How Jehovah Ansa Oua Prayas

1-2. Wen we pray, wat we wonda about sometimes?

YOU eva wonda if Jehovah ansa yoa prayas? If you did, you not da ony one. Plenny braddahs an sistahs had tell dat dey wonda about dis wen dey go thru hard times. Wen we suffa, maybe we get hard time fo figga out how Jehovah stay ansa oua prayas.

² Now we go check out how we know fo shua dat Jehovah ansa da prayas of all da guys who worship him. (1 John 5:15) An we goin talk about dese questions: How come sometimes feel like Jehovah no stay ansa oua prayas? How Jehovah ansa oua prayas today?

JEHOVAH NO ALWAYS ANSA DA WAY WE TINK HE SHOULD

3. How come Jehovah like us pray to him?

³ Da Bible tell us dat Jehovah love us an we worth real plenny to him (Hag 2:7; 1 John 4:10) Dass why he like us ask fo help wen we pray. (1 Pet 5:6, 7) He like help us fo stay close to him an come out winnas wen we stay getting hard time.

4. How we know Jehovah ansa da prayas of his worshipas? (Go look da picha.)

⁴ Plenny times in da Bible, we read dat Jehovah wen ansa da prayas of da guys dat worship him. Try tink about King David. Plenny times his life was in danger cuz guys was goin agains him, but erytime he go pray to Jehovah fo help. One time he wen beg Jehovah: “Try lissen wen I pray to you. Cuz I stay beg you fo help me, lissen up! Do someting fo help me, cuz I know I can trus you an I know you do da right ting erytime.” (Songs 143:1) Jehovah wen ansa David’s prayas fo help. (1 Sam 19:10, 18-20; 2 Sam 5:17-25) David wen know fo shua dat Jehovah “stay ready fo help all da peopo dat yell fo him help um.” Us guys can feel da same way too.​—Songs 145:18.

5. Jehovah always ansa da prayas of his worshipas befoa time da way dey wen like? Try give one exampo. (Go look da picha.)

⁵ Sometimes Jehovah no ansa oua prayas da way we like. Dass wat wen happen to da aposal Paul. He wen ask Jehovah fo hemo da “thorn inside his body.” Three times Paul wen pray about dis problem. So wat, Jehovah wen ansa his prayas? Yeah, but not da way Paul wen like. Jehovah neva take away da problem, but he wen give Paul da powa he wen need fo keep working fo Him.​—2 Cor 12:7-10.

6. Sometimes how come look like Jehovah no stay ansa oua prayas?

⁶ Sometimes we get one ansa dat was diffren from wat we was tinking. But we no need worry, Jehovah know da bes way fo help us. “Wateva we go aks him fo do, o wateva we figga he can do, he can do mo plenny den dat.” (Efe 3:20) Az how come wen he ansa oua prays we donno wen o how he goin do um.

7. How come sometimes we gotta change up oua praya? Try give one exampo.

⁷ Maybe we gotta change up oua praya wen we see moa betta wat Jehovah like fo happen. Dass wat wen happen to Martin Poetzinger. Right afta he wen get married, Braddah Poetzinger wen end up getting lock up in da Nazi concentration camp. Firs, he wen ask Jehovah fo get him outa dea so he could take kea his wife an go back preach. But afta two weeks, neva look like Jehovah was goin get him out. So he wen change his praya an wen ask Jehovah: “Show me wat you like me do.” Den he wen start fo tink about da odda braddahs in da camp an wat dey was goin thru. Plenny of dem was worried about dea wife an dea kids. So den Braddah Poetzinger wen pray: “Jehovah, mahalo fo my new job. Help me fo make my braddahs moa strong an give um good kine words.” Fo da nex nine years dass wat he wen do.

8. Wat one importan ting we gotta rememba wen we pray?

⁸ We gotta rememba Jehovah awready pick da time fo do wat he like. Wat he like do is hemo foeva all da problems dat make us suffa today—like natural kine disastas, peopo get sick an dey mahke. Jehovah goin use his govament fo get rid of all dat. (Dan 2:44; Jesus Show 21:3, 4) But till dat time, he stay let Satan be in charge of da world.b (John 12:31; Jesus Show 12:9, NWT) If Jehovah fix all da problems in da world right now, goin look like Satan doing one good job. So even tho Jehovah neva do eryting he wen promise fo do yet, dat no mean he no goin help us. We go check out some ways Jehovah help us.

SOME WAYS JEHOVAH ANSA OUA PRAYAS TODAY

9. How Jehovah can help us wen we get one choice fo make? Try give one exampo.

⁹ He give us da smarts. Jehovah promise fo give us da smarts we need fo make good choices. Speshly wen da choices can change da res of oua life, like wedda fo stay single o get married. (Jam 1:5) Go check out wat dis single sistah name Maria wen do.c She wuz having good fun az one pionea wen she wen meet dis braddah. She wen tell, “We wen come good frenz an we wen start fo like each odda.” I know I had fo make one choice. So I wen pray long time about um. I wen need Jehovah’s help but I wen know he no was goin make da choice fo me.” She wen feel Jehovah wen ansa her prayas fo wat fo do. Cuz wen she wen look fo ansas to her questions, she wen go find articles dat was goin help her. Her maddah who was faithful had good tings fo tell her, an she wen lissen to dat. Da good kine words Maria wen get wen help her figga out how she really wen feel. Afta all of dat, she could make one good choice.

10. In Fo Da Philippi Peopo 4:13, wat Jehovah goin do fo help da guys dat worship him? Try give one exampo. (Go look da picha.)

