STUDY LESSON 7
SONG 15 Praise Jehovah’s Firstborn!
Wen Jehovah Fogive, Wat Dat Mean Fo You
“You let peopo go fo real kine.”—SONGS 130:4, NWT.
MAIN TING WE GOIN LEARN
By checking out some word pichas in da Bible, we goin be moa tankful fo da way Jehovah fogive us.
1. Why iz hard fo kno wat somebody really mean wen dey say dey fogive you?
WEN somebody tell you, “No worry. I fogive you,” probly feel so good fo hea dat, speshly if you wen say or do someting fo hurt dem. Wat dat even mean, “I fogive you”? He trying fo tell you dat you still good frenz? Or he jus saying he no like talk about um anymoa? Wen peopo tell you dey fogive you, iz hard fo kno wat dey really tinking or feeling, cuz can mean diffren tings.
2. Wat da Bible tell about how Jehovah let peopo go? (Go look da extra info.)
2 Da way Jehovah let us go az imperfeck peopo iz way diffren den da way we let each odda go. Nobody fogive da way Jehovah fogive. Da song writa wen tell about Jehovah, “You let peopo go fo real kine, dass why dey get plenny respeck fo you.”a (Songs Fo God 130:4, NWT) Wen Jehovah fogive, he “let peopo go fo real kine.” He da one dat show us wat really mean fo do dat. Sometimes Bible writas wen use one Hebrew word fo show how Jehovah fogive dass neva used fo show how peopo fogive.
3. How da way Jehovah fogive diffren from da way we fogive? (Isaiah 55:6, 7)
3 Wen Jehovah fogive somebody, he wipe out dea sin. Dat mean no moa one strain on da relationship an we goin be close frenz wit Jehovah again. We supa tankful dat Jehovah full on let us go ova an ova again.—Read um Isaiah 55:6, 7.
4. How Jehovah help us undastan wat it mean fo let peopo go fo real kine?
4 If da way Jehovah fogive iz diffren from da way we fogive, how we can undastan wat it mean fo let peopo go fo real kine? Jehovah use word pichas fo help us undastan da way he fogive. In dis lesson, we goin go ova some of um. Dey goin show us how Jehovah wipe sin out an, same time, let us come close frenz wit him again. Az we go ova dese word pichas an see how oua Faddah let us go in plenny ways, we goin be tankful an love him even moa.
JEHOVAH TAKE AWAY SIN
5. Wat happen wen Jehovah let go oua sins?
5 In da Bible, we talk about sin like someting real heavy. King David wen talk about his own sins lidis, “I know you gotta punish me fo wat I wen do, but I no can handle dat. Jalike I gotta carry someting real heavy.” (Songs 38:4) But Jehovah let go da sins of da guys who fo real kine sorry. (Songs 25:18; 32:5) Da Hebrew word dey use fo “let go” basically mean fo “lif up” or “carry.” We can tink of Jehovah az one strong guy who lif da sin dat feel real heavy off oua shouldas an take um away.
“Let me go” (Songs 32:5)
6. How far Jehovah take away oua sins?
6 Anodda word picha show how far Jehovah take oua sins. Songs Fo God 103:12 tell, “You know how far da place da sun come up to da place da sun go down? Dass how far God wen awready take away da shame fo da tings us guys wen do agains him!” No moa notting moa far from wea da sun rise to wea da sun set. Dose two places neva meet up. Dis mean dat Jehovah take oua sins moa far den we can even tink. Make us feel so good fo kno dat Jehovah full on let us go!
“You know how far da place da sun come up to da place da sun go down” (Songs 103:12)
7. Wat da Bible say Jehovah do wit oua sins? (Micah 7:18, 19)
7 Even tho Jehovah take oua sins far away from us, he still yet hold on to um? No. King Hezekiah wen write dis about Jehovah, “You wen take all da bad kine stuff I wen do, an put um behind yoa back.” (Isa 38:9, 17) Dis word picha show dat Jehovah take da sins of da guys dass fo real kine sorry an throw um wea He no can see um. Can also say um lidis, “You wen make my sins like neva even happen.” Da Bible wen make um clear in anodda word picha dat stay at Micah 7:18, 19. (Read um.) Ova dea it talk about Jehovah taking oua sins an throwing um down inside da mos deep ocean. Long time ago, if somebody wen throw someting in da deep ocean, no way you could find um or get um back.
