You Wen “Learn Da Secret” Fo Be Happy Wit Wat You Get?

1. Wat mean fo be happy wit wat you get, an wat it no mean?

YOU happy wit wat you get? Somebody who stay happy wit wat he get iz tankful fo da tings Jehovah give him. He not goin be mad cuz of da tings he no moa, an he goin have peace inside. But jus cuz you all good wit wat you get, dat no mean you no need kea about anyting else. Fo exampo, iz not wrong fo one Christian like do moa fo Jehovah, but same time he not goin get all bum out if he no get da assignment he like right away.​—Rome 12:1, NWT; 1 Tim 3:1, NWT.

2. Wat bad tings can happen if we not happy wit wat we get?

² If we not happy wit wat we get, we might start fo make bad choices. Like somebody might start fo work ova time fo get stuff dey no really need. An sad fo say, some guys in da trut wen even steal. Maybe dey wanted someting right away, or dey feel like dey deserve um. Or dey take money dass not deas an dey figga dey can pay um back layta on. But any kine stealing iz bad to Jehovah, an it give him one bad rep. (Smart Guys 30:9) Oddas wen get so bum out dey neva get one assignment dey wanted, dey wen stop serving Jehovah. (Gal 6:9) How can somebody dat worship Jehovah do any of dese tings? Cuz ova time dey wen stop bein happy wit wat dey get.

3. Wat we learn from Fo Da Philippi Peopo 4:11, 12?

³ All us can learn fo be happy wit wat we get. Paul wen write, “I stay good inside no matta wat happen.” (Read um Fo Da Philippi Peopo 4:11, 12.) Paul wuz lock up wen he wen write dis. But he neva come bum out cuz he wen “learn da secret” fo be happy wit wat he had. Wat Paul wen go tru prove dat we can learn fo be happy no matta wat. Bein happy wit wat we get no come natural. But jus like Paul, we gotta learn um. We go talk about qualities dat goin help us learn da secret of bein happy wit wat we get.

TRY BE TANKFUL FO WAT YOU GET

4. How bein tankful help us be happy wit wat we get? (1 Fo Da Tessalonika Peopo 5:18)

⁴ Somebody who iz tankful goin be happy wit da tings he get. (Read um 1 Fo Da Tessalonika Peopo 5:18.) If we tankful dat we get da stuff we need, we not goin always keep wanting fo get moa stuffs. Same ting wen come to da tings we do fo Jehovah. If we stay happy wit da kuleana we get, we goin work hahd at dat instead of always tinking about anodda ting we can do in Jehovah’s hui. Jehovah kno iz importan fo us be tankful an dass one reason how come he tell us fo tell him mahalo wen we pray. Wen we tankful, we goin get da kine peace dat nobody else can undastan.​—Php 4:6, 7.

5. Why da Israel peopo shoulda been tankful? (Go look da picha.)

⁵ Try look wat wen happen to da Israel peopo. Plenny times dey wen grumbo to Jehovah cuz dey wanted fo eat da food dey had in Egypt. (Cens 11:4-6) Life in da boonies no wuz easy but dey still shoulda been tankful fo eryting Jehovah wen do fo dem. Dey shoulda rememba wen dey wuz slaves in Egypt, Jehovah wen get dem outa dea by bringing da ten plagues on da Egypt peopo. Wen da Israel guys wuz leaving Egypt, Jehovah wen help dem fo take plenny silva, gold kine jewelry, an clothes from da Egypt peopo. (Egypt 12:35, 36) Wen da Israel peopo wuz trapped at da Red Sea, Jehovah wen open up da wattas fo dem. An wen dey wen go tru da boonies, eryday he wen give dem da manna fo eat. So how come dey wen grumbo about da food den? Cuz dey wuzn’t tankful fo wat Jehovah wen do fo dem.

6. Wat can help us be tankful?

⁶ Wat can help you be tankful? One ting you can do iz tink about da good tings dat make you happy eryday. You can even write um down. (Sad Song 3:22, 23) Anodda ting you can do iz tell peopo tank you wen dey do someting good fo you. Da mos importan person you like tell mahalo to eryday iz Jehovah. (Songs 75:1) If da guys we hang aroun iz not tankful or dey grumbo plenny, we can come lidat too. But if oua frenz iz tankful, dat can help us fo be tankful too. (Rules 1:26-28; 2 Tim 3:1, 2, 5) Wen we always look fo da chance fo say tank you, we goin be happy wit wat we get instead of bein mad wit wat we no moa.

