Yoa Hope Fo Da Future Going Come True

1. How come we know Abraham’s hope was one shua ting?

JEHOVAH wen promise his fren Abraham dat he was going do good tings fo da peopo all ova da world thru his boy. (Start 15:5; 22:18, NWT) Cuz Abraham’s trus in God was solid, he wen know dis promise was going come true. But Abraham was 100 year old an his wife was 90, an dey still neva have one boy. (Start 21:1-7) An yet da Bible tell, “Abraham wen trus God an wait fo God do someting . . . Az how he come da faddah fo plenny diffren kine peopos, jalike da Bible befoa time tell.” (Rome 4:18) You know wat Abraham had hope fo wen happen. He wen come da faddah to Isaac, da boy he was waiting long time fo. How Abraham could know fo shua dat Jehovah was going do dat?

2. How come Abraham wen know fo shua dat wat Jehovah promise going come true?

² Cuz he was tight wit Jehovah, Abraham “wen know fo shua dat wateva God wen promise fo do, he strong enuff fo do um.” (Rome 4:21) Jehovah sed Abraham get um right wit Him cuz of his faith. (Jam 2:23) Jalike wat tell at Fo Da Rome Peopo 4:18, Abraham’s faith an hope was conneckted to each odda. Now we go look wat Paul wen tell about hope in Fo Da Rome Peopo chapta 5.

3. Wat Paul tell us about hope?

³ Paul tell how come we can be “shua dat God goin do all dis, we no need worry notting.” (Rome 5:5) An he help us fo see how fo make oua hope moa strong. We go look Fo Da Rome Peopo 5:1-5, an try tink how ova time yoa hope wen come moa strong. Dis lesson going show how you can make yoa hope come even moa strong den stay now. Firs we go look at da awesome hope dat Paul wen talk about dat we know fo shua going come true.

OUA AWESOME HOPE

4. Wat talk about in Fo Da Rome Peopo 5:1, 2?

⁴ Read um Fo Da Rome Peopo 5:1, 2.  Paul wen write dese words to da local hui in Rome. Da braddahs an sistahs ova dea wen learn about Jehovah an Jesus, put dea trus in dem, an wen come Christians. Dey wen do dat, an God had tell, “dey get um right wit him” cuz of dea trus. Den God wen use his spesho spirit fo pick dem. Dose guys wen get one awesome hope.

5. Wat hope da guys God wen pick get?

⁵ Layta on Paul wen write to da Christians in Efesus about da hope dat God wen give dem. Da hope dey was going get “az jalike da same ting you goin give all yoa kids.” (Efe 1:18) Paul even wen tell da Christians in Colosse dat dea hope was going be in heaven wen he wen tell dem, “God get someting good fo you guys up dea wit him in da sky.” (Col 1:4, 5) Da hope fo da Christians God wen pick, is fo come back alive an live foeva in heaven afta dey mahke. Ova dea dey going rule wit Christ.​—1 Tess 4:13-17; Jesus Show 20:6.

6. Wat one braddah God wen pick fo go heaven sed about da hope he get?

⁶ Fo da guys God wen pick fo go heaven, dea hope is worth plenny to dem. One of dem, Braddah Frederick Franz wen tell how he wen feel about his hope. He wen say, “Oua hope is one shua ting an going come true fo ery one of da 144,000. Going be even betta den wat we eva thought.” Afta he wen serve God long time, he still wen feel da same way. “Dat hope still worth plenny to us. . . . worth moa an moa da longa we wait. We not waiting fo notting, even if take one million years. I treasure dat hope now moa den eva befoa.”

7-8. Wat kine hope mos guys get? (Fo Da Rome Peopo 8:20, 21)

⁷ Most of da guys dat worship Jehovah today, get one diffren hope. Dea hope same like Abraham, fo live foeva on da earth unda God’s Govament. (Heb 11:8-10, 13) Paul wen write about dis unreal hope. (Read um Fo Da Rome Peopo 8:20, 21.) Wen you firs wen hear da Bible’s promise fo da future, wat you wen like da mos about um? Was dat you going be perfeck an no sin anymoa? O you was supa happy fo learn dat da guys you love who wen mahke going come back alive in da paradise? Cuz God wen give us hope we get plenny good kine tings fo wait fo.

⁸ No matta if we going go live in heaven o hea on top da earth, we stay happy cuz of da hope God give us. Dis hope we get can come even moa stronga. Paul tell us how dat can happen. So we go look wat he wen write. Wen we do dat, den we going be moa shua dat wat we hope fo going come true.

HOW WE COME MOA SHUA ABOUT OUA HOPE

9-10. Jalike Paul, wat Christians can expeck going happen to dem? (Fo Da Rome Peopo 5:3) (Go look da pichas.)

⁹ Read um Fo Da Rome Peopo 5:3. So, wen we get hard time, dass wat going help make oua hope moa shua. Sound funny kine ah. But az true, all da guys who follow Jesus going get hard time. Try look wat wen happen to Paul. He wen tell da Tessalonika peopo, “Wen we was wit you guys we stay tell you guys ova an ova dat we all goin suffa fo shua. An you guys know dat eryting wen happen jalike we wen tell you guys.” (1 Tess 3:4) An to da Corint peopo, he wen write, “We like you guys know da hard time we wen get . . . us even wen . . . figga we goin mahke.”​—2 Cor 1:8; 11:23-27.  

¹⁰ Jesus followas today can expeck hard time in one way o anodda. (2 Tim 3:12) You stay get hard time cuz you trus Jesus an stay follow him? Maybe yoa frenz an ohana stay make fun of you, o even be mean to you. Yoa boss o da guys you work wit give you hard time cuz you honest? (Heb 13:18) Da govament go agains you cuz you preach to oddas about yoa hope? No matta wat kine hard time we get, Paul tell we should be happy. How come?

