How Jehovah Help Us Hang In Dea

1. Why can be hahd fo hang in dea to da end, but who goin help us? (1 From Peter 5:10)

ALL of us get diffren kine problems dat make um hahd fo hang in dea til da end. Some iz sick all da time. Oddas suffa cuz somebody dey love wen mahke. An den oddas even get dea family or da govament giving dem hahd time. (Mat 10:18, 36, 37) Wateva you stay goin tru dat making um hahd fo you, Jehovah goin help you fo hang in dea.​—Read um 1 From Peter 5:10.

2. Why we can hang in dea?

² Hanging in dea mean dat no matta wat hahd times we go tru an wat kine presha we get fo do wass wrong, we goin still be happy serving Jehovah cuz we kno tings goin get betta. Az Christians, we no can do dis by ouaself. Jehovah da one dat give us “da unreal powa” fo hang in dea. (2 Cor 4:7, NEW WORLD TRANSLATION.) In dis lesson we goin talk about four tings Jehovah give us fo help us hang in dea, an how we can use dose tings.

PRAYA

3. How come praya iz one unreal ting?

³ Jehovah wen do someting supa awesome fo help us hang in dea. He wen make um so dat, even tho we sinners, we can talk to him an he lissen to us. (Heb 4:16, NWT.) Try tink about um, we can pray to Jehovah about anyting, any time, any language, an from any place even if we stuck by ouaself or we stay lock up. (Jonah 2:1, 2; Jesus Guys 16:25, 26) Even if we not shua wat fo tell Jehovah cuz we unda so much presha, he still undastan wat we like say. (Rome 8:26, 27) Fo real kine, praya iz one unreal ting!

4. How we kno dat wen we pray to Jehovah fo help us hang in dea, he goin help us?

⁴ In da Bible Jehovah promise dat “erytime we go ask God fo do da tings he like make happen, we kno fo shua dat he lissen us.” (1 John 5:14) Asking Jehovah fo help us hang in dea iz someting he like make happen. How we kno dat? One ting iz dat wen we hang in dea we help Jehovah prove dat Satan iz one bulaia. (Smart Guys 27:11) Anodda ting, da Bible say dat “peopo dat make up dea mind fo go all out fo [Jehovah],” he like “make dem come strong.” (2 Rec 16:9) So we kno fo shua dat Jehovah like help us an he can give us da powa fo hang in dea.​—Isa 30:18; 41:10; Luk 11:13.

5. How can praya help us fo have peace? (Isaiah 26:3)

⁵ Da Bible say dat wen we pray to Jehovah about da stuff we worry about, “God goin make [us] guys come so notting bodda [us]. Dat goin be mo betta den anybody can figga. God goin take kea [us], how [we] feel an how [we] tink.” (Php 4:7) We supa tankful fo dat cuz da guys who no serve Jehovah try do all kine stuff fo be calm an have peace. Like one of da tings dey do iz meditation fo try empty dea mind of all da tings dey tinking about fo feel calm. Doin dat iz dangerous cuz da demons can mess wit dea mind. (Go check Matthew 12:43-45.) Anodda ting iz dat even tho dey can be calm, dey not goin be able fo get fo real kine peace cuz dat peace ony come from Jehovah. Wen we pray to Jehovah an trus him fo help us get peace, he promise he goin make um so dat we “no mo worries.” (Read um Isaiah 26:3.) One way Jehovah do dat iz he help us fo rememba scripchas dat we wen learn in da pas. Dese scripchas help us fo feel calm cuz dey remind us dat Jehovah love us an like help us.​—Songs 62:1, 2.

6. Wat iz some tings you can pray about fo help you? (Go look da picha.)

⁶ Wat you can do. Wen you goin tru one hahd time, tell Jehovah how you feel. “Turn um ova” to him an pray fo his peace. (Songs 55:22) Ask him fo help you kno wat fo do fo hando wat you goin tru. (Smart Guys 2:10, 11) Same time, no foget fo mahalo Jehovah in yoa prayas. (Php 4:6) Look fo all da ways dat Jehovah stay helping you hang in dea an tank him fo all dat. Even tho you stay catching cracks, no foget all da ways Jehovah awready wen help you.​—Songs 16:5, 6.

