Make Oua Prayas Moa Betta

1. Wat Jehovah like his peopo do? (Go look da picha.)

IF WE need help an donno wat fo do, who we can go to? We know awready. We can pray to Jehovah. He like us pray plenny—“fo talk to [Him] erytime.” (1 Tess 5:17) He no like us feel shame fo pray to him an ask him fo help fo wateva stay goin on in oua life. (Smart Guys 3:5, 6) Cuz Jehovah not stingy, no moa limit on how much times us can pray to him. 

2. Wat we goin talk about in dis lesson?

² Praya is unreal. But cuz we get so much goin on, sometimes is hard fo find time fo do um. Maybe we feel like we gotta make oua prayas moa betta. Good ting da Bible can help us fo know how fo do all dat. In dis lesson, we go learn from Jesus how we can make time fo pray. An den we goin talk about five tings dat goin make oua prayas moa betta.

JESUS WEN MAKE TIME FO PRAY

3. Wat Jesus wen know about praya?

³ Jesus wen know dat praya wuz importan to Jehovah. Way befoa Jesus wen come to da earth, he wen see his Faddah ansa da prayas of da guys who wen trus him. He was dea wit his Faddah wen He wen ansa da prayas of Hannah, David, Elijah, an oddas. (1 Sam 1:10, 11, 20; 1 Ki 19:4-6; Songs 32:5) Dass how come Jesus wen teach his guys fo no hold back an pray all da time!​—Mat 7:7-11, New World Translation.

4. Wat we learn from Jesus’ prayas?

⁴ By da way Jesus wen pray to his Faddah, Jehovah, he wen show his guys how fo do um. Jesus wen pray plenny da whole time he was preaching. Cuz he was busy an always had peopo aroun him, Jesus had fo make time fo pray. (Mar 6:31, 45, 46) He wake up early in da morning so he can pray by himself. (Mar 1:35) One time wen he had one importan choice fo make, he wen go pray all night. (Luk 6:12, 13) Da night befoa he wen mahke, Jesus wen pray ova an ova fo make shua he pau da job he wen come to da earth fo do.​—Mat 26:39, 42, 44.

5. How us can copy Jesus wen we pray?

⁵ Jesus wen show us dat no matta how busy we stay, we gotta make time fo pray. Jus like Jesus, we gotta save time fo pray—eidda waking up moa early o staying up moa late. Wen we do dat, we show Jehovah dat praya is spesho to us. One sistah named Lynne rememba how she wen feel da firs time she wen learn about praya. She tell, “Wen I wen find out I could talk to Jehovah anytime, He wen come like one close fren an I wanted fo pray to him moa betta.” Garuntee plenny of us feel lidat. We go look five tings fo pray about.

FIVE IMPORTAN TINGS FO PRAY ABOUT

6. From wat tell in Jesus Show 4:10, 11, wat Jehovah should get?

⁶ Tell how awesome Jehovah. John wen see someting unreal. He saw 24 eldas in heaven an dey was worshipping Jehovah. Dey wen tell how awesome God stay, an dat he “get da right fo erybody tell dat [he] stay awesome an show respeck fo [him], an let [him] take charge a dea powa.” (Read um Jesus Show 4:10, 11.) Da angels who trus Jehovah get plenny reasons fo show respeck an tell how awesome he stay. Dey stay wit him in heaven an know him real good. Dey see wat kine God him by da tings he do. Wen dey see him in action, dey like tell he awesome.​—Job 38:4-7.

7. Wat kine tings we can tell Jehovah he awesome fo?

⁷ Us too wen we pray to Jehovah, we like tell him he awesome by telling him wat we love about him. Wen you read an learn from da Bible, try look fo tings dat you like about Jehovah. (Job 37:23; Rome 11:33) Den tell Jehovah how you feel about um. Anodda ting we can tell Jehovah he awesome fo, is how he take kea us an all oua spiritual ohana. He all da time take kea an proteck us.​—1 Sam 1:27; 2:1, 2.

