Coming Close Frenz Wit Oua Braddahs An Sistahs Iz Good Fo Us!

1-2. Wass importan to Jehovah, an wat he like us do?

HOW we treat peopo iz importan to Jehovah. Dass how come Jesus wen teach us fo love oddas da way we love ouaself. (Mat 22:37-39) Jehovah “make da sun come up [an] . . . make um rain on da guys who do good kine tings an da guys who do bad.” We like copy Jehovah an be nice, even to da guys who no serve him.​—Mat 5:45, NWT.

² Jehovah love erybody, but he really love da guys who lissen him. (John 14:21) Fo copy him, he tell us fo get “plenny love an aloha” fo oua braddahs an sistahs, an fo show um. (1 Pet 4:8; Rome 12:10) Dass da same kine love we get fo oua family an good frenz.

3. Wat we gotta do wit oua love?

³ Jus like we gotta put in da work fo take kea one plant so da ting can grow, we gotta do da same ting wit oua love so dat can grow too. Da aposal Paul wen tell, “make shua all you braddahs an sistahs show love an aloha fo each odda.” (Heb 13:1) Jehovah like oua love fo oddas come moa strong. Dis lesson goin talk about why we gotta come closa to oua braddahs an sistahs, an how we can keep doin dat.

WHY WE GOTTA COME CLOSA TO EACH ODDA

4. From wat Songs Fo God 133:1 tell, how we can make shua fo no take fo granted oua braddahs an sistahs? (Go look da pichas.)

⁴ Read um Songs Fo God 133:1. Da song writa wen tell dat bein frenz wit da guys dat love Jehovah iz “good,” an we feel lidat too. Jus like we could take fo granted da ocean cuz we see um eryday, we could take fo granted da unity we get wit oua braddahs an sistahs cuz we see dem all da time. So how we can make shua dis no happen to us? We gotta take da time fo tink about how ery braddah an sistah iz spesho to us an to da hui, an dass wat goin help us fo stick togedda.

5. Wat can happen wen oddas see da love we get fo each odda?

⁵ Some peopo who come to da meetings fo da firs time figga dey had find da trut cuz dey see da love we get fo each odda. Like Jesus tell, “If all you guys show love an aloha fo each odda, den erybody goin know you my guys.” Try check out wat wen happen to one college girl Chaithra who wuz studying da Bible wit da Witnesses. She wen go da big kine meeting an afta da firs day she wen tell her Bible teacha, “My parents neva hug me. But today I wen get 52 hugs! I had feel Jehovah’s love tru da braddahs an sistahs, an I like dem be my family.” (John 13:35) Chaithra wen keep making changes in her life cuz of wat she wuz learning from da Bible, an she wen get baptize in 2024. Az tru, wen new ones see da good tings we do, like da love we get fo each odda, plenny times it make dem like start fo serve Jehovah.​—Mat 5:16, NWT.

6. How can coming moa close to oua braddahs an sistahs proteck us?

⁶ Coming moa close wit oua braddahs an sistahs can proteck us. Paul wen tell Christians, “Give each odda good kine words . . . ery day . . . [so] nobody from you guys . . . jam up.” (Heb 3:13) Jehovah can use oua braddahs an sistahs fo give us da help we need if eva get times wen we so bum out dat iz hahd fo do da right ting. (Songs 73:2, 17, 23) Iz so good wen we get dis kine help.

7. How love an unity stay conneckted? (Fo Da Colosse Peopo 3:13, 14)

⁷ Get so much blessings dat come from bein paht of one group of peopo dat work hahd fo show love to each odda. (1 John 4:11) Like, love goin make us let each odda go, an dat goin help us stay united wit oua braddahs an sistahs. (Read um Fo Da Colosse Peopo 3:13, 14; Efe 4:2-6) Dass how come wen we go meetings, iz so good fo be dea. No moa one betta place fo be.

SHOW RESPECK TO EACH ODDA

8. How Jehovah help us be united wit oua braddahs an sistahs?

⁸ Even tho we no stay perfeck, da reason we able fo have unity wit oua braddahs an sistahs aroun da world, iz cuz of Jehovah. (1 Cor 12:25) Da Bible tell, “God wen teach you guys” fo “show love an aloha” to each odda. (1 Tess 4:9) We gotta study an do wat Jehovah tell us in da Bible fo come moa closa to one anodda. (Heb 4:12; Jam 1:25) An dass wat Witnesses Fo Jehovah try fo do.

9. From wat Fo Da Rome Peopo 12:9-13 tell, wat we learn about showing respeck to each odda?

⁹ Try check out wat Paul wen teach us about how fo come moa close to each odda at Fo Da Rome Peopo 12:9-13. (Read.) He wen tell, “Go all out fo show da oddas you get plenny respeck fo dem.” Wat dat mean? You should be da firs ones fo show love an aloha to oddas by letting dem go, taking kea of dem, an giving plenny to dem wen can. (Efe 4:32) We no need wait fo oua braddah or sistah come close to us. So wen we go all out fo do dis, we goin see wat Jesus tell stay tru, “Da guy dat give, he stay mo betta inside den da guy dat get.”​—Jesus Guys 20:35.

