How Fo Be Moa Happy Wen We Preach

1. How some peopo feel about preaching? (Go look da picha.)

WE PREACH cuz we love Jehovah an we like help odda peopo know him too. Plenny in da hui love fo go preaching. But oddas get hard time doing um. How come? Some feel like dey not good at um an dey shy. Some no like go somebody’s house unless dey wen get invited. Some sked fo get shut down. An oddas no like get peopo mad. Even tho dey love Jehovah plenny, dese braddahs an sistahs get hard time preaching to peopo dey donno. But still yet, dey know az importan so dey no hold back from doing um. Dat make Jehovah real happy!

2. Why you no need get down on yoaself if you not happy wen you preach?

² Maybe cuz you feel lidat, you get hard time be happy wen you go preach. No get down on yoaself if dass how you feel. If you tink you not good at preaching, maybe is cuz you humbo an you no like too much attention on yoaself o you no like make argue wit peopo. An nobody like get shut down, speshly wen dey trying fo help odda peopo. Jehovah know how you feel an he like help you. (Isa 41:13) In dis lesson, we going talk about five tings dat can kokua you if you feel lidat, an how you can be happy wen you preach.

GOD’S WORDS CAN BUILD YOU UP

3. Wat wen help Jeremiah fo preach?

³ In da pas, Jehovah’s words wen help his peopo do tings dat was hard fo dem. Like Jeremiah, he was all stress out wen Jehovah wen give um da job fo go preach. He wen say, “I donno how fo talk good! I ony one young guy.” (Jer 1:6) So how he wen get da courage fo preach? Wat Jehovah wen tell him wen build um up. Jeremiah wen say, “Jalike one fire stay burn inside me! Jalike my bones burning up inside. I stay tired from hold um inside.” (Jer 20:8, 9) Even tho da place Jeremiah had fo preach was ruff, da message wen build him up fo do da work.

4. Wat happen wen we read da Bible an tink hard about um? (Fo Da Colosse Peopo 1:9, 10)

⁴ Christians get built up from Jehovah’s words dat stay in da Bible. Wen da aposal Paul wen write to da braddahs in Colosse, he wen say dat learning da trut about Jehovah would make dem “live da way [He] like,” an “erytime . . . do good tings.” (Read um Fo Da Colosse Peopo 1:9, 10.) Part of da good tings is fo go preach. So wen we read da Bible an tink hard about um, dat build up oua faith in Jehovah an we undastan moa betta how come is so importan fo preach.

5. If we like da Bible help us, wat we should do wen we read an study um?

⁵ If we really like da Bible help us, we no like rush wen we read, study, an tink hard about um. Jus take yoa time. If you read one scripcha you no undastan, no jus keep reading. Use da Watch Tower Publications Index o da Research Guide for Jehovah’s Witnesses fo find out wat da verse talking about. If you take yoa time an no rush wen you study, you going be even moa shua dat wat da Bible say is true. (1 Tess 5:21) Da moa shua you stay, da moa happy you going be fo share wit odda peopo wat stay in da Bible.

BE READY FO PREACH

6. Why we should be ready fo preach?

⁶ If you ready fo preach, you not going be az sked fo talk to peopo. Jesus wen help his guys get ready befoa he wen send um out fo preach. (Luk 10:1-11) Cuz dey wen do all da tings Jesus wen teach dem, dey wen do plenny good tings an dey was all happy cuz a dat.​—Luk 10:17.

7. How we can get ready fo preach? (Go look da picha.)

⁷ How we can get ready fo preach? Tink about wat we going say an how we can say um in one natural way. Anodda ting dat going help is if we tink about some of da tings peopo might tell us, an wat we can say back to dem. Den wen we go talk to peopo, we can try fo relax, smile, an be nice.

8. How Christians jalike da clay jars da aposal Paul wen talk about?

⁸ Da aposal Paul wen tell his Christian braddahs an sistahs, “we da clay jars dat carry dis treasure.” (2 Cor 4:7, NWT.) Wat is dis treasure? Dass da preaching work dat can save peopo’s lifes. (2 Cor 4:1) Wass da clay jars? Dey rep God’s peopo who preach. Paul’s time, guys who wen buy an sell tings wen use clay jars fo carry importan stuff, like food, wine, an money. Same ting today, Jehovah trus us wit his importan message. Jehovah going help us an give us da powa we need fo keep preaching.

PRAY FO COURAGE

9. Even tho we sked how peopo going be, wat we can do fo keep preaching? (Go look da picha.)

⁹ Sometimes, maybe we sked peopo going go agains us wen we preach, o dey going shut us down. Wat we can do fo no let dose feelings stop us? Try tink about wat da aposals wen pray fo wen da leada guys wen tell dem fo no preach. Dey neva come sked an stop preaching, but dey wen ask Jehovah “fo no come sked wen we talk.” Fas Jehovah wen ansa dea prayer. (Jesus Guys 4:18, 29, 31) If sometimes we nervous fo preach cuz we sked how peopo going be, we gotta pray fo Jehovah help us. Ask Jehovah fo make oua love fo peopo grow so dat we no sked preach to dem.