“You wen take all da bad kine stuff I wen do, an put um behind yoa back” (Isa 38:17)
“You goin throw all da bad kine stuff us guys wen do down inside da mos deep ocean” (Mic 7:19)
8. Wat we wen learn so far?
8 We wen learn dat da Bible show dat wen Jehovah let us go, he full on take away oua sins so dat we no need feel guilty about um anymoa. David wen say, “Da peopo dat wen broke da Rules From God, God let um go, an hemo dea shame. Az why dey stay good inside! Da peopo dat wen do da bad kine stuffs, God hemo dem from all da bad kine stuffs dey wen do. Peopo can stay good inside wen Da One In Charge no make one lis a da bad kine stuff dey wen do.” (Rome 4:7, 8) Dass wat you call letting somebody go fo real kine!
JEHOVAH WIPE OUT SIN
9. Wat word picha Jehovah use fo show how much he fogive?
9 Jehovah use odda word pichas fo help us see dat cuz of da ransom, he able fo wipe out da sins of da guys dass sorry. In da Bible we read dat Jehovah wash away dese sins. Dis mean dat da sinner come clean inside. (Songs 51:7; Isa 4:4; Jer 33:8) Jehovah say wat happen wen he do dis, “No matta all da bad kine stuff you wen do look jalike one big red spot now, but dey goin come white jalike da snow. No matta now jalike dey stay dark red, dey goin come white jalike da wool.” (Isa 1:18) Iz supa hard fo wash away one big red spot on one piece of cloth. Jehovah use dis word picha fo let us kno dat oua sins can be wash clean so dat you no can see um anymoa.
“All da bad kine stuff you wen do look jalike one big red spot now, but dey goin come white jalike da snow” (Isa 1:18)
10. Wat odda word picha Jehovah use fo show how much he fogive?
10 Jus like we wen talk about in da las lesson, sin iz like debt. (Mat 6:12, NWT; Luk 11:4) Erytime we sin agains Jehovah, iz like we go moa an moa into debt. We owe him choke! But wen Jehovah let us go, dass jus like he cancel da debt we owe him. He no make us pay fo da sins he awready wen let us go fo. Jus like we feel so happy wen somebody cancel oua debt, we feel so happy wen Jehovah let us go!
“Let us go wen we do wrong tings” (Mat 6:12, NWT)
11. Wen da Bible say dat Jehovah hemo oua sins, wat dat mean? (Jesus Guys 3:19)
11 Jehovah no ony jus cancel oua debts, or sins, he hemo dem. (Read um Jesus Guys 3:19.) Wen somebody cancel one debt, you might tink of somebody drawing one line tru da amount of money dey owe. But undaneat da line, can still see da numbas. But wen somebody hemo someting, dass diffren. Fo undastan dis word picha, we gotta rememba dat long time ago, da ink dey wen use befoa, could wipe um away easy wit one wet sponge. Wen somebody “hemo” one debt, wuz gone fo good. Peopo no can see wat had ova dea befoa. Jalike neva have um in da firs place. Make us feel so good fo kno dat Jehovah no ony cancel oua sins, but he hemo dem foeva!—Songs 51:9.
“Hemo yoa shame fo all da bad kine stuff you guys wen do” (Jesus Guys 3:19)
12. Wat we learn from da word picha about one cloud?
12 Jehovah use one word picha kinda like da odda one fo show how he wipe out oua sins. He tell, “I goin wipe out da bad stuff you do jus like I cova um wit one cloud an yoa sins like wit one thick cloud.” (Isa 44:22, NWT) Wen Jehovah fogive, iz jalike he use one cloud fo hide da bad stuff we do so dat nobody can see um.
“I goin wipe out da bad stuff you do jus like I cova um wit one cloud an yoa sins like wit one thick cloud” (Isa 44:22, NWT)
13. How we feel wen Jehovah fogive oua sins?
13 Wat all dese word pichas teach us? Wen Jehovah let oua sins go, we no need feel guilty fo oua sins fo da res of oua life. Da sacrifice of Jesus wen pay off oua sins. Wen Jehovah fogive one sin, iz like we neva even do um. Dass wat happen wen we sorry an Jehovah fo real kine let us go.
