Trus Jehovah, Jalike Samson

1-2. How come az good fo us study about Samson?

WAT you tink about wen you hea da name Samson? Da firs ting you probly tink about is he was supa strong. Az true. But Samson made one bad choice dat wen make him suffa plenny. Still yet Jehovah wen look at all Samson wen do fo serve Him. An God wen put Samson’s exampo of faith in da Bible so we can learn from um.

² Jehovah wen use Samson fo do unreal tings fo help his peopo, Israel. Hundreds of years afta Samson wen mahke, Jehovah wen make da aposal Paul put Samson’s name on one lis of men dat had choke faith. (Heb 11:32-34) Wat Samson wen do can help us. He wen trus Jehovah even wen he was going thru hard stuff. We go look wat we can learn from Samson an how dat can help us.

SAMSON WEN TRUS JEHOVAH

3. Wat Jehovah wen choose Samson fo do?

³ Wen Samson was born, da Filisha guys was ruling da Israel peopo an was putting presha on dem. (Leadas 13:1) Cuz da Filisha guys wen make tings supa hard fo da Israel peopo, dey wen suffa plenny. Jehovah wen choose Samson fo “be da one dat start fo get da Israel guys outa da Filisha guys powa.” (Leadas 13:5) Dat was hard fo do! Samson had fo trus Jehovah so dat he could do um.

4. How Jehovah wen help Samson fo get away from da Filisha guys? (Local Leadas 15:14-16)

⁴ Look one way Samson wen trus Jehovah an how Jehovah wen help him. One time, da Filisha army wen come fo catch Samson at Lehi, dat was probly in Judah. Da Judah guys was sked, so dey wen give Samson ova to dem. Samson’s own peopo wen tie him up real good wit two new ropes an wen bring him to da Filisha guys. (Leadas 15:9-13) But Jehovah’s spirit wen “take him ova an give him powa,” so Samson could get outa da ropes. Den he wen “find one jaw bone from one donkey” dat jus wen mahke, pick um up, an wen use um fo kill 1,000 Filisha guys!—Read um Local Leadas 15:14-16.

5. How using one donkey jawbone wen show dat Samson wen trus Jehovah?

⁵ How come Samson wen use one donkey jawbone? Dass one funny kine weapon aah? He wen know dat Jehovah was going help him win no matta wat kine weapon he use. So he wen grab wateva was dea fo do wat Jehovah wanted. Samson wen beat all dose guys cuz he wen trus Jehovah.

6. Wat we can learn from Samson wen we do oua work fo Jehovah?

⁶ Jehovah can give us da powa we need fo do anyting he tell us fo do, even if look like no ways we can do um. Going blow oua mind how he help us. Jehovah wen give Samson powa, an he can do da same ting fo you if you trus Him fo help you.—Smart Guys 16:3.

7. Wat exampo show dat we should ask Jehovah fo direck us?

⁷ Plenny braddahs an sistahs dat help build da places fo worship show dat dey trus Jehovah. Befoa, da braddahs wen plan out an build mos new Kingdom Halls an odda buildings. But cuz moa an moa peopo getting baptized, Jehovah’s hui had fo do um diffren. Da braddahs wit dat kuleana wen pray to Jehovah fo direck dem an try out new ways, like buy ol buildings an fix dose up. Robert, one braddah dat wen work on plenny building projecks all ova da world wen tell, “At firs, no was easy fo do um dis new way. Was diffren from wat we was doing befoa. But da braddahs wen do um, an was clear dat Jehovah wen bless da changes.” Dass jus one way Jehovah help his peopo do wat he like. So all us can ask ouaself, “I trying fo see wat Jehovah like me do, an I ready fo do wateva fo serve him?”

SAMSON WEN USE WAT JEHOVAH WEN GIVE

8. One time wen Samson was supa thirsty, wat he wen do?

⁸ Maybe you wen read about odda unreal tings Samson wen do. He wen fight one lion an even wen kill 30 Filisha guys in Ashkelon town all by himself. (Leadas 14:5, 6, 19) Samson wen know he no could do dose tings if Jehovah neva help um. He wen show dat one time wen he wen come supa thirsty afta he wen kill 1,000 Filisha guys. Wat he wen do? Radda den try find watta fo himself, he wen ask Jehovah fo help him.—Leadas 15:18.

9. How Jehovah wen ansa Samson’s cry fo help? (Leadas 15:19)

⁹ Samson wen cry fo help so Jehovah wen use one miracle fo make watta come outa da ground fo him. Wen Samson wen drink from um, “he come strong one mo time.” (Read um Local Leadas 15:19) Years layta wen Jehovah wen make Samuel da prophet write da book of Local Leadas, da place wea had watta was still dea. Da watta coming out maybe wen remind da Israel peopo dat if dey trus Jehovah, he going help dem wen dey need um.

10. Wat us gotta do fo get Jehovah’s help? (Go look da picha.)

¹⁰ No matta wat kine talents we get o wat we wen do fo Jehovah befoa, we still gotta look to him fo help. We gotta be humbo an know dat we ony can do wat Jehovah ask us fo do if he help us. Samson wen come moa strong wen he wen drink da watta Jehovah wen give um. Jalike Samson, oua faith come moa strong wen we make good use of all da tings Jehovah give fo help us.—Mat 11:28.

