LESSON 17

Wat Jesus Stay Like?

Printed Edition

Wen we learn about da tings Jesus had tell an do wen he was hea on top da earth, we find da good kine tings dat make us like come frenz wit Jesus an his Faddah, Jehovah. Wat kine good tings is dat? An how we can copy Jesus ery day?

1. How Jesus jalike his Faddah?

Up in heaven, Jesus wen watch da love his Faddah wen show an wen learn from him fo uku billion years. Cuz of dat, he tink, feel an ack jalike Him. (Read um John 5:19.) Jesus wen copy da person Jehovah stay so good dat he wen tell: “Whoeva see me, dey see my Faddah.” (John 14:9) Wen you learn about wat kine person Jesus stay, you goin get fo know da kine person Jehovah stay moa betta. Try tink, da way Jesus wen kea about peopo, dass how Jehovah kea about you.

2. How Jesus wen show he get love an aloha fo Jehovah?

Jesus wen tell: “I goin do wat my Faddah tell me fo do. Dat goin show da peopo inside da world dat I get love an aloha fo my Faddah.” (John 14:31) Wen he was hea on top da earth, Jesus wen show plenny love fo his Faddah cuz he wen do wat Jehovah wen ask him fo do, even wen was hard. An cuz Jesus love his Faddah so much, he always wanted fo talk about Him an help oddas fo help dem come frenz wit Him too.—John 14:23.

3. How Jesus wen show he get love an aloha fo da peopo?

“Wat make [Jesus] feel good inside, was da peopo.” (Smart Guys 8:31) He wen show he get love an aloha fo da peopo by giving dem good kine words an goin all out fo help dem. Jesus wen do awesome kine tings dat wen show his powa an his pity fo da peopo. (Mark 1:40-42) He was fair an wen make nice nice to erybody. Wat he wen tell to da peopo who wen like lissen to him wen give dem hope an help dea hearts fo res inside. Cuz he wen get plenny love fo peopo, he even wen suffa an mahke fo dem. But mostly, he love da ones who lissen an do wat he tell.—Read um John 15:13, 14.

DIG MOA DEEP

Learn moa about wat kine guy Jesus. An try look how fo show love an aloha jalike him.

4. Jesus love his Faddah

Da tings Jesus wen do show us how fo show oua love fo God. Read um Luke 6:12 an John 15:10; 17:26. Talk story about dis question afta each scripcha:

Fo do jalike Jesus wen do, how us can show dat we get love an aloha fo Jehovah?

Jesus prayin. — Jesus wen love his Faddah in heaven an he wen talk to him plenny thru prayer

5. Jesus kea about peopo who need help

Jesus wen kea moa about odda peopo den about himself. Even wen he was all tired, he still wen take time fo help peopo. Read um Mark 6:30-44, an den talk story about dese questions:

In dis story, how Jesus wen show dat he kea about oddas?—Go look verses 31, 34, 41, and 42.
How come Jesus wen like help peopo?—Go look verse 34.
Cuz Jesus jalike Jehovah, wat da tings he wen do teach you about Jehovah?
Wat some tings us can do fo copy da way Jesus kea about oddas?

Jesus make five breads an two fish come real plenny in one awesome way an give da food to tousans. His guys give da food to guys, wahines an kids.

6. Jesus give plenny

Even tho he neva have plenny tings, Jesus wen share wat he had wit oddas an he tell us fo do da same ting. Read um Jesus Guys 20:35, an den talk story about dis question:

From wat Jesus wen tell, how us can stay moa betta inside?

Play um da VIDEO, an den talk story about da question afta.

VIDEO: “Da Guy Dat Give, He Stay Mo Betta Inside”—Part Of Um (4:00)

Even if we no moa plenny tings, how us can still share wit oddas?

You wen know?

Da Bible tell us dat nobody can go to da Faddah unless dey go thru Jesus. Dass how come wen we pray to Jehovah, gotta use Jesus’ name. (Read um John 16:23, 24.) Wen we pray lidat, we show we know wat Jesus wen do fo help us come Jehovah’s fren.

WAT SOME PEOPO TELL: “Wen we suffa, God no kea.”