Fo Us Come Moa Tight Wit God Iz Da Bestes Ting!

1-2. (a) Wat we gotta do fo come tight frenz wit somebody? (b) Wat we goin talk about in dis lesson?

TRY tink of one real good fren you get. Wat you wen do fo come frenz wit him? You probly wen spen time togedda, wen find out wat he like an no like, an wen learn about da hahd tings he wen go tru. You had see his awesome qualities dat you like try copy. Dass how you wen come fo love yoa fren.

² Fo come tight frenz wit somebody, take plenny time an work. Same ting, fo come tight frenz wit Jehovah, goin take plenny time an work too. In dis lesson, we goin talk about how we can come moa close to oua God an wat good tings come from doin dat. But firs, we go look why iz good fo us come moa tight wit oua bes Fren, Jehovah.

3. Why should we tink about how iz good fo us fo come tight wit Jehovah?

³ Fo shua you agree dat coming close to Jehovah iz one good ting. But really tinking about how good it iz fo be close to Jehovah can make you like do um even moa. (Songs 63:6-8) Fo exampo, we kno dat eating da right kine foods, exercising, getting nuff res, an drinking nuff watta all stay good fo us. Still yet, plenny peopo no tink too much about dese tings, an dass why dey no take kea dea healt. But da moa we tink about how all dese tings iz good fo oua healt, da moa we probly goin like do um. Same lidat, we might kno dat coming tight wit Jehovah iz good fo us, but tinking about how good it iz can make us like keep coming moa tight wit oua Fren.​—Songs 119:27-30.

4. Wat da writa of Songs Fo God 73:28 wen say?

⁴ Read um Songs Fo God 73:28. Da writa of Song 73 wuz one Levi guy who wen get pick fo be one musician at Jehovah’s tempo. He probly wuz one faitful worshipa of Jehovah fo long time. Still yet, he wen kno wuz importan fo him rememba dat fo “come mo tight wit . . . God” wuz da bestes ting fo him, an he wen like oddas fo kno dat coming frenz wit God wuz good fo dem too. How come iz good fo kno Jehovah moa betta an come closa frenz wit him?

COMING MOA TIGHT WIT GOD GOIN MAKE US HAPPY

5. (a) Why coming moa tight wit Jehovah make us happy? (b) How da smarts from Jehovah can help an proteck you? (Smart Guys 2:6-16)

⁵ Da moa tight we stay wit Jehovah, da moa happy we goin be. (Songs 65:4) Get plenny reasons why dis stay tru. Fo exampo, we come moa akamai wen we read wat da Bible tell an follow um. Wat Jehovah teach can proteck us from tings dat can hurt us. (Read um Smart Guys 2:6-16.) Dass why da Bible tell, “Wen somebody get da smarts fo know wat fo do erytime, an learn how fo undastan stuff, dey can stay good inside”​—Smart Guys 3:13.

6. Why da song writa wen feel all sad?

⁶ Even Jehovah’s frenz go tru times wea dey feel all sad. Da writa of Song 73 wen feel junk wen he had tink about tings dat no wuz fair. He wen start fo tink dat bad peopo had um easy even tho dey neva even kea about God, an dis wen make him all salty an jealous. He wen tink dat peopo who wuz violent an proud wuz healty, neva suffa, an could get anyting dey like. (Songs 73:3-7, 12) Dis wen bodda da song writa so much dat had get to da point wea he had wonda if wuz wort it fo serve Jehovah. He wuz so bum out dat he wen say, “Ony wase time fo . . . me come clean inside! Ony wase time I no do bad kine stuff!”​—Songs 73:13.

7. Wen we feel sad, wat we can do? (Go look da cova picha.)

⁷ Wen da song writa had feel sad, he wen do someting fo change his tinking. He wen “go inside da place dat stay spesho” fo God, an dass wea Jehovah wen correck how he tink. (Songs 73:17-19) Oua bes Fren, Jehovah, kno wen we sad. Wen we feel lidat, we can pray to Jehovah an ask him fo help us kno wat fo do. Wat he tell in da Bible an da good kine words from oua braddahs an sistahs goin give us da powa fo keep serving him even wen we stay bum out. Even wen we feel so stress out dat we donno wat fo do, Jehovah goin malama us an help us fo feel calm.​—Songs 94:19.a

COMING MOA TIGHT WIT GOD GIVE US ONE GOOD LIFE NOW AN HOPE FO DA FUTURE

8. Wat odda ways coming moa tight wit God iz good fo us?

⁸ Coming moa tight wit God iz good fo us in two odda ways. Numba one, we can have one good life now. Numba two, we can have one solid hope fo da future. (Jer 29:11) We go talk story some moa about dese two tings.

9. How coming close frenz wit Jehovah make us moa happy?

⁹ Wen Jehovah stay oua close fren, we can have one good life now. Plenny peopo today say dat God not real. Dey tink dat all humans goin be gone bumbye, an no moa one real point fo live. But from wat we learn in da Bible, we stay shua dat “God stay fo real,” an cuz we like kno him, he goin give us “someting spesho fo dat.” (Heb 11:6) Jehovah wen make us fo serve him, so wen we do, we feel happy.​—Rules 10:12, 13.

10. Wat Jehovah promise da guys dat trus him? (Songs Fo God 37:29)

¹⁰ Fo mos peopo, dey no moa one real hope fo da future. Dey jus go work, get married, have kids, an save up fo wen dey retire. God iz not paht of dea life. But we kno dat Jehovah take kea his peopo. (Songs 25:3-5; 1 Tim 6:17) We trus oua God an we kno fo shua dat he goin do wat he promise. We get so much good tings fo get excited about, speshly da hope fo serve Jehovah foeva in da Paradise.​—Read um Songs Fo God 37:29.

