Believe Jehovah Wen Fogive You

1-2. How we feel wen Jehovah fogive us? (Go look da cova picha.)

KING David wen mess up real plenny in his life an he wen feel guilty about um. (Songs 40:12; 51:3, words befoa da song) But cuz he wuz real sorry, Jehovah wen fogive him. (2 Sam 12:13) Cuz Jehovah wen fogive him, wuz like one huge weight off his shouldas.​—Songs 32:1.

² We can feel real good like David wen we kno Jehovah fogive us too. Even if we sin mayjah iz so good fo kno dat Jehovah goin fogive us if we sorry, pray to Him, talk to da eldas, an do eryting we can fo no do um again. (Smart Guys 28:13; Jesus Guys 26:20; 1 John 1:9) An we so happy dat wen Jehovah fogive us iz like da ting neva even happen!​—Eze 33:16.

3-4. How one sistah wen feel afta she had get baptize, an wat we goin talk about in dis lesson?

³ Sometimes we might get hahd time believe dat Jehovah wen fogive us. Dass how Jennifer wen feel. She wen grow up in da trut but wen she wuz one teenager she had do plenny bad stuff an wen hide um from her parents. But layta on she wen make changes, give her life to Jehovah, an get baptize. She wen say, “In da pas, I wen sleep aroun, get drunk, had anger problems, an making money wuz da mos importan ting to me. I knew dat da Bible wen say dat Jehovah can fogive us cuz of da ransom. But inside my heart I neva really believe dat Jehovah wen fogive me.”

⁴ You getting hahd time believe in yoa heart dat Jehovah wen let you go fo da bad tings you wen do in da pas? Rememba dat David wuz so happy fo kno dat Jehovah wen fogive him. Jehovah like us feel da same way. In dis lesson we goin talk about why we gotta believe Jehovah fogive us an wat goin help us fo do dat.

WHY WE GOTTA BELIEVE JEHOVAH WEN FOGIVE US?

5. Wat Satan like us believe? Try give one exampo.

⁵ Wen we believe Jehovah fogive us, we not goin fall fo one of Satan’s traps. Rememba dat Satan goin try do eryting he can fo stop us from serving Jehovah. One of da tings he do iz try get us fo believe dat Jehovah neva goin fogive oua sins. Try look wat wen happen to da guy in Corint who wen get hemo from da hui fo having pilau sex. (1 Cor 5:1, 5, 13) Satan wanted da braddahs an sistahs fo not fogive him an not let him back into da local hui. An Satan wanted da guy fo feel like nobody wuz goin fogive him, not da local hui or Jehovah. He would feel so sad dat he would give up serving Jehovah. Satan still yet doin da same tings fo try stop us from serving Jehovah. But we kno his tricks an dat he “one sly buggah.”​—2 Cor 2:5-11.

6. If we still feel guilty fo stuff we wen do in da pas, wat can help us?

⁶ Wen we really believe Jehovah wen fogive us, we can stop feeling guilty an be happy again. Wen we do someting bad, ony natural we feel guilty. (Songs 51:17) Dass one good ting, cuz if we wen mess up an feel bad, we goin like make changes fo do wass right. (2 Cor 7:10, 11) But no good we feel guilty fo too long, cuz dat can make us like give up serving Jehovah. If we believe Jehovah fogive us, we can let go da guilt. An we can keep serving Jehovah da way he like us serve him, happy an wit one good conscience. (Col 1:10, 11; 2 Tim 1:3) But how we can believe inside oua heart dat Jehovah really fogive us?

WAT CAN HELP US BELIEVE JEHOVAH FOGIVE US?

7-8. Wat Jehovah wen say about himself, an why we can believe dat? (Outa Egypt 34:6, 7)

⁷ Try tink about wat Jehovah wen say about himself. Like da time wen Moses wanted fo kno moa about Jehovah.a (Read um Outa Egypt 34:6, 7.) Of all da tings he coulda sed about himself, Jehovah wen say he “get pity fo peopo,” an “like do good tings” fo dem.” If dass how him, den garantee he goin fogive da guys who fo real kine sorry fo da bad stuff dey wen do. Cuz if he neva do dat, dat would make him one mean God dat no moa feelings. But no ways Jehovah can be lidat.

⁸ We can believe da tings Jehovah say about himself cuz he neva lie. (Songs 31:5) If you get hahd time fo no feel guilty about da tings you wen do befoa, try ask yoaself, “I really believe Jehovah get pity fo peopo an like do good tings fo dem an dat he fogive da guys who real sorry fo da bad tings dey wen do?” If you believe dat, den you can kno fo shua dat Jehovah wen fogive you too.

9. Wat Songs Fo God 32:5 teach us about da way Jehovah fogive?

⁹ Try tink about wat Jehovah wen have da Bible writas say about how he fogive. Try look wat David wen say. (Read um Songs Fo God 32:5.) “You wen let me go . . . fo da bad tings I wen do.” Da Hebrew word fo “let me go” can mean “lif up,” “take away,” or “carry.” So wen Jehovah had fogive David, az like he wen lif up an carry away his sins. Wuz like all dat heavy kine presha wuz gone. (Songs 32:2-4) If we fo real kine sorry fo da bad tings we wen do, we no need carry all da presha cuz Jehovah had awready lif um up an carry um away.

