We Tankful Jehovah Let Us Go

1-2. How da situation we stay in jalike da young guy’s one?

TRY picha one young guy dat get rich parents. But one day, his parents get in one accident an mahke. Wen he find out wat happen, dis really shake him up. But someting else shock him even moa. He find out dat his parents wen blow all dea money, an dey stay in mayjah debt. So instead of passing down money to him, dey wen pass down dea debt, an get guys coming fo colleck. Wat he owe, he neva goin be able fo pay um off.

² Da situation we stay in jalike dis young guy’s one. Oua firs parents, Adam an Eve, wuz perfeck an wen live in one beautiful paradise. (Start 1:27; 2:7-9) Dey had chance fo live one happy life foeva. But den eryting wen change. Cuz dey wen sin, dey wen get kick outa Paradise an lose dea chance fo live foeva. Wat wuz da ony ting dey wen pass down to dea kids? Da Bible tell, “Da firs man Adam, he da one wen start fo do bad kine stuff. Az why God neva let um live foeva. An from dat time, all da peopo inside da world live jalike dat man. Cuz dey live lidat, same ting happen jalike wit dat man, erybody gotta mahke.” (Rome 5:12) Adam wen pass down sin to all us, an cuz of dat, we all mahke. Dis sin dat wuz pass down to us iz jalike one huge debt dat none of us can pay off.​—Songs 49:8, NEW WORLD TRANSLATION.

3. How oua sins jalike debt?

³ Da Bible talk about sins jalike debt. (Mat 6:12, NWT; Luk 11:4) Erytime we sin, az like we build up moa debt to Jehovah. He could make us pay da price fo oua sins. If dis debt no get paid, da ony way fo cancel um out iz wen we mahke.​—Rome 6:7, 23, NWT.

4. (a) Wat would happen if we no moa help? (Songs Fo God 49:7-9, NWT) (b) Wat da word “sin” can mean in da Bible? (Go look da box “Sin.”)

⁴ By ouaself, no ways we can get back all da stuff Adam an Eve wen lose. (Read um Songs Fo God 49:7-9, NWT.) Witout help, we no moa hope fo live foeva or fo come back alive. We goin mahke an neva live again, jalike da animals wen dey mahke.​—Teacha 3:19; 2 Pet 2:12.

5. How Jehovah wen help us fo pay fo oua sins? (Go look da cova picha.)

⁵ Tink about da young guy we wen talk about earlia. How you tink he would feel if one rich guy wen offer fo pay off all his debts? Garanz da young guy would be supa tankful an take da gif. Same lidat, oua loving Faddah, Jehovah, wen give us one gif dat pay fo da sin dat Adam wen pass down to us. Jesus wen explain um lidis, “God get plenny love an aloha fo da peopo inside da world. Dass why he sen me, his one an ony Boy. Cuz a dat, erybody dat trus me no goin get cut off from God foeva! Dey goin get da real kine life dat goin stay to da max foeva!” (John 3:16) Anodda ting dis gif do iz it give us chance fo be pono wit Jehovah.

6. Wat we goin talk about in dis lesson, an why?

⁶ How we benefit from dis awesome gif dat cut us loose from oua sins? Da ansa to dat question stay in da Bible wen it talk about tings like coming pono wit Jehovah, how He made da way fo us be his frenz, da ransom, how He cut us loose, an how we get um right wit Him. In dis lesson, we goin talk about wat all dose tings mean. An wen we tink hard about um, we goin be moa tankful fo how Jehovah let us go.