DA BIBLE

7. How studying da Bible can help us hang in dea?

⁷ Jehovah wen give us da Bible fo help us hang in dea. Get plenny scripchas dat show Jehovah goin help us. Try look jus one exampo of dis. In Matthew 6:8 Jesus wen say, “Yoa Faddah know wat you need befoa you even ask um.” Cuz Jesus wen say dis, an he kno Jehovah way betta den anybody else, we can trus dat Jehovah kno wat we goin tru, wat we need, an goin help us. Da Bible get plenny moa scripchas lidat dat can make us strong fo hang in dea.​—Songs 94:19.

8. (a) Wat advice da Bible give dat can help us hang in dea? (b) Wat can help us rememba Bible truts wen we need um?

⁸ Da Bible give us good advice dat can help us hang in dea. Dat advice can help us make good choices. (Smart Guys 2:6, 7) Like how da Bible tell us fo take one day at a time radda den worry about maybe wat goin happen tomorrow. (Mat 6:34, NWT.) If we read da Bible eryday an tink hahd about um, goin be moa easy rememba da Bible’s advice wen we need um.

9. How da stories in da Bible can help us?

⁹ Inside da Bible, get real life stories about how Jehovah wen help guys who wen trus him. (Heb 11:32-34; Jam 5:17) Wen we read about how Jehovah wen help dem, dat goin make oua fait moa strong dat he goin help us too. (Songs 46:1) An wen we tink about how Jehovah’s peopo wen show fait in him even tru hahd times, we goin like copy dem.​—Jam 5:10, 11.

10. Wat you can do so da Bible help you az much az can?

¹⁰ Wat you can do. Read da Bible eryday, an write down scripchas dat wen help you. Anodda ting you can do iz start da day off by reading da daily text cuz dat goin give you someting good fo tink about fo da res of da day. Dis wat wen help Mariea who wuz taking kea her faddah an maddah who both had cancer an wuz dying. She wen say, “Ery morning I wen read da scripcha from da daily text an tink hahd about um. Dis wen help me fo fill my mind wit one thought from da Bible dat wen help me focus on someting moa big den me an my problems.”​—Songs 61:2.

BRADDAHS AN SISTAHS

11. Wen we tink of how oua braddahs an sistahs hang in dea, how we feel?

¹¹ Jehovah give us da braddahood fo help us hang in dea. Jus knowing dat oua “braddahs an sistahs all ova da world stay suffa jalike [us] guys” help us fo kno we not alone, an dat make us feel betta. (1 Pet 5:9) We kno fo shua dat wateva we go tru, oua braddahs an sistahs stay goin tru da same kine stuff an staying faitful to Jehovah. So dat mean we can stay faitful an hang in dea too!​—Jesus Guys 14:22.

12. How can oua braddahs an sistahs help us, an wat we can do fo dem? (2 Fo Da Corint Peopo 1:3, 4)

¹² Wat oua braddahs an sistahs say an do can help us fo hang in dea. Dass how wuz fo da aposal Paul. In his lettas he wen mention da names of da guys dat wen help him wen he no could leave his house, an he wen mahalo dem. Dese braddahs an sistahs wen give Paul good kine words an wen give him da tings he wen need. (Php 2:25, 29, 30; Col 4:10, 11) We might go tru da same ting today. Wen we need help fo hang in dea, oua braddahs an sistahs iz dea fo us. An wen dey need oua help, we dea fo dem.​—Read um 2 Fo Da Corint Peopo 1:3, 4.