10-11. Wat da words “you stay ready erytime fo let me go” tell us about Jehovah? (Songs Fo God 86:5)

¹⁰ Read um Songs Fo God 86:5. Ova dea David wen say dat Jehovah “stay ready erytime fo let me go.” Dis mean Jehovah no get mad fas wen we make mistakes an he always ready fo fogive da guys dass sorry. How come he lidat? Da nex paht of da verse tell, “You stay tight wit yoa peopo all da time, wit da ones dat stay yell fo you help um.” (Isa 55:7) Like how we wen learn in da las lesson, Jehovah promise fo love an neva leave da guys who love him. So if somebody wen do someting real bad an dey sorry, Jehovah goin stick wit dem, love dem, an neva let dem go. If you get hahd time believe Jehovah wen fogive you, try ask yoaself dis, “I believe dat Jehovah wen fogive all da guys who wen pray to him an wuz sorry fo da stuff dey wen do? If I believe dat, should be da same ting fo me too den ah?”

¹¹ Make us feel good fo kno dat Jehovah undastan dat we not perfeck. (Songs 139:1, 2) We go look anodda song David wen write dat goin help us believe dat Jehovah like fogive us.

REMEMBA WAT JEHOVAH NO FOGET

12-13. Wat Jehovah no foget, an how he treat us? (Songs Fo God 103:14)

¹² Read um Songs Fo God 103:14. David give one reason why Jehovah fogive da guys who sorry fo wat dey wen do. He wen say dat Jehovah “no foget dat us ony dus.” Dat mean he kno we make plenny mistakes an we not perfeck. Fo undastan dis betta, we go look some moa at dese words.

¹³ David wen say Jehovah “know how he wen make us guys.” Jehovah wen make Adam outa dus, so he kno how humans stay made an wat dey need. Even tho dey wuz perfeck, dey still had fo eat, sleep, an breathe. (Start 2:7) But wen Adam an Eve had sin, bein made of dus wen mean someting moa. We dus cuz we not perfeck an we gotta fight agains doin wass bad. Jehovah kno dis, but David wen say dat Jehovah “no foget” dis. Dat mean dat cuz Jehovah kno dat we make mistakes an we not perfeck, he always goin treat us wit pity an let us go if we sorry fo da bad tings we wen do.​—Songs 78:38, 39.

14. (a) Wat else David tell about da way Jehovah fogive us? (Songs Fo God 103:12) (b) Wat we can learn from da way Jehovah wen fogive David? (Go look da box “How Jehovah Fogive An Foget.”)

¹⁴ Wat else we can learn from Songs Fo God 103 about da way Jehovah fogive us? (Read um Songs Fo God 103:12.) Wen David had talk about how far away Jehovah take oua sins, he wen say dat He put um az far az da sunrise stay from da sunset. No moa notting moa far away den dose two tings. Dey neva goin be nex to each odda. Wat dis teach us about da way Jehovah fogive da sins we do? Dat mean wen Jehovah hemo oua sins, he take um so far away from us dat notting goin eva make him tink about um again.​—Eze 18:21, 22; Jesus Guys 3:19.

15. Wat we can do if we feel like Jehovah still neva fogive us?

¹⁵ How David’s words in Songs Fo God 103 can help us if we get hahd time believe dat Jehovah would fogive us? Tink about how Jehovah feel. Rememba you not perfeck an he fogive all da guys who feel sorry about da bad tings dey wen do. Dass wat you wen do, you wen come sorry an make changes. An rememba Jehovah no tink about da sins he wen awready fogive you fo. He not goin hold um agains you eva again. If Jehovah no tink about da sins you wen do befoa, den you shouldn’t eidda. (Songs 130:3) Wen we believe Jehovah wen let us go fo da bad tings we wen do, we can stop feeling guilty an be happy serving Jehovah.

16. Try tell one exampo why iz dangerous fo keep tinking about da tings Jehovah wen fogive us fo. (Go look da picha.)

¹⁶ Try picha dis. Wen somebody stay driving one car, dey sometimes look at da rearview mirror fo see da dangers dat stay behind dem. But if somebody looking at da rearview mirror da whole time, dass no good. Iz da same wen come to oua pas mistakes. If we tink about oua pas mistakes sometimes, dass good, cuz dat goin help us no make da same mistakes again. But if we keep looking back an keep focusing ony on da pas, dat can hold us back from serving Jehovah. Instead, focus on serving Jehovah an keep tinking about da future he wen promise wea “nobody goin rememba da stuff dat wen happen befo time.”​—Isa 65:17; Smart Guys 4:25.

KEEP BELIEVING IN YOA HEART

17. Why we gotta keep believing in oua heart dat Jehovah love us an fogive us?

¹⁷ We gotta keep believing in oua heart dat Jehovah love us an iz ready fo fogive us. (1 John 3:19) How come? Cuz Satan goin keep trying fo make us believe dat we so bad dat Jehovah no can love us an dat he neva goin fogive us. Eidda way, he trying fo make us stop serving Jehovah. An we kno he goin try make um even moa hahd cuz he kno he ony get litto bit time lef. (Jesus Show 12:12) No let Satan win!

18. Wat you can do fo believe from yoa heart dat Jehovah love an fogive you?

¹⁸ In da las lesson you had learn wat you gotta do fo believe dat Jehovah love you. In dis lesson you wen learn how you can full on believe dat Jehovah wen fogive you. Fo help you do dat try tink about wat Jehovah wen say about himself. Tink hahd about wat da Bible say about how Jehovah fogive. No foget dat he kno you not perfeck an he goin show you pity. An rememba wen he fogive, he do um all da way. If you do all dese tings, you goin feel like David an you goin be able fo say, “Tank you Jehovah cuz you wen let me go fo da bad tings I wen do!”​—Songs 32:5.