Da Big Towa Of Babylon

Afta da Flood, Noah’s boys an dea wifes had choke kids. Dea ohana got bigga, an dey wen start fo move to diffren pahts of da eart, jalike Jehovah wen tell dem fo do.

But some in da ohana neva lissen to Jehovah. Dey wen tell: ‘We go build one big town an stay hea. An we go make one big towa dat go into da sky. If we do dat, erybody goin know who us.’

Jehovah no wuz happy wit da guys dat wuz doing dat so he wen choose fo stop um. You know how he wen do um? All of a sudden he wen jam up dea language so dey no could undastan each odda. Cuz of da dat, dey had fo stop building. Dey wen call da city dey wuz building Babylon, dat mean “All mix up.” Peopo wen start fo move away from dea an live all ova da eart. But dey wen keep on doing bad tings in da new place dey wen move to. Had any guys dat still love Jehovah o wat? We go find out in da nex lesson.