DA GOAL: COME PONO WIT JEHOVAH

7. (a) Wat else Adam an Eve wen lose out on? (b) Cuz we come from Adam an Eve, wat we need? (Fo Da Rome Peopo 5:10, 11)

⁷ Adam an Eve neva ony lose out on living foeva, but dey wen come enemies wit dea Faddah, Jehovah, too. Befoa dey had sin, dey wuz paht of God’s ohana. (Luk 3:38) But wen dey neva lissen an wen go agains Jehovah, dey wuz kick outa his family befoa dey had kids. (Start 3:23, 24; 4:1) None of dea kids could be paht of Jehovah’s ohana. Cuz we wen come from Adam an Eve, we need fo come pono wit Jehovah an make oua relationship good wit him. (Read um Fo Da Rome Peopo 5:10, 11.) We need fo stop bein God’s enemies an come his frenz. Wass unreal iz dat Jehovah made da firs move fo make dat happen. How he wen do dat?

WAT WUZ SET UP: GOD MADE DA WAY FO US BE HIS FRENZ

8. Wat God made da way fo?

⁸ God made da way so dat erybody can come his frenz. He wen set um up fo get back wat Adam wen lose by giving someting dass wort da same. In da Greek scripchas, it talk about how Jehovah wen make da way fo ery person be his fren.​—Rome 3:25

9. Wat Jehovah wen set up fo let da Israel peopo go fo dea sins?

⁹ So dat da Israel peopo could be frenz wit Jehovah, He wen set up one festival, one day a year, fo let dea sins go. On dat day, da main pries had fo sacrifice animals fo da peopo. Cuz animals no stay az spesho az humans, dose animal sacrifices couldn’t fully cova da sins of da Israel peopo. Az long az da Israel peopo wuz sorry an wen make da sacrifices dat Jehovah wanted dem fo make, He wen let dea sins go. (Heb 10:1-4) On top of dat, da sacrifices dey wen make on dat day an at odda times, wen help da Israel peopo fo see dat dey wen need someting moa fo fully cova ova dea sins.

10. Wat Jehovah wen do fo fully cova ova da sins of peopo?

¹⁰ Jehovah wen set someting up fo fully cova ova da sins of peopo. He wen sen his Boy fo “come one sacrifice ony one time fo da bad kine stuff plenny peopo wen do.” (Heb 9:28) Jesus gave his life az one ransom fo “cut loose plenny peopo from da powa dat da bad kine stuff get ova dem.” (Mat 20:28) Wat iz dat, one ransom?

DA PRICE: DA RANSOM

11. (a) Why one ransom price needed fo be paid? (b) Who ony could pay da ransom?

¹¹ In da Bible, Jehovah wen decide dat needed one ransom fo pay da price so dat oua sins can be let go an we can be frenz wit Him. Wat wuz da ransom dat had fo be paid so dat peopo could get wat Adam wen lose? Rememba dat Adam an Eve wen lose dea perfeck life an dea chance fo live foeva. So da price of da ransom had fo be da same az wat dey wen lose. (1 Tim 2:6) Ony could be paid by one full grown man who (1) wuz perfeck, (2) had da chance fo live foeva on eart, an (3) wuz willing fo give up his life fo us. Da life of dat person could pay fo wat Adam wen lose.

12. How come Jesus could pay da price of da ransom?

¹² We go look three reasons how come Jesus could pay da price of da ransom. (1) He wuz perfeck, “he neva do notting wrong.” (1 Pet 2:22) (2) Cuz of dat, he had chance fo live foeva on eart. (3) He wuz willing fo give up his life fo us. (Heb 10:9, 10) Jesus wuz one perfeck man jus like da firs man, Adam, befoa he wen sin. (1 Cor 15:45) So wen Jesus wen die fo us, he wuz able fo pay da exack price wen need fo pay fo wat Adam wen lose. (Rome 5:19) So Jesus wen come da “las Adam.” No need one odda perfeck person fo pay fo wat Adam los. Jesus wen mahke an “make sacrifice fo da peopo ony one time.”​—Heb 7:27; 10:12.

13. Wass da diffrence between God making da way fo us be his frenz an da ransom?

¹³ So den, wass da diffrence between God making da way fo us be his frenz an da ransom? Jehovah making da way fo peopo come frenz wit him iz da action he wen take. Da ransom iz da price he wen pay fo make dat happen. Jesus wen sacrifice his perfeck life fo pay da exack price fo oua sins.​—Efe 1:7; Heb 9:14.