8. Why we like tell Jehovah mahalo plenny? (1 Fo Da Tessalonika Peopo 5:18)

⁸ Mahalo Jehovah. We get plenny reasons fo tell Jehovah mahalo wen we pray. (Read um 1 Fo Da Tessalonika Peopo 5:18.) We can tank him fo all da good tings we get cuz all dat come from him. (Jam 1:17) We can tell him tanks fo oua unreal earth an all da mean kine stuff he wen make. We also tank him fo oua life, oua ohana, oua frenz, an da hope we get. An we like tell him mahalo plenny fo letting us come tight wit him.

9. Why we gotta work hard fo be tankful to Jehovah?

⁹ Sometimes is hard fo be tankful fo all da stuff Jehovah wen do fo us so we gotta really tink about um. In dis world plenny peopo not tankful. Dey ony tink about wat dey like so dey not tankful fo wat dey awready get. If we start fo tink lidat, wen we pray we ony goin ask fo stuff. Fo make shua dat no happen, we gotta work hard fo tell Jehovah mahalo plenny fo all da good stuff he do fo us.​—Luk 6:45.

10. How being tankful wen help one sistah fo hando? (Go look da picha.)

¹⁰ Being tankful can help us fo hando wen get hard time. Inside da January 15, 2015 The Watchtower, try look wat wen happen to Kyung-sook. Wen she wen find out her lung cancer wuz real bad awready she wen say, “Dis wen hit me hard. I wen feel like I wen lose eryting an I was all sked.” Wat wen help her? Ery night befoa she go sleep, she would go on top da roof of her house an pray out loud about five tings she was tankful fo dat day. Dat wen help her not fo be sked an she wen like tell Jehovah how much she love him. She wen see dat get way moa good kine tings dat happen in oua life den bad stuff, an how Jehovah help da guys who trus him fo hando wen get hard time. Like dis sistah, all us get plenny reasons fo be tankful to Jehovah even if we getting hard time. Wen we tank Jehovah in praya dat goin help us fo keep oua feelins in check an get us thru hard times.

11. How come Jesus guys needed guts afta he wen go heaven?

¹¹ Ask Jehovah fo da guts fo go preach. Right befoa Jesus wen go back heaven, he wen remind his guys fo “tell da peopo in Jerusalem wat you know bout me, an same ting fo da peopo all ova Judea, Samaria, an all ova da world.” (Jesus Guys 1:8; Luk 24:46-48) Litto while afta dat, da Jew leadas wen grab Peter an John an bring dem in front da Jew court, an tell um dey betta not preach anymoa. (Jesus Guys 4:18, 21) Wat Peter an John wen do?

12. Wat Jesus followas wen do in Jesus Guys 4:29, 31?

¹² Peter an John tell da Jew leadas, “You guys go figga wat God figga: You figga az mo betta fo do wat you guys tell peopo fo do, o mo betta fo do wat God tell peopo fo do? Cuz us guys, no way us can no talk bout da tings we wen see an hear.” (Jesus Guys 4:19, 20) Wen Peter an John wen get let go, Jesus followas wen say one praya out loud about wat Jehovah wanted dem fo do. Dey wen pray: “Give us da kine powa fo no come sked wen we talk.” Jehovah wen ansa dat praya.​—Read um Jesus Guys 4:29, 31.

13. Wat we learn from wat wen happen to Jin-hyuk?

¹³ We can copy Jesus followas an no stop preaching even wen da govament guys tell us we no can anymoa. Try look wat wen happen to Jin-hyuk, one braddah who wen get lock up cuz he neva like take one side. Inside da prison he had fo take kea da guys in solitary confinement, an he no could talk story wit dem about anyting, not even da Bible. He wen pray fo da guts fo talk about da Bible weneva he could in one way dat no make trouble. (Jesus Guys 5:29) He wen tell, “Jehovah wen ansa my prayas fo no be sked an give me da smarts fo help plenny guys learn da Bible five minutes at a time right dea at da cell door. Den night time I would write lettas dat I would give to dem da nex day.” Jus like Jin-hyuk, we can pray to Jehovah fo da guts an da smarts, an know fo shua dat He goin help us fo preach.