11. Try tell how we can we use all da tings Jehovah give us?

¹¹ Try look wat stay happening to Aleksey, one braddah in Russia who gotta hando mean kine persecution. Wat wen help him stay strong even tho he going thru one real hard time. Him an his wife stick to one good plan fo study da Bible an worship Jehovah. He tell, “I try fo keep up wit my own study an read da Bible eryday. Ery morning me an my wife talk about da days tex an pray to Jehovah togedda.” Wat we learn from dat? Radda den trying fo do tings on oua own, we gotta trus Jehovah. How we do dat? We make oua faith moa strong wen we study da Bible, pray, go meeting, an preach. Den Jehovah going give us wat we need fo keep going. He wen help Samson come moa strong, an garans He can do dat fo us too.

SAMSON NEVA GIVE UP

12. Wat lolo kine choice Samson wen make, an how dis was diffren from da odda times befoa?

¹² Jalike us Samson no was perfeck, so had times wen he wen make lolo kine choices. One of dose wen turn out real bad. Afta Samson was one judge fo litto while, he wen “get da hots fo one wahine from Sorek Valley. Her name Delilah.” (Leadas 16:4) Dis one time, Samson was suppose to marry one Filisha wahine cuz Jehovah wanted dat fo happen so dat dey could have chance fo fight agains da Filisha peopo. One odda time, Samson wen stay at one hooka’s house in Gaza town. Dass wen Jehovah wen give Samson da powa fo carry away da doors fo da town gate, an dat wen make da town moa weak. (Leadas 14:1-4; 16:1-3) But dis time was diffren. Cuz Delilah probly was one of da Israel peopo, Samson bein wit her neva give um da chance fo fight da Filisha guys.

13. How Delilah wen make trouble fo Samson?

¹³ Da Filisha guys wen pay Delilah plenny money fo stab Samson in da back. Maybe he wen love her so much dat he no could figga out wat Delilah was trying fo do. No matta wat da reason, Delilah wen nag Samson ova an ova fo tell her wat wen make him strong, an he finally wen tell her. Was bummahs dat his mistake wen make him lose his powa, an Jehovah no was happy wit him fo litto while.—Leadas 16:16-20.

14. How Samson wen suffa plenny cuz he wen trus Delilah?

¹⁴ Samson wen suffa plenny cuz he wen trus Delilah an not Jehovah. Da Filisha guys wen catch him an dig out his eyes. Dey wen throw him in jail Gaza town, wea befoa he wen make dem come shame. An dey wen make him one slave dat had fo grind up da grain. Den da Filisha guys wen bring Samson to one big paina an wen make him come all shame dis time. Dey wen make one big sacrifice to dea god Dagon, jalike he was da one dat wen help dem catch Samson. Dey wen take Samson outa jail an take him to da paina fo make fun of him an “make dem laugh.”—Leadas 16:21-25.

15. How Samson one moa time wen show he trus Jehovah? (Local Leadas 16:28-30) (Go look da cova picha.)

¹⁵ Samson wen make one big mistake, but he neva give up. He wen keep looking fo one odda chance fo fight da Filisha guys jalike God wen tell him fo do. (Read um Local Leadas 16:28-30.) Samson wen beg Jehovah, “Try let me do dis one ting fo pay back da Filisha peopo.” Jehovah wen ansa Samson an wen give him back his unreal powa. Cuz of dat, Samson wen kill moa Filisha guys den he eva wen do befoa.

16. Wat us can learn from Samson’s mistake?

¹⁶ Samson wen suffa plenny cuz of da mistake he wen make, but he neva give up trying fo do wat Jehovah wanted him fo do. So if we make one mistake an we need fo get correckted o we lose one privilege, no give up. Rememba, Jehovah no give up on us. (Songs 103:8-10) Even if we make mistake, Jehovah can still use us, jalike he wen use Samson.

17-18. How Michael’s exampo wen help you? (Go look da picha.)

¹⁷ Look wat wen happen to one young braddah, Michael. He was busy working hard fo Jehovah az one helpa guy an one full time pionea. Was sad cuz he wen lose all dat wen he wen make one mistake. He sed, “I was going all out fo Jehovah, den boom! Felt like I no could do notting fo him. I knew Jehovah wouldn’t bag from me, but I wen wonda if my frenship wit him would eva be da same, o if I could do plenny fo him again.”

¹⁸ Michael neva give up. He tell, “I wen work hard fo come moa tight wit Jehovah by prayer, study, an tinking hard about um.” Afta a while, Michael wen get his privileges back in da local hui. Now he stay one elda an one full time pionea. He tell, “Da help I wen get, speshly from da eldas, wen make me see dat Jehovah still wen love me. I can work hard in da local hui again an no worry about my pas mistake. Dis wen teach me dat Jehovah going let anybody go, who fo real kine sorry fo wat dey wen do.” We can be shua dat Jehovah going use us an bless us az long az we do eryting we can fo fix wat we wen do wrong an trus Jehovah.—Songs 86:5; Smart Guys 28:13.

19. How wat wen happen to Samson make you moa strong?

¹⁹ In dis lesson, we wen look at some of da unreal tings dat wen happen to Samson. He no was perfeck, but he neva stop trying hard fo do wat Jehovah like, even afta he wen make mistake wit Delilah. Jehovah neva give up on him an he wen use Samson again fo do someting awesome. Jehovah still wen put him in da lis of guys dat had plenny faith dat stay inside Fo Da Hebrew Peopo chapta 11. Feel real good fo know dat oua Faddah in da heaven love us an like make us strong, speshly wen we need help. So jalike Samson, we go beg Jehovah “No foget me! . . . Try make me come strong.”—Leadas 16:28.