WAT WEN HAPPEN: CUT US LOOSE AN GET UM RIGHT WIT GOD

14. Wat we goin go ova, an how come?

¹⁴ Wat wen happen cuz Jehovah wen set up one way fo us be frenz wit him? Fo find dat out, we goin go ova two tings da Bible say about wat Jehovah wen set up dat open up da way fo Him let us go. Wen we undastan dis, goin help us see how iz good fo us guys.

15-16. (a) In da Bible, wat it mean fo get cut loose? (b) How we feel cuz of dis?

¹⁵ Wen da Bible talk about getting cut loose, dat stay talking about bein let go cuz da ransom wuz paid. Da aposal Peter wen say um lidis, “You guys know dat Christ wen pay da price fo cut you guys loose from da wase time kine life dat yoa ancesta guys wen pass on to you. But Christ neva pay da price fo you guys wit da kine silva o gold money dat no las foeva, you know. He wen pay fo you guys wit his blood! Dat cost mo plenny den eryting! He wen mahke, jalike one good kine bebe sheep dat no mo notting wrong wit um an dey kill um fo da sacrifice.”​—1 Pet 1:18, 19.

¹⁶ Cuz of da ransom, we let go from sin an death, da tings dat cause plenny suffaring. (Rome 5:21) Garanz we feel like we owe Jehovah an Jesus plenny cuz dey wen cut us loose an pay wit Jesus blood.​—1 Cor 15:22.

17-18. (a) Wat dat mean fo get um right wit Jehovah? (b) How we benefit from dat?

¹⁷ Da Bible say dat Jehovah’s peopo get um right wit him. Dis mean dat we no need pay fo da sins dat we do. Even tho Jehovah do dis fo us, he still sticking to wat he say iz right an fair. We neva do notting fo get um right wit Jehovah, an same time he no say iz aurite fo sin. But Jehovah iz willing fo let oua sins go cuz we get fait in wat him an Jesus wen do fo pay da ransom.​—Rome 3:24; Gal 2:16.

¹⁸ How dis affeck all us? Da ones who wen get pick fo rule wit Jesus in heaven wen awready get um right wit God az His kids. (Titus 3:7; 1 John 3:1) He wen let go dea sins. Iz like dey neva even do um, an dass how come dey can be in God’s Govament. (Rome 8:1, 2, 30) Da guys dat get da hope fo live on top da eart wen get dea sins let go too, an dey get um right wit God fo be his frenz. (Jam 2:21-23) Da uku plenny peopo dat make um tru Armageddon get da chance fo neva mahke. (John 11:26) “Da guys dat stay do da right tings an da guys dat no do wass right” who wen mahke goin come back alive. (Jesus Guys 24:15; John 5:28, 29, NWT) Bumbye, all Jehovah’s kids on da eart goin “come free up fo come awesome too.” (Rome 8:21) We no can wait fo da time wea we come perfeck kids of oua Faddah, Jehovah!

19. How tings fo us wen get betta? (Go look da box “Wat It Mean Fo Us.”)

¹⁹ Oua situation wuz jalike da guy we wen talk about earlia dat wen lose eryting an had mayjah debt pass down to him dat he no could eva pay back. But Jehovah wen help us. Tings had change cuz Jehovah wen make da way fo oua sins get let go, an Jesus wen pay da ransom. Cuz we get fait in Jesus Christ, we cut loose from sin an death. Wen Jehovah let oua sins go, iz like it neva even happen. Da mos importan ting iz dat now we can have one good relationship wit oua Faddah, Jehovah.

20. Wat we goin talk about in da nex lesson?

²⁰ We supa tankful wen we tink about wat Jehovah an Jesus wen do fo us. (2 Cor 5:15) If dey neva do dat, we no moa hope! But cuz Jehovah wen let us go, wat dat mean fo ery one of us? Dass wat we goin talk about in da nex lesson.