STUDY LESSON 33
SONG 4 Jehovah God, He Take Kea Me
Believe Dat Jehovah Love You
“Cuz of my loyal love I wen bring you to me.”—JER 31:3, NWT.
MAIN TING WE GOIN LEARN
Why we gotta believe Jehovah love us, an how we can kno dat fo shua.
1. Why you wen give yoa life to Jehovah? (Go look da picha.)
YOU rememba wen you had give yoa life to Jehovah? You wen promise him dat you wuz goin put him firs in yoa life an love him wit eryting inside you wit how you feel, how you tink, an wit all yoa powa. (Mar 12:30) Eva since den, yoa love fo him wen come moa strong. An if anybody ask you, “You shua you love Jehovah?” Automatic you would say, “I love him moa den anybody or anyting!”
Rememba how much you wen love Jehovah wen you wen give yoa life to him an get baptize. (Go look numba 1)
2-3. Wat Jehovah like us full on believe, an wat we goin talk about in dis lesson? (Jeremiah 31:3, NWT.)
2 But wat you would say if somebody wen ask, “You shua Jehovah love you?” Maybe now yoa ansa iz not too garanz cuz you feel you not good enuff fo Jehovah love you. One sistah who wen have one hahd life growing up wen say, “I kno I love Jehovah, dass one garantee. But plenny times I not too shua if Jehovah love me.” So wat can help you kno how Jehovah really feel about you?
3 Jehovah like you full on believe dat he love you. (Read um Jeremiah 31:3, NWT.) He da one dat wanted you fo learn about him an be his fren. An wen you wen give yoa life to him an get baptize, you wen come one of his “spesho peopo.” (Mal 3:17) Dat mean he love you plenny an neva goin leave you. Jehovah like us feel how Paul had feel. He wen say, “No mo notting dat can cut us guys off from da way God love us guys!” (Rome 8:38, 39) In dis lesson we goin talk about why we gotta believe dat Jehovah love us an wat can help us fo do dat.
WHY WE GOTTA BELIEVE JEHOVAH LOVE US
4. How we can stan up agains Satan?
4 If we full on believe dat Jehovah love us, we can fight agains all da stuff da Devil try use fo bulai us. (Efe 6:11) Satan goin do anyting he can fo stop us from serving Jehovah. One of da main tings he do iz try get us fo believe dat Jehovah no love us. No foget dat Satan goin use any chance he get fo do dis. An plenny times he attack us wen we feel junk cuz of wat wen happen to us in da pas, wen we goin tru hahd times, or wen we worried about wat goin happen in da future. (Smart Guys 24:10) Satan iz like one wild lion dat look fo animals dass weak an no can defend demself. He try fo make us so weak dat we give up serving Jehovah. If we do eryting we can fo full on believe dat Jehovah love us, we goin be able fo “stan up agains da Devil” an all dat he do fo try take us down.—1 Pet 5:8, 9; Jam 4:7.
5. Why we gotta feel loved by Jehovah?
5 If we believe Jehovah love us, we come moa close to him. Try look why we can say dat. Wen somebody show love to us, we like show love back to dem. Dass how Jehovah wen make us. So da moa love we feel from Jehovah, da moa we goin love him. (1 John 4:19) An wen oua love fo him grow, his love fo us goin grow. Jalike how da Bible tell, “Come close to God, an he goin come close to you.” (Jam 4:8) So wat we can do fo make us believe dat Jehovah love us?
WAT CAN HELP US BELIEVE JEHOVAH LOVE US?
6. If you donno if Jehovah love you, wat you can do?
6 Keep praying to Jehovah fo help you see why he love you. (Luk 18:1; Rome 12:12) Maybe you gotta pray plenny times eryday fo you see how Jehovah feel about you. But sometimes maybe you feel so bad about yoaself dat iz hahd fo believe Jehovah love you. But rememba Jehovah iz moa big den how you feel inside. (1 John 3:19, 20) He kno you betta den you kno yoaself an he see da good tings about you dat maybe you no see. (1 Sam 16:7; 2 Rec 6:30) So no hold back fo tell him eryting you tink about an ask him fo help you believe dat he love you. (Songs 62:8) An afta you pray to him, go do da tings we goin talk about nex.