7. Wat wen help Aci be happy?

⁷ Try look wat wen happen wit Aci, one sistah from Indonesia. She wen tell, “During da COVID-19 pandemic, I started fo compare wat I wuz goin tru wit my braddahs an sistahs. Dat wen make me real salty.” (Gal 6:4) Wat wen help her fo change how she tink? Aci wen say, “I wen start fo tink about da good tings Jehovah give me an eryting I get cuz I paht of his hui. So I wen mahalo Jehovah fo all dese tings.” Dis wen help me fo come happy again. If you no stay happy wit how tings goin in yoa life, go try copy Aci an dat can help you come happy again.

STAY FOCUS AN BE HUMBO

8. Wat wen happen to Baruch?

⁸ Da prophet Jeremiah’s secretary, Baruch, one time no wuz happy wit wat he wuz doin. He had one hahd job. He had fo help Jeremiah tell da Israel peopo wat wuz goin happen to dem cuz dey neva lissen to Jehovah. Baruch wen start fo tink too much about wat he wanted fo do instead of focusing on wat Jehovah wanted him fo do. Jehovah wen use Jeremiah fo tell Baruch fo stop goin afta da tings he like do, an fo be happy wit wat he doin awready. (Jer 45:3-5) Baruch wen lissen an Jehovah wuz happy wit him.

9. Wat we learn from 1 Fo Da Corint Peopo 4:6, 7? (Go look da pichas.)

⁹ Sometimes one Christian might feel like he deserve one kuleana in da hui. Maybe he feel lidis cuz he get da skills, he work hahd, or he been serving Jehovah long time. But maybe somebody else end up getting dat kuleana instead of him. Wat can help him fo no be mad? He can tink about wat da aposal Paul had write in 1 Fo Da Corint Peopo 4:6, 7. (Read um.) Ery kuleana an ery skill we get iz from Jehovah. He no give um to us cuz we deserve um or we moa spesho den anybody else. But he give um cuz he like do good tings fo us.​—Rome 12:3, 6; Efe 2:8, 9.

10. How we can learn fo be humbo?

¹⁰ We can learn how fo be humbo wen we tink about Jesus exampo. Try look wat had happen da nite he wen wash da aposals feet. John wen write, “Jesus know [1] dat his Faddah wen give him all da powa ova eryting. He know [2] he come from God an now [3] he goin go back by God . . . an [he] start fo wash his guys feets.” (John 13:3-5) Jesus coulda felt like da aposals should be da ones fo wash his feet. But he neva. Wen he wuz on da eart, he neva feel dat he deserve one moa easy life cuz he wuz God’s Boy. (Luk 9:58) Jesus wuz humbo an happy wit da stuff he had get. He da perfeck exampo fo us.​—John 13:15.

11. Wat wen help Dennis be happy wit da work he do fo Jehovah?

¹¹ Dennis, one braddah from da Netherlands, try hahd fo be humbo like Jesus. But not always easy. He wen tell, “Sometimes wen somebody get da kuleana dat I like, I get mad an tink I should be da one dat should get um. Wen dat happen, I go study about bein humbo. Inside da JW Library^® app, I mark scripchas about bein humbo so dat I can find um fas an read um again. I even download some talks about bein humbo so I can lissen to um ova an ova.a I wen learn dat all da work we do fo Jehovah iz fo make Him look awesome, not us. I kno dis work dat we do, Jehovah jus let us have one small paht in doin um.” So if you eva start fo no be happy wit da work dat you stay doin, try hahd fo do tings dat goin help you be humbo. If you do dat, you goin come moa close to Jehovah an you goin be happy wit wat you doin.​—Jam 4:6, 8. 