JEHOVAH LET US BE HIS GOOD FRENZ AGAIN
Cuz oua Faddah let us go, we can be good frenz wit him (Go look numba 14)
14. Why we can trus Jehovah goin full on let us go? (Go look da picha.)
14 Wen Jehovah fo real kine let us go, we can be good frenz wit him again. Dat help us so dat we no need keep feeling guilty. We no need worry dat Jehovah iz still mad at us an dat he goin punish us layta on. Dat neva goin happen. Wen Jehovah say dat he let us go, we can trus him. Jehovah wen tell Jeremiah da prophet, “I goin let um go fo da stuffs dey wen do wrong . . . I no goin even rememba da bad kine stuffs dey wen do.” (Jer 31:34) Paul wen say someting kinda da same, “I goin foget bout da bad kine stuff dey wen do.” (Heb 8:12) But wat dat even mean?
“I no goin even rememba da bad kine stuffs dey wen do” (Jer 31:34)
15. Wat it mean dat Jehovah no rememba oua sins?
15 Wen da Bible use da words “rememba” or “no foget”, it no always mean somebody tinking about someting dat wen happen befoa. Radda, it can mean somebody taking action. Da crook hanging on da pos nex to Jesus wen say, “Jesus, no foget me wen you come da King!” (Luk 23:42, 43, NWT) He no wuz jus asking Jesus fo tink about him dat time. Wat Jesus wen say back to da guy wen show dat he wuz goin take action an bring um back to life. So wen Jehovah say he not goin rememba oua sins, dat mean he not goin take action agains us. He not goin punish us layta on fo someting he wen let us go fo awready.
16. Cuz Jehovah fogive us, wat da Bible say we jalike?
16 Wen Jehovah fo real kine let us go, we feel free. Da Bible use anodda word picha fo help us undastan dat. Cuz we not perfeck an we like do wass bad, az like we “come slaves fo do da bad kine stuff.” Wen Jehovah fogive us, we “no gotta do ony da bad kine stuff no moa cuz God make [us] guys come free up.” (Rome 6:17, 22; Jesus Show 1:5) Wen we kno Jehovah fogive us, we feel happy jalike one slave who wen come free.
“God make you guys come free up” (Rome 6:22)
17. Wen Jehovah fogive, how dat make us come good? (Isaiah 53:5)
17 Read um Isaiah 53:5. Da las word picha we goin talk about say dat we like somebody dat get one bad disease dat dey goin mahke from. Cuz of da ransom dat Jehovah tru his Boy wen give, Jehovah wen make us come good. (1 Pet 2:24) Wen we sin, we no can have one good frenship wit Jehovah, but cuz of da ransom, he can fogive us an we can come close frenz wit him again. Jus like somebody who stay all happy cuz dey wen come good from dea disease, us too feel supa happy wen we come good spiritually cuz Jehovah wen let us go.
“Da one dey whip an cuz a dat, he make us come good” (Isa 53:5)
WEN JEHOVAH LET US GO, WAT DAT MEAN FO US?
18. Wat we wen learn from da word pichas inside da Bible about how Jehovah let us go? (Go look da box “How Jehovah Let Us Go”)
18 Wat we wen learn from da word pichas inside da Bible about how Jehovah let us go? Wen Jehovah fogive oua sins, az like neva happen an we no need worry he goin punish us layta on fo um. Cuz of dat, we can be good frenz wit oua Faddah, Jehovah. Same time, we gotta rememba dat wen Jehovah let us go, dass one gif cuz he love us an not cuz we deserve um.—Rome 3:24.
19. (a) Wat we gotta be tankful fo? (Fo Da Rome Peopo 4:8) (b) Wat we goin talk about in da nex lesson?
19 Read um Fo Da Rome Peopo 4:8. We so tankful dat Jehovah fogive us! (Songs 130:4, NWT) But if we like Jehovah fogive us, we gotta do someting importan. Jesus wen explain um lidis, “Let guys go wen dey do wrong tings to you . . . if you no do dat, den yoa Faddah no going let you go.” (Mat 6:14, 15, NWT) So we gotta copy da way Jehovah fogive peopo. But how we do dat? Da nex lesson goin show us how.
SONG 46 We Thank You, Jehovah
a Da original Hebrew text use words dat give da idea dat Jehovah iz da ony one dat can let peopo go fo real kine.