Da Bes Way Fo Ack Wen Tings Not Fair

1-2. How plenny peopo ack wen tings no stay fair, an wat we goin talk about?

WE LIVE in one world dass not fair. Peopo stay treated bad cuz dey pooa, or wea dey come from, or da way dey look, or all kine odda reasons. Cuz govament leadas an bizness peopo ony kea about making money, plenny peopo suffa. All dat kine stuff can affeck us an da peopo we kno in one way or anodda.

² We all like live in one world wea erybody stay safe an treated fair. But dass not how da world stay today, an dass how come plenny peopo angry. So cuz of dat some peopo try fo fix da problems dey see goin on. Dey protest agains da govament or laws. Or dey vote fo somebody who promise fo fix eryting. But cuz we Christians, we “no do same same jalike da odda peopo inside dis world.” (John 17:16) An we trus dat God’s govament goin take away eryting dass not fair. But sometimes we get all worked up wen we see peopo treated bad. We might tink, “Wat I can do wen dat happen? Anyting I can do right now fo make tings fair?” Befoa we ansa dese questions, we go look how Jehovah an Jesus feel about tings dass not fair.

JEHOVAH AN JESUS HATE UM WEN TINGS NOT FAIR

3. How come it bodda us wen tings iz no fair? (Isaiah 5:7, NWT.)

³ Da Bible tell how come it bodda us wen tings iz not fair. It tell us dat Jehovah wen make us like him an “he feel good wen peopo do da right ting an judge da right way.” (Songs 33:5; Start 1:26) He neva do tings dass not fair, an he no like us fo do dat eidda! (Rules 32:3, 4; Mic 6:8, NWT; Zek 7:9) Like in Isaiah’s time, Jehovah wen hea da Israel guys “crying cuz dey [wuz] treated bad” by dea own peopo. (Read um Isaiah 5:7, NWT.) So Jehovah wen punish da guys who wen treat dea braddahs unfair.​—Isa 5:5, 13.

4. How Jesus feel wen somebody iz treated bad? (Go look da picha.)

⁴ Wen come to tings dass not fair, Jesus feel jus like his Faddah. One time he wen see one man wit one moimoi hand an wanted fo help um. Afta Jesus had heal him, da religious leadas wen get all nutz cuz dey wuz ony tinking about how he had break da rules fo da Res Day. Dey neva even kea dat da guy’s hand wen come betta. Jesus wen feel real huhu an sad cuz of how dey had ack.​—Mar 3:1-6.

5. If we get mad cuz tings not fair, wat we gotta rememba?

⁵ Since Jehovah an Jesus hate um wen tings not fair, iz not wrong fo us feel da same way too. (Efe 4:26) But even if we get da right fo be mad, dat not goin fix da problem. In fact, if we stay mad fo long time, dat goin mess us up. (Songs 37:1, 8; Jam 1:20) So den, how we should deal wit um wen tings iz not fair? We go check out Jesus’ exampo.

WAT JESUS WEN DO WEN TINGS NO WUZ FAIR

6. Wat kine stuff wuz happening Jesus’ time dat no wuz fair? (Go look da picha.)

⁶ Wen Jesus wuz on da eart, he wen see plenny tings dat no wuz fair. He wen see how da religious leadas wen make plenny rules dat made um real hahd fo da peopo. (Mat 23:2-4) He wen see da Roman leadas treat da peopo real bad. An plenny of da Jews wanted fo be free from Rome. Some of dem wen even hui up an fight agains Rome. Jesus neva get involve wit any of dat kine stuff. In fact, wen dey wanted fo make him king, he wen dig out.​—John 6:15.

7-8. Wen he wuz on eart, how come Jesus neva try fix all da problems? (John 18:36)

⁷ Jesus neva get caught up in politics fo try fix da problems he wen see. How come? Cuz he wen kno dat peopo no moa da right an dey no can rule demselfs. (Songs 146:3; Jer 10:23, NWT) An dey no can fix wat really causing da problems. Satan rules dis world an peopo copy da way he ack. (John 8:44; Efe 2:2) An even tho get guys who good an like fix da tings dass no fair, cuz dey not perfeck, dey jus no can.​—Teacha 7:20.

⁸ Jesus had kno dat ony God’s Govament wuz goin hemo all da problems an da stuff dat cause um. Dass why he wen go all out fo preach about God’s Govament. (Luk 8:1) Dat preaching wen help out all da guys dat wuz stressing out about da stuff dat wuz no fair in da world. (Mat 5:6, NWT; Luk 18:7, 8) So ony God’s Govament, dass not paht of dis world, goin fix all da problems​—Read um John 18:36.

WEN YOU SEE TINGS DASS NOT FAIR, COPY JESUS

9. Why you believe ony God’s Govament goin hemo all suffaring?

⁹ Right now we stay living in da time “befo da world goin come pau” an get moa suffaring now den had wen Jesus wuz on eart. Da reason why get so much suffaring iz still da same. Iz cuz Satan an da guys who copy him. (2 Tim 3:1-5, 13; Jesus Show 12:12) Jus like Jesus, we kno da ony ting dat goin get rid of Satan an all da bad tings in dis world iz God’s Govament. Cuz we back up dat Govament, we no trus in peopo or odda govaments fo fix all dose problems. Try look wat wen happen to one sistah name Stacy.a Befoa she wen come in da trut, she wen march on da streets an protest agains tings dat wuzn’t fair. But den she started fo wonda if wat she wuz doin wuz really helping. She wen say, “Wen I wuz protesting, I wen wonda if I wuz even fighting fo da right ting. Now dat I stay backing God’s Govament, I kno I stay on da right side. I kno Jehovah goin hemo all da suffaing an dass someting I no can do.”​—Songs 72:1, 4.