TINK ABOUT JEHOVAH’S PROMISES

12. Wat promises fo da future can help us be happy wit wat we get? (Isaiah 65:21-25)

¹² We goin feel betta about da tings dat we get wen we tink about wat Jehovah promise fo da future. In da book of Isaiah Jehovah show dat he undastan dat life can be hahd fo us an dat he goin fix all dese problems. (Read um Isaiah 65:21-25, NWT.) We goin have nice houses fo live in, good kine work, an ono healty food. We not goin stress dat someting bad goin happen to us or oua kids. (Isa 32:17, 18; Eze 34:25) Iz garantee all dese awesome promises fo da future goin come tru.

13. Wat hahd times we get, an how oua hope fo da future help us?

¹³ How come now moa den eva we gotta focus on oua hope? Cuz we stay living in da time “befo da world goin come pau” an get plenny problems. (2 Tim 3:1) Az tru dat Jehovah help us eryday by giving us advice an da help we need. (Songs 145:14) But on top of dat, he give us one hope dat help us get tru ruff times. Like maybe you work real hahd but still yet you always broke an you struggle fo pay da bills an get da stuff yoa family need. Jehovah promise we not always goin have fo struggle, an in Paradise he goin give us eryting we need an way moa. (Songs 9:18; 72:12-14) Or maybe you dealing wit plenny pain dat neva goin go away, you depressed, or you get one mayjah healt problem. Jehovah promise you not goin suffa lidat foeva cuz in da new world nobody goin get sick or mahke. (Jesus Show 21:3, 4, NWT.) Dis hope can help us fo no be mad about wat stay happening to us right now. So even tho tings iz not fair an bad stuff stay happening to us, we still yet can be happy cuz all dis ony goin stay short time. In da new world we neva goin suffa again.​—2 Cor 4:17, 18.

14. How we can make oua hope moa solid?

¹⁴ We like make oua hope fo da future moa solid cuz dat goin help us fo be happy wit oua life now. So how we can do dat? One ting dat can help us iz fo picha ouaself in Paradise. Like wen we feel all stress cuz iz hahd fo have nuff money fo live, we can picha wat life goin be like wea nobody goin be pooa, not goin have debt, an we not even goin need money. Or if we stay bummed cuz we neva get one kuleana in da hui, we could tink about how dass notting if we compare um to bein perfeck an serving Jehovah fo tousands of years. (1 Tim 6:19) Wit all da problems we get, maybe iz hahd fo tink about all dese promises. But da moa we do um, da easier goin be.

15. Wat you learn from wat Christa wen say?

¹⁵ Try look wat we can learn from Christa, who stay married to Dennis who we wen talk about earlia. She wen tell, “I get one bad disease dat make my muscles weak. I no can walk, I gotta use one wheelchair an I gotta stay in bed mos of da time. I stay in pain eryday. Da docta wen tell me I not goin get betta. But I wen tink dat he no see tings da way I do. I keep tinking about my hope. Even tho I gotta suffa an hang in dea now, I kno in paradise eryting goin be all good. An dat help me have peace.”

DOSE WHO GET RESPECK FO JEHOVAH NO NEED NOTTING

16. Why King David could write dat da guys who respeck Jehovah “no need notting”?

¹⁶ Even if we happy wit wat we get, we still can have problems. Tink about King David, at least three of his kids wen mahke. Some guys say he wen do bad stuff dat he neva do, his frenz wen stab um in da back, an fo years one odda king wen hunt him down an try kill him. Even tho he wen go tru all dat, he wen tell, “Anybody dat get respeck fo Da One In Charge, dey no need notting.” (Songs 34:9, 10) How come he could say dat? Cuz he wen kno dat even tho Jehovah no stop problems from happening, He wuz goin give him wat he needed. (Songs 145:16) So no matta wat kine problems we go tru we can have peace an be happy cuz, jalike how he wen do fo David, Jehovah goin help us stay faitful.

17. Why you like be happy wit wat you get?

¹⁷ Jehovah like us fo be happy wit wat we get. (Songs 131:1, 2) So do eryting you can fo learn da secret fo do dat. Work hahd fo be tankful, stay focus an be humbo, an tink about Jehovah’s promises. If you do dat, you goin be able fo say, “I stay real good inside” cuz of wat I get.​—Songs 16:5, 6.