Jehovah Going Ansa My Prayers?

1-2. How come we might feel like Jehovah no ansa oua prayers?

“STAY good inside bout wat Da One In Charge stay do, den he goin give you eryting you like.” (Songs 37:4) Dass one awesome promise! But you tink Jehovah going give us eryting we ask fo right away? How come dass one good question? Try look dese exampos. One single sistah like go da School Fo Kingdom Evangelizas, so she pray about um. But years go by an she still neva hear notting. One young braddah ask Jehovah fo take away his sick so dat he can do moa in da hui. But his health no come betta. Parents pray fo dea kid stay in da trut. But dea kid stop serving Jehovah.

² Maybe you wen ask Jehovah fo someting too, but you neva get um. An cuz of dat, you wen figga dat Jehovah ansa some guys prayers, but not yoas. O you might tink dat you had do someting wrong. One sistah name Janiceb wen feel lidat. Her an her husband wen pray to Jehovah cuz dey really wanted fo work at Bethel. She wen say, “We wen tink garans we going be in Bethel pretty soon.” But afta long time, dey still neva get invited. Janice wen say, “I was bum out an neva undastan. I wen tink, I wen do someting fo hurt Jehovah o wat? I wen pray to Jehovah so much about going Bethel. How come he neva ansa my prayer?”

3. Wat we going talk about in dis lesson?

³ Sometimes we might wonda if Jehovah even hear oua prayers. Even some faithful guys from long time ago wen feel lidat. (Job 30:20; Songs 22:2; Hab 1:2) Wat going help you know fo shua dat Jehovah going ansa yoa prayers? (Songs 65:2) Fo help ansa dat question, firs we gotta ansa dese three tings, (1) Wat Jehovah going do? (2) Wat Jehovah like us do? (3) How come maybe we gotta change wat we ask fo?

WAT JEHOVAH GOING DO?

4. Wat Jehovah promise fo do in Jeremiah 29:12?

⁴ Jehovah promise fo lissen to oua prayers. (Read um Jeremiah 29:12.) Oua God love us cuz we faithful to him, so he always going hear oua prayers. (Songs 10:17; 37:28) But dis no mean he going give us eryting we ask fo. Maybe we gotta wait til da new world come befoa we get some of da tings we pray fo.

5. Wat Jehovah tink about wen he lissen oua prayers? Try explain um.

⁵ Jehovah tink about his goal wen he lissen oua prayers. (Isa 55:8, 9) One of da tings he like is fo the whole earth be filled wit peopo who like lissen to him az dea Rula. But Satan wen say dat humans would be moa happy if dey rule demselfs. (Start 3:1-5) Fo prove dat wat da Devil wen say is one bulai, Jehovah wen let peopo rule demselfs. An dass how come get so much problems today. (Teacha 8:9) We know dat Jehovah not going take away all dese problems right now. Cuz if He wen do dat, some guys might tink dat dey can fix dea own problems an da way dey rule demselfs stay working.

6. How come we gotta believe dat Jehovah going always do wat is loving an right?

⁶ Wen peopo pray fo da same kine tings, Jehovah might ansa um in diffren ways. Like wen King Hezekiah was supa sick, he wen beg Jehovah fo help him get betta. Jehovah wen ansa him an wen heal um. (2 Ki 20:1-6) On da odda hand, wen da aposal Paul wen beg Jehovah fo take away “one sharp thorn inside [his] body,” probly one health problem, Jehovah neva get rid of um. (2 Cor 12:7-9) Den try look da exampo of da aposals James an Peter. King Herod wanted fo kill both dem guys. Da hui wen pray fo Peter an probly James too. Dey wen kill James, but one angel wen rescue Peter. (Jesus Guys 12:1-11) Maybe we wonda how come Jehovah wen save Peter an not James. Da Bible no tell.c But wat we know fo shua is dat Jehovah “no do notting wrong.” (Rules 32:4) An we know dat Jehovah wen love both Peter an James. (Jesus Show 21:14) Sometimes Jehovah maybe not going ansa oua prayers da way we like. But we trus dat Jehovah going ansa oua prayers in one loving an right way, so we not going complain about da way he choose fo ansa oua prayers.​—Job 33:13.

7. Wat we no like do, an how come?

⁷ We try not fo compare wat we going thru wit oddas. Maybe we ask Jehovah fo help us wit someting, but we no get wat we pray fo. An den we find out dat somebody else wen pray fo da same ting, an Jehovah ansa dea prayers. Dass wat wen happen to one sistah name Anna. She wen pray dat her husband, Matthew, get betta from cancer. Same time, two olda sistahs was fighting cancer too. Anna wen pray hard fo Matthew an fo da two sistahs. Da two sistahs wen get betta, but Matthew wen mahke. Anna wen wonda if Jehovah wen make da two sistahs get betta. An if He wen do dat, why He neva ansa her prayer fo make her husband get betta? We no can say fo shua how come da sistahs wen get betta. But we know Jehovah going wipe out all suffaring foeva, an he no can wait fo bring back all his frenz who wen mahke.​—Job 14:15.

8. (a) How Isaiah 43:2 tell Jehovah going help us out? (b) How prayer can help us wen we get problems? (Go look da video Prayer Helps Us to Cope.)

⁸ Jehovah always going help us out. Like one loving Faddah, Jehovah no like see us suffa. (Isa 63:9) Oua problems can be like rivas o fire, an he no stop all dem from happening. (Read um Isaiah 43:2.) But he promise fo help us “go thru” um. No matta wat kine problems we get, Jehovah going make um so dat we can keep oua frenship wit him strong. (Luk 11:13; Php 4:13) He give us his spesho spirit fo help us hando. An cuz of dat we know fo shua he going always give us wat we need fo hang in dea an stay faithful to him.d

WAT JEHOVAH LIKE US DO?

