out fo show respeck fo oua braddahs an sistahs, dat show we respeck Jehovah.

13-14. How we can show respeck fo dose in da hui? Try give exampos. (Go look da pichas.)

¹³ How fo show respeck. Eldas, wen you teach, always do um wit love. (Fil 8, 9) An if you gotta correck somebody, be nice an no do um wen you all irraz. Sistahs, if you no talk stink or do anyting fo hurt somebody else’s rep, den you help make da hui one place wea erybody respeck each odda. (Titus 2:3-5) All us can show respeck fo da eldas by working wit dem an telling dem mahalo fo da work dey do wit da meetings, da preaching, an helping da guys who “goin da wrong way.”​—Gal 6:1, NWT; 1 Tim 5:17.

¹⁴ One sistah name Rocío had hahd time respeck one elda who wen give her advice. She wen say, “I feel like he neva talk nice to me. Wen I wuz at home, I would talk stink about him. I had try not fo show um, but inside I wuz tinking, he donno wat he talking about, he no kea about me.” Wat had help Rocío? She wen tell, “Wen I had read da Bible, I wen come across 1 Fo Da Tessalonika Peopo 5:12, 13. I realize I wuzn’t showing respeck fo my braddah an dat started fo bodda me inside. I wen pray to Jehovah an study fo help me put my head on strait. An I wen figga out dat my pride wuz da problem, not da braddah. I had come fo see dat if I not humbo, I goin grumbo an goin be hahd fo me show respeck to oddas. I still working on um, but Jehovah happy dat I stay trying.”

SHOW RESPECK FO DA GUYS OUTSIDE DA HUI

15. Why iz hahd fo show respeck fo da guys outside da hui?

¹⁵ Why iz hahd? Plenny times out in field service, we meet peopo who no kea about God or da Bible. (Efe 4:18) Oddas no like lissen cuz dey stick to wat dey wen learn growing up. An wen we go skool or work, we stay aroun peopo dass hahd fo make happy an dey no treat us nice. Dealing wit guys lidat eryday can make us lose oua respeck fo dem an stop treating dem good.

16. Why we gotta show respeck fo da guys who no stay in Jehovah’s hui yet? (1 From Peter 2:12; 3:15, NWT.)

¹⁶ Why show respeck? Rememba dat Jehovah stay watching how we treat da guys who not in his hui yet. Peter wen tell Christians dat da way dey ack can make oddas like serve Jehovah. Dass how come he wen tell dem fo explain wat dey believe in one “nice kine [way], an show respeck.” (Read um 1 From Peter 2:12; 3:15, NWT.) Wen we standing up fo wat we believe, wedda stay in court or jus talking story wit one neighba, rememba dat Jehovah stay watching eryting. Dass how come we like show respeck to dose who no stay in Jehovah’s hui yet.

17. How we can show respeck fo da guys outside da hui?

¹⁷ How fo show respeck. Wen we stay preaching to oddas, we no like make dem feel dumb if dey ony kno litto bit or notting about da Bible. An we like rememba dat dey importan to God an we not betta den dem. (Hag 2:7; Php 2:3) So if somebody say someting bad about wat you believe, no get smart wit dem or make dem feel stupid. (1 Pet 2:23) But if you say someting you shouldn’t have sed, say sorry fas. How you can show respeck fo da guys at work? Work hahd fo yoa boss an try fo see da good tings in da guys you work wit. (Titus 2:9, 10) Even if you do all dat, some guys still yet not goin be happy. But rememba, Jehovah stay happy.​—Col 3:22, 23.

18. Why iz good fo us fo show respeck fo oddas?

¹⁸ We get plenny good reasons fo show respeck fo oddas! We had learn dat wen we show respeck to oua ohana an da braddahs an sistahs inside da hui, we show respeck to oua Faddah Jehovah. An wen we show respeck fo da guys dass not inside da hui, we make um easy fo dem fo like learn about Jehovah. Even if some guys no respeck us, az okay, we still show respeck fo dem cuz Jehovah goin bless us fo dat. He promise, “Da peopo dat show respeck fo me, I goin show respeck fo dem.”​—1 Sam 2:30.