14. Wat can help us fo hando oua problems? (Songs Fo God 37:3, 5)

¹⁴ Ask Jehovah fo help you hando yoa problems. Plenny of us gotta deal wit problems wit oua body an oua mind, somebody we love had mahke, problems in oua ohana, guys goin agains us, o any odda kine pilikia you get. An on top of dat, tings like pandemics an wars make all dose tings moa hard. No hold back, tell Jehovah eryting jalike you would tell one good fren. Know fo shua dat Jehovah goin help you . . . “trus him, an he goin do um.”​—Read um Songs Fo God 37:3, 5.

15. How praya help us fo “hang in dea wen you get any kine hard time”? Try tell one exampo.

¹⁵ If you pray to Jehovah all da time, dat goin help you fo “hang in dea wen you get any kine hard time.” (Rome 12:12) Jehovah know wat all da guys who worship him stay goin thru—“wen dey yell fo him help dem, he lissen.” (Songs 145:18, 19) Dass wat wen happen to Kristie, one 29-year-old pionea. Outa no wea she started fo have mayjah kine health problems. Cuz of dat, she wen suffa from bad depression. Afta dat, she wen find out dat her maddah was sick an was goin mahke. Kristie wen tell, “I wen pule hard to Jehovah fo help me get thru ery single day. I wen try hard fo no miss goin to da meeting an fo study on my own too. Praya wen get me thru da hardes times. Dat wen make me feel betta, cuz I wen know Jehovah was right dea by me. Even if my health problems no was fix right away, Jehovah wen ansa my praya an make my heart res inside.” No foget, Jehovah “know how fo get peopo outa trouble wen dey lissen him.”​—2 Pet 2:9.

16. How come us need Jehovah’s help fo no do bad kine stuff?

¹⁶ Ask Jehovah fo help us no do bad kine stuff. Cuz we no stay perfeck, we gotta always fight fo no do bad kine stuff. Satan stay goin all out fo make us lose dat fight. He try make da stuff peopo do fo fun pilau, like da tings we watch, read, o lissen to. Dis can jam up how we tink an make us do bad kine stuff dat can cut us off from God.​—Mar 7:21-23; Jam 1:14, 15.

17. Wen we pray fo no do bad kine stuff, wat we gotta do fo match up wit um? (Go look da picha.)

¹⁷ We need Jehovah’s help if we goin win da fight fo no do bad kine stuff. Wen Jesus was teaching peopo how fo pray, he wen tell dem fo ask: “Help us fo no give in wen we get presha fo do someting wrong. Proteck us from da Devil.” (Mat 6:13, NWT) Jehovah like help us, but we gotta ask him fo help. Da stuff we do gotta match up wit wat we pray fo. Get tings we can do so dat we not aroun Satan’s tinking too much. (Songs 97:10) We can put good tings inside oua mind by reading an studying da Bible. Goin to da meetings an goin out preaching goin proteck da way we tink. An den Jehovah promise he not goin let us get moa presha den we can hando.​—1 Cor 10:12, 13.

18. Wat all us gotta do wen come to praya?

¹⁸ Befoa da world come pau, tings goin come moa hard so all us, moa den eva, gotta pray to Jehovah fo stick close to him. Make time ery day fo pray from da heart. Jehovah like us “tell him eryting [we] tink bout” wen we pray. (Songs 62:⁠8) Tell him he awesome an mahalo him fo eryting he do. Ask him fo help us fo no be sked fo go preach. Beg him fo help you hando yoa problems an fo no do bad kine tings. No let notting stop you from praying to Jehovah all da time. But how Jehovah ansa oua prayas? We goin find out in da nex lesson.