9. How James 1:6- 8 show us how come we gotta trus Jehovah going help us?

⁹ Jehovah like us trus him. (Heb 11:6) Sometimes oua problems feel like is way too big fo get ova. Maybe we going start fo doubt wedda Jehovah going help us. But da Bible promise us dat wit God’s powa we can “climb ova da wall.” (Songs 18:29) So instead of letting oua doubts take ova, we should pray wit full on trus dat Jehovah going ansa oua prayers.​—Read um James 1:6-8.

10. Try tell wat kine ways we gotta work wit oua prayers.

¹⁰ Jehovah like us work wit oua prayers. Like one braddah might ask Jehovah fo help him get off from his job so dat he can go one big kine meeting. How Jehovah might ansa dat prayer? Maybe He going give da braddah da guts fo talk to his boss. But da braddah still yet gotta go ask fo da time off. An maybe he gotta ask moa den one time. O maybe he can ask fo trade shifts wit anodda worka o work anodda day. An if gotta, he can say he can take time off witout getting paid.

11. Why we gotta keep praying about da tings dass importan to us?

¹¹ Jehovah like us fo keep praying about tings dass importan to us. (1 Tess 5:17) From wat Jesus wen say, sometimes we not going get wat we ask fo right away. (Luk 11:9) So no give up! Pray from da heart an no stop. (Luk 18:1-7) Wen we keep praying about someting, we show Jehovah dat it stay importan to us. An we show dat we get faith dat He can help us.

HOW COME MAYBE WE GOTTA CHANGE WAT WE ASK FO?

12. (a) Wat is one question fo ask ouaselfs about da tings we pray fo, an how come? (b) How we can make shua we show respeck fo Jehovah wen we pray? (Go look da box “I Show Jehovah Respeck Wit Da Tings I Ask Fo?”)

¹² If we no get wat we wen ask fo, maybe we gotta ask ouaselfs three questions. Da firs one is, “I stay pray fo da right ting?” Plenny times we tink we know wass bes fo us. But wat we ask fo maybe not da bes ting. If we praying about one problem, maybe get one betta way fo fix um den da way we wen ask fo. An some of da tings we wen ask fo, maybe no match up wit wat Jehovah like. (1 John 5:14) Like da parents we was talking about earlia. Dey wen ask Jehovah fo keep dea kid in da trut. Seem like one good ting fo ask fo. But Jehovah no force anybody fo serve him. He like erybody, even oua kids, fo choose fo worship him. (Rules 10:12, 13; 30:19, 20) So instead, da parents could ask Jehovah fo help dem reach dea kid’s heart, so dea kid learn fo love Jehovah an fo be His fren.​—Smart Guys 22:6; Efe 6:4.

13. In Fo Da Hebrew Peopo 4:16, wen Jehovah going help us? Try explain um.

¹³ Anodda question is, “Stay Jehovah’s time fo ansa me?” Maybe we feel like Jehovah gotta ansa us right now. But Jehovah know da bes time fo help us. (Read um Fo Da Hebrew Peopo 4:16.) But if He no ansa us right away, maybe we tink Jehovah telling us “No.” But maybe he telling us “Not yet.” Like da young braddah who wen pray to Jehovah take away da sick. If Jehovah wen make one miracle happen an take away his sick, Satan could say dat da braddah ony serving Jehovah cuz Jehovah wen heal him. (Job 1:9-11, NWT; 2:4) An Jehovah awready get one time he going take away erybody’s sick. (Isa 33:24; Jesus Show 21:3, 4, NWT.) Til dat time come, we no can expeck Jehovah fo make miracles happen. So da braddah can ask Jehovah fo help him be strong an no worry, so dat even tho he sick he can still serve Jehovah.​—Songs 29:11.

14. Wat you learn from wat wen happen to Janice?

¹⁴ Rememba wat wen happen to Janice, who wen pray about going Bethel? Afta five years she wen undastan dat Jehovah wen ansa her prayers, but in one diffren way den she wen expeck. She wen tell, “Jehovah had fo teach me plenny stuff, like how fo be one betta Christian. My trus in him needed fo grow. An I had fo learn how fo study moa betta. I had fo learn fo be happy serving Jehovah no matta wea I stay.” Layta on dey wen ask Janice an her husband fo go do circuit work. Wen she had tink back, Janice wen tell, “Jehovah wen ansa my prayers, but not in da way I wen expeck. It took a while fo see how unreal Jehovah’s ansa was, but I so tankful I got fo see his love fo me.” 

15. Why we gotta be not supa specific in oua prayers? (Go look da pichas.)

¹⁵ Da third ting can ask is, “I need fo pray fo someting else?” Even tho is good fo be specific wen we pray, sometimes is betta if we not supa specific in oua prayers cuz den we can see wat Jehovah like fo us. Try tink about da single sistah who was praying fo go to da School Fo Kingdom Evangelizas. She wanted fo go to da school so dat she could go wea need moa help fo preach. Az she keep praying fo be invited to da school, anodda ting she could do is ask Jehovah fo help her find odda ways fo do moa fo Him. (Jesus Guys 16:9, 10) Den she could work wit her prayer by asking da circuit ovaseah if get any local huis close by her dat need help. O she could write to da branch office wea she stay fo ask if get one place wea need moa help.e

16. Wat we know fo shua?

¹⁶ Like we wen learn, we can know fo shua dat Jehovah going ansa oua prayers da right way dat going show plenny love. (Songs 4:3; Isa 30:18) Sometimes he not going ansa da way we tink. But Jehovah always going hear oua prayers. He get plenny love fo us an he neva going bag from us. (Songs 9:10) So “trus God foeva,” an tell him in prayer eryting dat stay in yoa heart.​—Songs 62:8.