10. How Jehovah help us fo preach? (Isaiah 43:10-12)

¹⁰ Jehovah wen pick us fo be his Witnesses an he promise fo give us courage. (Read um Isaiah 43:10-12.) We go look at four ways he do dat. Numba one, Jesus stay wit us weneva we go preach. (Mat 28:18-20) Numba two, Jehovah wen pick da angels fo help us. (Jesus Show 14:6) Numba three, Jehovah give us his spesho spirit fo help us rememba da tings we wen learn befoa. (John 14:25, 26) Numba four, Jehovah give us oua braddahs an sistahs fo go wit us wen we go preach. Wit Jehovah backing us up an da help from oua braddahood, we get eryting we need fo show courage an keep preaching.

BE FLEXIBLE, AN TINK POSITIVE

11. How you can find moa peopo wen you go preach? (Go look da picha.)

¹¹ You get bum out wen you no find peopo at home? Try go ask yoaself, “Wea da peopo stay?” (Jesus Guys 16:13) “Dey working o shopping?” If dass true, you tink you can find moa peopo preaching on da streets? One braddah name Joshua wen say, “I get chance fo preach to peopo walking thru da shopping centas an parking lots.” Him an his odda half Bridget, wen find moa peopo at home wen dey go in da evening time an Sunday aftanoons.​—Efe 5:15, 16.

12. How we can find out wat peopo believe o wat dey tinking about?

¹² Wen we preach to peopo an dey not interested, try fo figga out wat dey believe in an wat dey tinking about. Joshua an Bridget use da question on da front of one tract wen dey firs start talking to peopo. Wen dey use da tract Wat You Tink of Da Bible? dey say, “Some peopo tink da Bible is from God, oddas no tink so. Wat you tink?” Plenny times wen dey do dat, dey able fo talk story wit peopo.

13. Why we can feel good about preaching even if nobody lissen? (Smart Guys 27:11)

¹³ Even if nobody wen lissen to us wen we go preach, we still wen do good. How come? Cuz we wen do wat Jehovah an his Boy wanted us fo do. Dass fo go preach. (Jesus Guys 10:42) Even if we no talk to nobody o dey shut us down, we can feel good cuz we know we wen make Jehovah happy.​—Read um Smart Guys 27:11.

14. Why we happy wen oua braddah o sistah find somebody in da territory dat like lissen?

¹⁴ We can be happy wen one of oua braddahs o sistahs find somebody in da territory dat like lissen. Da Place Fo Watch From say dat da work we do is like looking fo one los kid. Plenny guys work togedda fo look fo um, an dey all spread out an cova one big area. Wen dey find da kid, erybody happy, not jus da guy who wen find um. Jus lidat, we work az one team fo preach an help peopo love Jehovah. Erybody gotta cova da territory, an erybody happy an exicted wen somebody new start fo come to da meetings.

TINK ABOUT YOA LOVE FO JEHOVAH AN PEOPO

15. How can Matthew 22:37-39 pump us up fo preach? (Go look da picha on da cova.)

¹⁵ We can get pumped up fo go preach wen we tink about oua love fo Jehovah an fo peopo. (Read um Matthew 22:37-39.) Try tink how happy Jehovah stay wen he see us doing da work an how happy peopo going be wen dey start fo study da Bible. An rememba dat dose who lissen an choose fo serve Jehovah can live foeva.​—John 6:40; 1 Tim 4:16.

16. Even if we stay stuck in oua house, how we can be happy preaching? Tell exampos.

¹⁶ Fo some reason, you stay stuck in yoa house? If dass you, tink about da stuff you can do fo show love fo Jehovah an fo peopo. Wen had da COVID-19 pandemic, Samuel an Dania was stuck inside dea house. Thru dat whole time, dey wen go preach on da phone, wen write lettas, an wen do dea Bible studies on top Zoom. Samuel wen preach to da guys who was at da clinic wea he wen get treatments fo cancer. He wen say, “Da hard stuff we wen go thru can be stressful, make us tired, an tes oua faith. We gotta see how we can be happy wen we serve Jehovah.” Wen all dis was going on, Dania wen fall down an no could leave her bed fo three months. Den afta dat she had fo stay in one wheelchair fo six months. She wen say, “I wen try fo do eryting I could do. I wen preach to da nurse who wen come my house, wen talk to da guys who wen deliver stuff to us, an wen talk story to da wahine who wen work fo one medical company.” Even tho Samuel an Dania no could do az much az dey wen do befoa, dey did wat dey could an was happy doing um.

17. How you can get da mos outa da stuff we wen talk about in dis lesson?

¹⁷ Da five tings we wen go ova in dis lesson work da bes wen we do um all togedda. Ery one of um is like one ingredient in one recipe. Wen you put um all togedda, you get someting dass real ono. If we do all da stuff we wen go ova, we going be able fo fight agains negative kine tinking an be moa happy wen we preach.