¹⁰ He give us da powa fo hang in dea. Jalike he wen do fo da aposal Paul, Jehovah can give us da powa fo hang in dea wen we get pilikia (Read um Fo Da Philippi Peopo 4:13.) Try look how Jehovah wen help braddah Benjamin wen he had pilikia. From small kid time him an his ohana wen live in refugee camps in Africa. He tell: “I wen pray all da time to Jehovah fo ask him fo give me da powa fo do wat He like. Jehovah wen ansa my prayas by making um so notting bodda me. I no sked fo keep preaching an he give me eryting I need fo stay close to him.” He also wen tell: “Reading about braddahs an sistahs an how Jehovah wen help dem fo hang in dea, wen make me like do eryting I can fo stick close to Jehovah.”

11-12. How Jehovah can use oua braddahs an sistahs fo ansa oua prayas? (Go look da picha.)

¹¹ He use oua spiritual ohana. Da night befoa Jesus wen mahke fo us he wen pray real hard. He wen beg Jehovah fo no lettum go thru da shame of oddas tinking he had talk bad agains God. But Jehovah neva do dat. He wen sen one angel fo make him come strong. (Luk 22:42, 43) Jehovah can do da same ting fo us, by using one braddah o sistah fo call o visit us. All us guys can look fo ways fo give “good kine words” to oua spiritual ohana.​—Smart Guys 12:25.

¹² Try look wat wen happen to one sistah name Miriam. Afta her husband wen mahke, Miriam wen feel all alone, lost, sad an no moa hope. She no could stop crying an needed fo talk to somebody. She was telling: “I neva feel like calling anybody so I wen pray to Jehovah. Wen I was still crying an praying, my phone wen ring. Was one elda, my good fren.” Dat elda an his wife wen help Miriam feel good inside. She wen know fo shua dat Jehovah wen make dis braddah call her.

13. Try give one exampo of how Jehovah use da guys dat no worship him fo ansa oua prayas.

¹³ He can use peopo dat no worship him. (Smart Guys 21:1) Sometimes, Jehovah use peopo dat no worship him fo ansa da prayas of his peopo. Wen Nehemiah wen ask King Artaxerxes fo go back Jerusalem fo help build up da city again, Jehovah wen make da king tell is okay. (Neh 2:3-6) Same same today, Jehovah can make guys dat no worship him help us wen we need um.

14. Wat you wen like about wat Soo Hing wen go thru? (Go look da picha.)

¹⁴ One sistah name Soo Hing wen feel dat Jehovah wen use her docta fo help her. Her son suffa from plenny mental problems. Wen he wen get into one bad accident, her an her husband wen quit dea job fo take kea him. Cuz a dat, dey had money problems. Soo Hing tell she wen feel like one rubber band dat stay stretch to da max an ready fo broke. She wen tell eryting to Jehovah an ask him fo help. Had one docta dat wen find one way fo help her an her family. Cuz a dat, dey wen get help from da govament an wen find one place dat dey can pay da rent. Afta dat Soo Hing wen tell: “We wen see Jehovah helping us. Fo shua he da one dat lissen us wen us guys pray.”​—Songs 65:2.

TAKE FAITH FO LOOK FO AN LISSEN TO JEHOVAH’S ANSA

15. Wat wen help one sistah fo see dat she was getting ansas to her prayas?

¹⁵ Mos times Jehovah no make one big show fo ansa oua prayas. But da ansas we get, goin be jus wat we need fo stay tight wit Jehovah oua Faddah in heaven. So make shua you look fo how Jehovah ansa yoa prayas. One sistah name Yoko wen feel Jehovah no was answering her prayas so she wen start fo write down da tings she wen ask Jehovah fo. Layta on, she wen go look inside her notes an wen come fo see Jehovah wen ansa almos all her prayas, even some she wen foget about. Ery once in a while we gotta take time fo tink about how Jehovah stay ansa oua prayas.​—Songs 66:19, 20.

16. Wen come to praya, how we can show oua faith? (Fo Da Hebrew Peopo 11:6)

¹⁶ We show oua faith not ony by praying to Jehovah but by lissening to his ansa no matta wat it is. (Read um Fo Da Hebrew Peopo 11:6.) Try look wat wen happen to Mike an his wife Chrissy. Dey wanted fo go work at Bethel. Mike tell: “We wen sign up az one couple plenny times an we wen pray to Jehovah ova an ova fo make dis happen. But notting eva happened.” Mike an Chrissy was shua dat Jehovah know wat was goin be da bes way fo dem work fo him. So dey jus wen keep on doin wat dey can, preaching full time wea need help an work on construcktion projects fo Jehovah’s hui. Today dey stay in da traveling work. Mike tell: “Jehovah no always ansa oua prayas da way we tink, but he goin ansa dem. An sometimes in one moa betta way den we eva wen tink.”

17-18. Wat we know fo shua from wat Songs Fo God 86:6, 7 tell?

¹⁷ Read um Songs Fo God 86:6, 7. Wen David wen write dis, he was shua dat Jehovah wen hea him an wen ansa his prayas. You can feel lidat too. Da guys we wen talk about in dis lesson help us know fo shua dat Jehovah can give us da smarts an da powa we need fo hang in dea. Jehovah can use oua braddahs an sistahs an even da guys who no worship him yet fo help us.

¹⁸ Even if Jehovah no always ansa oua prayas da way we tink, we know dat he goin ansa dem. He goin give us wat we need an wen we need um. So believe dat Jehovah goin hea you an no stop praying. He goin take kea of you now. An in da new world he goin give “stuff to eryting dat stay alive fo dem no need notting no moa.”​—Songs 145:16.