10. How come we no try change laws an govaments? (Matthew 5:43-48, NWT.) (Go look da picha.)

¹⁰ Plenny peopo hui up wit groups dat try fo change laws an govaments. But dey get so mad dat dey start fo break da laws an hurt odda peopo. Dass not wat Jesus wen teach us fo do. (Efe 4:31) One braddah name Jeffrey wen say, “Wen peopo stay protesting, can start off peaceful. Den ony fas tings can change an peopo can start getting all nutz, start breaking tings, ripping tings off, an even hurting each odda.” But Jesus wen tell us fo love erybody, even da guys who make anykine an go agains us. (Read um Matthew 5:43-48, NWT.) An we try oua bes fo copy da exampo Jesus wen set fo us.

11. How come sometimes can be hahd fo copy Jesus?

¹¹ Even if we kno dat God’s Govament goin fix eryting dass not fair, can be hahd fo copy Jesus wen we treated bad. Try look wat wen happen to Janiya. She wuz treated bad cuz da color of her skin. She wen say, “I wuz mad an hurt. I wanted fo get back at da guys dat wen treat me bad. Den I thought about getting togedda wit guys who fight agains racism an I thought dat wuz goin make me feel betta.” But Janiya wen figga out dat she had fo make changes. She wen say, “I wuz letting oddas affeck da way I tink. I started fo trus peopo instead of Jehovah. Dass how come I wen choose not fo be paht of any groups anymoa.” Wen we get treated bad we goin get mad, but we gotta watch out so we no get mixed up wit issues of dis world an politics.​—John 15:19.

12. Why we gotta be keaful about da stuff we read, lissen to, an watch?

¹² Wat can help us fo no get nutz wen someting no stay fair? We gotta be keaful about da stuffs we read, lissen to, an watch. Some stories on top social media try fo get peopo worked up about tings dass not fair an complain about da govament. Plenny times news reportas might say wat dey tinking an not wat really wen happen. Even if da stuff dey wen report iz true, if we keep reading about um an lissening to um, dass not goin make anyting betta. It ony goin make us moa mad an bummed out. (Smart Guys 24:10) An even moa worse den dat, it can even make us stop trusting God’s Govament fo fix all da problems.

13. How reading da Bible eryday can help us fo hando wen tings iz not fair?

¹³ Reading da Bible eryday an tinking hahd about um can help us fo hando wen tings iz not fair. Wen bodda one sistah name Alia real plenny wen she had see peopo in her community getting treated bad. Had look like da guys dat wuz treating peopo bad wuz getting away wit it. She wen say, “I had fo sit down an ask myself, ‘I full on believe Jehovah goin fix all dese problems?’ Den I wen read Job 34:22-29 an dat wen remind me dat Jehovah see eryting. Ony he kno exackly da right way fo judge peopo an ony him can fix all da problems.” Wat we can do fo hando now while we wait fo God’s Govament make eryting right?

WAT WE CAN DO NOW

14. Wass one ting we can do now? (Fo Da Colosse Peopo 3:10, 11)

¹⁴ We cannot change how odda peopo ack, but we can control how we treat oddas. Like how we wen talk about earlia, we can copy Jesus by showing love an respeck to peopo, even to da guys who give us hahd time. (Mat 7:12, NWT; Rome 12:17) Jehovah iz happy wen we make nice to erybody an treat dem fair.​—Read um Fo Da Colosse Peopo 3:10, 11.

15. How learning Bible truts can help peopo change?

¹⁵ Da bes way fo help peopo iz by teaching dem bout Jehovah. Why we can say dat? Cuz az somebody stay learning about Jehovah, dey can change from somebody who iz all nutz to somebody who show love. (Isa 11:6, 7, 9) Befoa he had come into da trut, one guy name Jemal wen hui up wit some guys who wen feel like da govament wuzn’t treating dem fair. So dey wen go fight agains um. He wen say, “You no can force peopo fo change. Da ony way I wen change iz cuz of da stuff I wen learn inside da Bible.” Jemal wen stop fighting cuz of wat he wen learn. So wen we teach peopo da trut from da Bible, we help dem fo stop doin tings dat hurt oddas.

16. Why you like tell oddas about wat God’s Govament goin do?

¹⁶ Like Jesus, we no can wait fo tell peopo about how God’s Govament goin fix all da problems get today. Dat can make da guys who wuz treated bad feel betta cuz dey get someting good fo look forward to. (Jer 29:11) Stacy, who we had talk about earlia wen say, “Learning about how Jehovah goin hemo all da suffaring help me wen I treated bad or I see odda peopo suffaring. Jehovah use da Bible fo help peopo feel betta.” We gotta be ready fo share wit oddas how da Bible can help dem. Da moa shua you stay about wat da Bible say about suffaring, da moa ready you goin be fo share um wit oddas at work or skool.b

17. How Jehovah help us hando wen tings no stay fair?

¹⁷ Az long az Satan rule dis world, tings not goin be fair an peopo goin suffa. But tings not goin stay lidat cuz Jehovah promise he goin help us now an he goin hemo Satan an all da bad stuff dat get in da world. (John 12:31) Jehovah use da Bible fo show us how come tings iz not fair an how he feel wen we suffa. (Songs 34:17-19) From Jesus, we wen learn how we gotta ack wen oddas treat us bad an how pretty soon how God’s Govament goin hemo suffaring foeva. (2 Pet 3:13) We no can wait fo da time wea eryting goin be “fair an right.” (Isa. 9:7, NWT) But till den, we go all out fo preach bout God’s Govament.