11. Why we gotta make up oua mind fo hang in dea wen we get hard time?

¹¹ We can be happy wen we suffa cuz someting good going come out of um. Fo Da Rome Peopo 5:3 tell, “We know dat da hard time goin make us hang in dea moa betta.” Erybody dat follow Jesus going get hard time, so erybody dat follow Jesus gotta hang in dea. We need fo make up oua mind fo hang in dea no matta wat. Dass da ony way we going see oua hope come true. We no like be like da guys Jesus wen tell was like seeds dat fall on top da rocks. Guys lidat trus wat God tell at firs but “wen odda guys make [dem] suffa . . . [dey] give up.” (Mat 13:5, 6, 20, 21) Fo shua we no like go thru hard time, but if we hang in dea, going come out good fo us. How?

12. Wat good tings happen wen we hang in dea?

¹² James, one followa of Jesus, wen talk about how is good fo hang in dea wen we get hard time. He wen write, “Wen you guys go all out fo hang in dea, dat goin make you guys grow up an come moa strong inside, jalike you supposed to. So dat you guys no need notting moa.” (Jam 1:2-4) James wen tell dat wen you hang in dea, az not fo notting, someting good going come out of um. Wat is dat? Can help you be patient, make yoa faith come moa strong, an help you trus Jehovah moa. Get anodda importan ting we can get wen we hang in dea.

13-14. Wat we get wen we hang in dea an how dat conneck wit hope? (Fo Da Rome Peopo 5:4)

¹³ Read um Fo Da Rome Peopo 5:4. Paul tell wen us hang in dea, “make us come moa solid.” Wen we hang in dea, dat make Jehovah happy. Dis no mean dat Jehovah stay happy wen we going thru hard times. Wat Jehovah happy about is you. Wen you hang in dea dat mean you get um right wit God. An dass one unreal blessing!​—Songs 5:12.

¹⁴ Rememba, Abraham went thru plenny pilikia. But wen he wen hang in dea, dat wen make Jehovah happy. Jehovah wen look at him az his fren an wen tell he get um right wit him. (Start 15:6; Rome 4:13, 22) Same same wit us. We no make Jehovah happy ony cuz of how much work we do o wat we do fo him. He happy wit us wen we hang in dea cuz we trus him. So no matta how old you, wat stay going on in yoa life, o how much you can do, all us can hang in dea. If you getting hard time now but you hanging in dea an staying tight wit Jehovah, den you can know dat you making him happy. Wen you know you get um right wit God, da promises he make come moa shua to us. Dat going make oua hope moa strong.

ONE STRONGA HOPE

15. Wat anodda ting Paul wen tell, an how come dat might sound funny to some guys?

¹⁵ Like Paul wen tell, Jehovah happy wen we trus him an hang in dea wen we going thru hard time. But try look wat Paul tell nex, “Wen us guys come moa solid, den we stay shua dat bumbye God goin get us outa trouble. Wen us guys stay shua dat God goin do all dis fo us, we no need worry notting.” (Rome 5:4, 5) Dat might sound funny to some of us cuz earlia Paul had tell at Fo Da Rome Peopo 5:2 dat da Christians in Rome awready had hope wen he wen tell, “we stay shua dat bumbye God goin make us come awesome jalike him.” So somebody might ask, If da Christians awready was shua dat God going do all dis, how come Paul had fo talk about um again?

16. How hope start fo grow in one person? (Go look da pichas.)

¹⁶ Wen we tink about hope az someting dat grow, we can undastan wat Paul wen mean. Try picha dis. You rememba wen you firs wen learn from da Bible dat you can live foeva on one paradise earth? Maybe you was tinking dass too good fo be true. But da moa you wen learn about Jehovah an his promises inside da Bible, da moa you wen know garans going happen.

17. How yoa hope keep growing afta you get baptize?

¹⁷ Even afta you wen get baptize, you wen keep learning about Jehovah an love him moa. Cuz a dat yoa hope wen grow moa strong. (Heb 5:13–6:1) Probly wat tell in Fo Da Rome Peopo 5:2-4 wen happen to you. Wen you had any kine hard time, you wen hang in dea and wen know dat God was happy wit you. Cuz you wen know dat, you stay even moa shua dat you going get da tings he wen promise. Yoa hope is stronga den befoa. You believe um even moa. Dat change da way you treat yoa ohana, da choices you make, an even da way you spen yoa time.

18. Wat garuntee Jehovah give us?

¹⁸ Paul tell anodda importan ting about da hope we get cuz we get um right wit God. He tell us garans oua hope going come real. How we know? Dis wat Paul wen tell, “Wen us guys stay shua dat God goin do all dis fo us, we no need worry notting. Cuz us guys get da Good an Spesho Spirit God wen give us, dat make us feel inside how plenny love an aloha he get fo us guys.” (Rome 5:5) Fo shua you can trus dat hope Jehovah give you.

19. Wat you know fo shua about yoa hope?

¹⁹ Tink about wat Jehovah wen promise Abraham, how He was happy wit him, an how Jehovah wen see um as His fren. Abraham’s hope no was fo notting. Da Bible tell, “Abraham hang in dea an wait . . . den he get wat God wen promise.” (Heb 6:15; 11:9, 18; Rome 4:20-22) Jalike Abraham, we know fo shua dat if we show we get faith, wat we hope fo going come true. You get plenny reasons fo be happy cuz you know yoa hope going come real. You no need worry! (Rome 12:12) Paul wen write, “I like you guys stay real good inside an notting bodda you cuz you trus God . . . Den da Good An Spesho Spirit goin make you guys mo strong fo wait fo wat God goin do fo you guys bumbye.”​—Rome 15:13.