7-8. How da book of Songs Fo God help us believe Jehovah love us?
7 Trus wat Jehovah say in da Bible. Cuz Jehovah wen give his spesho spirit to da guys who wen write da Bible, we can trus dat wat dey wen say about him iz tru. Try look how da song writa David wen talk about Jehovah. He sed, “If you stay sad inside, [Jehovah] goin stay real nea you. Da peopo dat feel all bus up inside, [He] get um outa all dat.” (Songs 34:18) Wen you sad or feel bus up, easy fo feel dat nobody undastan. But Jehovah promise dat at dose times, he goin be by you an help you cuz he kno you need him moa den eva. Anodda time David wen write, “Put my tears inside yoa watta bag fo you no foget how plenny I wen cry.” (Songs 56:8) Jehovah see wen you stay soa inside. He feel yoa pain inside his heart an he kea about you plenny. Jalike ery drop of watta mean plenny to somebody on one hot day, yoa tears mean plenny to Jehovah an he rememba erytime you feel soa an cry. An den at Songs Fo God 139:3 David wen say about Jehovah, “You know awready how I do stuff.” So Jehovah see eryting you do, but he pay attention to da good tings dat you do. (Heb 6:10) How come? Cuz he love eryting you do fo try make him happy.a
8 Jehovah use scripchas inside da Bible fo tell you how much he love you an kea about you. But like how we wen talk about earlia, Satan like you fo tink dat Jehovah no love you. So if sometimes you tink Jehovah no love you, try tink about who you goin believe, Satan who bulai erytime, or Jehovah who always tell da trut?—John 8:44; Songs 31:5.
9. Wat Jehovah promise to dose who love him? (Outa Egypt 20:5, 6)
9 Tink about how Jehovah feel about da guys who love him. Go look wat Jehovah wen tell Moses an da Israel peopo. (Read um Outa Egypt 20:5, 6.) Jehovah promise fo keep loving da guys who love him. If his worshippas love him, he goin love dem back. (Neh 1:5) So if you start fo tink dat maybe Jehovah no love you, try stop an tink, “I love Jehovah?” If you do an you trying yoa bes fo make him happy, you can believe dat he love you plenny. (Dan 9:4; 1 Cor 8:3) So if you love Jehovah, you no need eva question dat he love you. You can full on trus dat he always goin love you an neva goin leave you.
10-11. How Jehovah like you look at da ransom? (Fo Da Galatia Peopo 2:20, NWT.)
10 Tink hahd about da ransom. Jehovah wen give da bes gif to all us wen he wen sen his Boy Jesus Christ fo mahke fo us. (John 3:16) But Jehovah wen sen his Boy fo die fo you? Fo shua! Try look wat wen happen to da aposal Paul. He wen do some bad stuff befoa he wuz one Christian. An even afta he wen come one Christian, he had fo fight hahd fo do wat wuz right. (Rome 7:24, 25; 1 Tim 1:12-14) But he wen kno dat da ransom wuz one gif from Jehovah to him. (Read um Fo Da Galatia Peopo 2:20, NWT.) Rememba dat eryting dat stay in da Bible iz dea fo us learn from um. (Rome 15:4) An cuz Jehovah wen have Paul write dose words inside da Bible, dat show dat Jehovah like you fo look at da ransom az one gif from him to you. Wen you tink about how awesome dis gif iz, dat goin help you be moa shua dat Jehovah love you.
11 Fo shua we so tankful dat Jehovah wen sen Jesus to da eart fo mahke fo us. But anodda reason why Jesus wen come to da eart wuz fo tell oddas da trut about his Faddah, Jehovah. (John 18:37) Paht of dat iz how much Jehovah love all us.
JESUS HELP US BELIEVE JEHOVAH LOVE US
12. Why we can believe wat Jesus wen say about Jehovah?
12 Wen Jesus wuz on top da eart, he wen love fo tell peopo about Jehovah. (Luk 10:22) We can believe wat he wen say about his Faddah cuz he wuz wit him fo supa long time in heaven. (Col 1:15) Jesus got fo see how much Jehovah love him an da guys who stay faitful to Him on eart. So how Jesus help us believe dat Jehovah love us?