13. Wat wen help one sistah fo hang in dea?

¹³ Da braddahood wen help one sistah in Russia named Maya real plenny. In 2020, da police wen search her house an layta on she had fo go court jus fo sharing wat she believe wit oddas. Maya wen say, “Dat time wen I wuz so tired an stressed, da braddahs an sistahs wen call, write, an tell me how much dey love me. I always wen kno dat my braddahs an sistahs wuz my ohana. But afta all da stuff dey wen do fo me, I wen feel um even moa.”

14. How we can get help from oua braddahs an sistahs? (Go look da picha.)

¹⁴ Wat you can do. Wen you goin tru someting hahd, iz importan fo talk to yoa braddahs an sistahs an spen time wit dem. An no be shame fo go ask da eldas fo help. Dey can be “one place fo da peopo hide from da strong wind o da rain.” (Isa 32:2) Rememba dat yoa braddahs an sistahs stay goin tru hahd stuff too. An wen you do stuff fo help dem, you goin be happy an dat goin help you fo hang in dea.​—Jesus Guys 20:35.

OUA HOPE

15. How hope wen help Jesus, an how it help us? (Fo Da Hebrew Peopo 12:2, NWT.)

¹⁵ Jehovah wen give us one solid hope fo help us hang in dea. (Rome 15:13) Try tink about how hope wen help Jesus fo hang in dea on da mos hahdest day of his life on eart. (Read um Fo Da Hebrew Peopo 12:2, NWT.) Jesus knew dat if he wen stay faitful, he could prove dat Satan wuz one liar an Jehovah would get all da respeck He deserve. Jesus no could wait fo be back wit his Faddah an layta on rule wit his braddahs in heaven. Same lidat, da hope dat we get fo live foeva in da new world help us fo hang in dea no matta wat kine hahd stuff we go tru in Satan’s world.

16. How hope wen help one sistah hang in dea, an wat you learn from wat she wen say?

¹⁶ Try look how da hope of living in da new world wen help one sistah in Russia named Alla. Her husban wuz arrested an lock up while he wuz waiting fo go court. Wen dis wen happen, Alla wen say, “Praying about da hope an tinking hahd about um wen help me fo no get too down. I kno dat afta all dis hahd stuff I goin tru iz pau, good tings goin happen. Jehovah goin come out da winna an us guys too.”

17. How we can show we tankful fo da hope Jehovah give us? (Go look da picha.)

¹⁷ Wat you can do. Take time fo tink about da awesome future Jehovah wen promise you. Try picha yoaself in da new world wit all yoa frenz an family an how happy erybody goin be. Wen you compare um to living foeva in da paradise, all da stuff dat make us suffa now iz ony “manini kine.” (2 Cor 4:17) Do wat you can fo share wit oddas God’s promises fo da future. An try tink about how hahd must be fo da guys who no serve Jehovah an donno da promises Jehovah get fo da future. If you ony share litto bit wit dem, maybe dey goin like kno moa about all da tings God wen promise.

18. Why we can trus Jehovah’s promises?

¹⁸ Afta Job wen hang in dea tru plenny hahd stuff, he wen tell Jehovah, “I know fo shua you can do eryting. No mo nobody can jam up wat you plan fo do.” (Job 42:2) Job wen learn dat notting can stop Jehovah from doin wat he promise. Knowing dat can help us fo hang in dea. Try picha dis, one wahine dat wuz sick fo long time wen come all bum out cuz she wen see plenny doctas but none of dem wuz able fo help her. But den she find one good docta dat tell her exackly wat making her sick an how he goin help her. Right away she happy even tho she gotta wait fo get healed. Now iz moa easy fo her keep hanging in dea cuz she kno she goin get betta. Same lidat, we can hang in dea cuz we kno fo shua dat God’s promise of da Paradise goin come tru.

19. Wat we need fo hang in dea?

¹⁹ We wen learn dat Jehovah help us hang in dea tru praya, da Bible, oua braddahs an sistahs, an oua hope. If we do oua bes fo use dese tings, Jehovah goin help us hang in dea til all da hahd tings we go tru in Satan’s world iz pau.​—Php 4:13.