10. How we can work hahd fo show respeck to each odda? (Go look da picha.)

¹⁰ Right afta Paul wen tell us fo show respeck to each odda, he wen say fo “work hard, no be lazy.” Somebody who work hahd go all out in wat he do. Like wen he get one job fo do, he do um good. Smart Guys 3:27, 28 tell us, “Wen you gotta do someting fo help somebody, No hold back if you get da powa fo do um.” So wen we see somebody need help, we no wait fo somebody else do um, we do wat we can fo help dem.​—1 John 3:17, 18.

11. Wat can help us come moa close to each odda?

¹¹ Anodda way we show respeck fo oddas iz wen we fogive dem right away wen dey hurt us. Fo Da Efesus Peopo 4:26 tell, “No good da sun go down an you guys still yet stay huhu.” How come dass no good? Cuz verse 27 tell dat if we do dat we goin “let da Devil get one chance fo jam you guys up.” Jehovah tell us in da Bible ova an ova fo let each odda go. Fo Da Colosse Peopo 3:13 tell us dat erytime “somebody give you problem, eh, let um go.” One of da bestes ways fo come close to each odda iz fo fogive. Wen we do dat, we help erybody “stick togedda . . . [an] stay pono wit each odda.” (Efe 4:3) So den wen we fogive oddas we help Jehovah’s hui get unity an peace.

12. How Jehovah help us fogive each odda?

¹² Even tho might be hahd fo fogive somebody who wen hurt us, Jehovah can help us fo do da right ting. Afta telling us fo show “plenny love an aloha” an “fo work hard”, da Bible tell us fo “go all out.” Somebody who “go all out,” try dea bes fo do wass right wit da help of God’s spesho spirit. So Jehovah’s spirit can make us like go all out fo show love an aloha an be ready fo fogive each odda. Dass how come we gotta keep asking Jehovah fo help us.​—Luk 11:13.

“NO SPLIT UP . . . STICK TOGEDDA!”

13. Wat could split up da hui?

¹³ Da hui get all kine diffren peopo dat wen grow up all kine diffren ways. (1 Tim 2:3, 4) Cuz of dis, we goin make diffren choices about wat we wea an how we like look, da medical kine choices we make, an wat we do fo fun. If we no watch out, dese tings could split us up. (Rome 14:4; 1 Cor 1:10) But cuz God wen teach us how fo show love an aloha to each odda, we gotta be keaful fo no make like wat we choose fo do iz moa betta den wat oddas do.​—Php 2:3.

14. Wat we like always try fo do, an how come?

¹⁴ Anodda way da hui can stick togedda iz if we all try hahd fo encourage an build each odda up. (1 Tess 5:11) Recently, plenny peopo who wuz inactive or hemo from da hui wen come back to Jehovah. We stay so happy dey back! (2 Cor 2:8) One sistah who wen go back to da Kingdom Hall afta bein inactive fo ten years wen tell, “Erybody wen smile at me an shake my hand.” (Jesus Guys 3:19) How dat wen affeck her? She tell, “I wen feel Jehovah wuz helping me fo come happy again. Wen we try fo build each odda up, Jesus can use us fo help da guys dat “carry heavy kine stuff dat make [dem] come wore out.”​—Mat 11:28, 29.

15. Wat iz anodda way we can help da hui stick togedda? (Go look da picha.)

¹⁵ Da way we talk to oddas iz anodda way we can stick togedda. Job 12:11 tell, “Peopo use dea ears fo tes wat odda peopo tell . . . jalike dey use dea mout fo tes food.” Jus like how one good cook always sampo his food fo make shua da ting stay ono befoa he give um to oddas, we gotta tink real good about wat we say befoa we say um. (Songs 141:3) We always like try fo be shua dat wat we say goin build um up an be “ony good fo dem.”​—Efe 4:29.

16. Who should try fo build oddas up wit wat dey say?

¹⁶ Husbans an parents gotta make shua da way dey talk build oddas up. (Col 3:19, 21; Titus 2:4) An cuz da eldas get da kuleana fo take kea Jehovah’s sheep, da way dey talk should build up oddas an make um feel safe. (Isa 32:1, 2; Gal 6:1) Da Bible tell, “Wen you tell um someting dey need fo hear right den an dea, dass real good!”​—Smart Guys 15:23.

SHOW LOVE AN DO GOOD TINGS

17. How we can make shua we love oua braddahs an sistahs from da heart?

¹⁷ Da aposal John tell us fo “no show love wit talk ony. You gotta show da kine love dass fo real, an do good kine tings fo erybody!” (1 John 3:18) We like love oua braddahs an sistahs from da heart. How we can do dat? Da moa we spen time wit dem, da closa we goin come an da stronga oua love goin be fo one anodda. So make da time fo be wit oddas, like at da meetings an field service. Try make time fo go visit da braddahs an sistahs. Wen we do dis, we show dat we letting Jehovah teach us how fo show love an aloha. (1 Tess 4:9) We goin see fo ouaself how good it iz “wen all da braddah guys stick togedda jalike dey one. Dass goin make erybody feel real good inside.”​—Songs 133:1.