13. How Jesus like us see Jehovah?
13 Jesus like us see Jehovah da same way he see Him. Jesus wen call Jehovah “Faddah” ova 160 times in da Gospels. An wen he wuz talking to his followas he wen call Jehovah, “yoa Faddah” or “yoa Faddah in da sky.” (Mat 5:16, NWT; 6:26, NWT.) Befoa Jesus wen come to da eart, Jehovah’s faitful servants wen call Jehovah da “God dat get all da powa,” “da Mos Importan,” an da “Creator.” But Jesus wen jus call Him “Faddah” fo show how close Jehovah an his peopo stay. So Jesus like us see Jehovah da way he see um, az one loving Faddah dat kea plenny about His kids. We go look two times Jesus wen call Jehovah “Faddah.”
14. How Jesus wen show dat oua Faddah, Jehovah, love ery one of us? (Matthew 10:29-31) (Go look da picha.)
14 Firs we go see wat Jesus wen say at Matthew 10:29-31. (Read um.) Sparrows no love or worship Jehovah, but still yet oua Faddah kno exackly wea ery one of um stay. If he kea so much about da sparrows, den garanz he kea way moa about all us who love him. Anodda ting Jesus wen say wuz, “Yoa Faddah, he even know how much hairs you get on top yoa head!” Cuz Jehovah kno even da smalles tings about us, we kno he kea plenny about us. Iz clear fo see dat Jesus like us believe dat oua Faddah love ery one of us.
Jehovah kno wea ery sparrow bird stay. If he kea dat much about one small bird, garanz he kea way moa about you cuz you love him! (Go look numba 14)
15. Wat Jesus words at John 6:44 tell you about yoa Faddah, Jehovah?
15 We go look anodda time Jesus wen call Jehovah “Faddah.” (Read um John 6:44.) Yoa Faddah wen help you get fo kno him an love him. How come he wen do dat? Cuz he seen dat you had one good heart. (Jesus Guys 13:48, NWT.) Wen Jesus wen say da words at John 6:44, maybe he wuz tinking about wat Jehovah wen say at Jeremiah 31:3. Ova dea Jehovah wen say to his peopo, “Cuz of my loyal love I wen bring you to me.” (Jer 31:3, NWT.) So tink about dat, oua Faddah who love us plenny keep seeing da good tings in you dat maybe you no see in yoaself.
16. (a) Wat Jesus wen teach us, an why we should believe him? (b) Wat can help you believe dat Jehovah iz da bes Faddah fo you? (Go look da box “Jehovah Iz Da Bes Faddah Fo Us.”)
16 Jesus wen teach dat Jehovah iz not ony his Faddah, but yoa Faddah too. So Jesus like you kno dat Jehovah love an kea about you. So if get times dat you donno if Jehovah love you, tink about wat Jesus wen say an trus him cuz he kno Jehovah da bes an he always tell da trut.—1 Pet 2:22.
DO ERYTING YOU CAN FO KEEP BELIEVING JEHOVAH LOVE YOU
17. Why we gotta do eryting we can fo keep believing Jehovah love us?
17 We gotta keep believing dat Jehovah love us. Like we wen talk about earlia, Satan goin do anyting he can fo make us stop serving Jehovah. One of da tings he do fo try make us weak, iz he try fo get us believe dat Jehovah no love us. But no believe Satan’s bulais!—Job 27:5.
18. Wat you can do fo be shua Jehovah love you?
18 In dis lesson you wen learn wat you can do fo be shua dat Jehovah love you. You can pray to him an ask him fo help you see yoaself da way he see you. Tink about how da Bible writas wen talk about Jehovah’s love. Rememba dat Jehovah always love da guys dat love him. Neva foget dat Jehovah wen give his Boy az one gif fo you. An jus like Jesus wen say, trus dat Jehovah iz yoa Faddah. Den if anybody ask you, “You shua Jehovah love you?” you goin say, “Yessah! An eryday I try my bes fo show him I love him too!”
SONG 154 Love No Moa End