11. Wat odda tings happen wen we come moa tight wit God, an how dat make him feel?

¹¹ Get odda ways dat coming moa tight wit God iz good fo us. Fo exampo, Jehovah promise he goin fogive oua sins if we fo real kine sorry. (Isa 1:18, NWT.) Cuz of dat, we no need feel all guilty fo da sins we wen do befoa. (Songs 32:1-5) An Jehovah stay happy wen we come close to him too. (Smart Guys 23:15) Fo shua you can tink of odda blessings dat come from bein good frenz wit Jehovah. We go see wat we can do fo keep coming moa tight wit God.

HOW FO KEEP COMING MOA TIGHT WIT GOD

12. Wat you wen do fo come good frenz wit God?

¹² Befoa you wen get baptize az one Witness Fo Jehovah, you wen do plenny tings fo come good frenz wit God. You wen learn da trut about Jehovah an Jesus, wen come sorry fo da sins you wen do befoa, you wen show yoa fait in God, an you wen try yoa bes fo lissen to him. But fo come moa tight wit God, we gotta keep doin dese tings.​—Col 2:6.

13. Wat three tings can help us fo keep coming moa close to Jehovah?

¹³ Wat goin help us fo keep coming moa close to Jehovah? (1) We gotta keep reading an studying da Bible. Wen we do dis, we no like ony learn tings about God jus fo kno um. But we should try fo undastan wat da Bible say about how God tink an wat he like us do, an live da way he like us live. (Efe 5:15-17) (2) We gotta make oua fait moa strong by tinking hahd about da plenny ways dat he show he love ery one of us. (3) We gotta keep hating da tings Jehovah hate an no hang aroun da guys who do dose tings.​—Songs 1:1; 101:3.

14. Wat we can do eryday fo make Jehovah happy? (1 Fo Da Corint Peopo 10:31) (Go look da pichas.)

¹⁴ Read um 1 Fo Da Corint Peopo 10:31. Iz supa importan dat we keep doin tings dat goin make Jehovah happy. We gotta do moa den preach an go meetings. Wat we do eryday gotta make Jehovah happy. Like wen we tell da trut an share wat we get wit oddas. (2 Cor 8:21; 9:7) An wen we tankful fo da life he wen give us. Anodda way fo come moa close to Jehovah iz wen we watch how much we eat an drink an do odda tings fo take kea oua healt. Wen Jehovah see us try fo make him happy in eryting we do, even da small kine stuff, he love us even moa.​—Luk 16:10.

15. How Jehovah like us treat oddas?

¹⁵ Jehovah iz nice to erybody no matta dey serve him or not. (Mat 5:45, NWT.) He expeck us fo be nice to oddas too. Fo exampo, we “no talk bad bout nobody, an no beef . . . make frenz wit erybody . . . [an] let da odda peopo go firs.” (Titus 3:2) So even if peopo no believe in Jehovah, we no tink we stay betta den dem. (2 Tim 2:23-25, NWT.) We come moa close to Jehovah wen we try treat erybody in one nice way all da time.

COME MOA TIGHT WIT JEHOVAH EVEN WEN WE MAKE MISTAKE

16. How da writa of Song 73 wen start fo feel?

¹⁶ Get times maybe you start fo feel like Jehovah no stay close to you cuz of da mistakes you wen make befoa. But try rememba da guy who wen write Song 73. He tell, “I almos fall ova . . . jalike my feets almos slip an I fall down.” (Songs 73:2) He wen say, “I wen come real sore inside . . . I stupid, an donno notting.” He wen tink dat to Jehovah, he wuz “jalike one lolo animal.” (Songs 73:21, 22) But did he feel dat cuz of da mistakes he wen make, Jehovah no would fogive him an love him anymoa?

17. (a) Even wen he had feel so junk, wat da song writa wen do? (b) Wat we can learn from wat he wen go tru? (Go look da pichas.)

¹⁷ If da song writa wen feel dat Jehovah had bag from him, he musta felt lidat ony fo litto while. Look like even tho he wen feel so junk, he still wen kno he had fo be close to Jehovah, cuz he wen write, “Still yet, I stay tight wit you [Jehovah], jalike you stay hold my right hand. You stay teach me wass good fo do, fo show me wea fo go. Bumbye you goin make me come awesome.” (Songs 73:23, 24) Us too gotta ask Jehovah fo make us strong wen we feel weak or bum out cuz of da mistakes we wen make befoa. (Songs 73:26; 94:18) Even if we mess up real bad, we can come back to Jehovah an kno fo shua dat he “stay ready erytime fo let [us] go.” (Songs 86:5) Speshly wen we stay feeling real down, dass wen we gotta come moa tight wit God.​—Songs 103:13, 14.

COME MOA TIGHT WIT GOD FOEVA

18. Why we can keep coming moa close to Jehovah foeva?

¹⁸ No moa one end fo how much we can learn about Jehovah. We can keep coming moa close to Jehovah foeva. Da Bible tell, “No mo nobody can figga out how come God do wat he do,” how smart him, an all dat he kno.​—Rome 11:33.

19. Wat Song 73 tell us about da future?

¹⁹ Songs 79:13 tell, “Us guys, yoa peopo. You take kea us guys jalike we yoa sheeps. We goin tell good tings bout you all da time, to oua kids, an oua grankids foeva.” Wen you keep coming moa tight wit Jehovah, you can be shua dat he goin bless you foeva. An you can say da same ting az da song writa, “You make me stay strong inside, jalike one rock. An da one ting I get fo shua, is you, God, foeva.”​—Songs 73:26.