Joseph wuz one of Jacob’s younga boys. His olda braddahs could tell dat Joseph wuz dea faddah’s favorite. How you tink dat wen make dem feel? Dey wen come jealous an wen hate Joseph. Joseph had some weird dreams an he wen tell his braddahs about dem. Dey had tink da dreams wen mean dat one day dey wuz goin bow down to him. Now moa dey wen hate him!

One day Joseph’s braddahs wuz taking kea dea sheep by Shechem side. Jacob wen sen Joseph fo check on dem. From far away dey wen spock him an tell each odda: ‘Eh, da big dreama guy stay coming. We go kill um!’ Dey wen grab him an put him in one big puka. But his braddah Judah wen tell: ‘No kill him! We go sell him fo be one slave.’ Dey wen sell Joseph fo 20 piece silva to da Ishmael guys who wuz goin Egypt.

Den dey wen kill one goat, put da blood on top Joseph’s robe an sen um to dea faddah. Dey wen tell: ‘Dis yoa boy’s robe, ahh?’ So Jacob wen tink one wild animal wen kill Joseph. His heart wuz so soa. Nobody could make him feel betta.

In Egypt, dey wen sell Joseph az one slave to Potifar, one importan guy who work fo Pharoah. But Jehovah wuz wit Joseph. Potifar wen see dat Joseph wuz one good worka an dat he could trus him. Neva take long fo Potifar put Joseph in charge of all his stuff.

Potifar’s wife wen see dat Joseph wuz good looking an strong. Eryday she would ask Joseph fo sleep wit her. Wat Joseph goin do? He neva like an wen tell: ‘No way! Dis wrong. Cuz my boss trus me wit eryting, an you his wife. If I sleep wit you, I goin go agains God!’

Had one time Potifar’s wife wen grab Joseph’s shirt an tell him we go lay down togedda now. But he wen run away. Wen Potifar wen come home, she tell dat Joseph wen attack her. She wuz lying. Potifar wuz supa mad, an he wen sen Joseph to jail. But Jehovah neva foget about Joseph.

Wen Joseph wuz in jail, Pharaoh da Egypt King had coupo dreams dat nobody could undastan. One of his worka guys wen tell him dat Joseph can explain da dreams to him. Right away Pharaoh wen tell fo bring Joseph to him.

Pharaoh wen ask um: ‘Eh, wat my dream mean?’ Joseph wen tell Pharaoh: ‘Fo seven years Egypt goin get plenny food, an da nex seven years no goin have notting. Pick somebody dat get da smarts fo save up food so da peopo no starve.’ Pharoah wen tell um: ‘You da one in charge now! In Egypt, I da ony one get moa powa den you!’ How Joseph could undastan Pharaoh’s dreams? Jehovah had help Joseph.

Fo da next seven years, Joseph wen save up food. Den jalike Joseph wen tell, all ova da eart neva have food. Peopo wen come from all ova fo buy food from Joseph. His faddah, Jacob, wen find out dat Egypt had food, so he wen sen 10 of his boys fo buy some.

Jacob’s boys wen go see Joseph, an right away Joseph wen kno who dey wuz. But his braddahs no could tell dat wuz him. Dey wen bow down to him jalike da dream he had wen he wuz young. Joseph wanted fo figga out if his braddahs still wen hate him. So he wen tell um: ‘You guys ony spies! You come hea fo find out wat paht of oua land we no can guard!’ Dey sed: ‘No! Us 12 braddahs dat come from Canaan side. Oua younga braddah stay wit oua faddah an da odda braddah, he mahke awready.’ Den Joseph tell: ‘Bring yoa younga braddah ova hea, den I goin believe you.’ So dey wen go back home to dea faddah.

Wen dey wen run out of food again, Jacob wen tell his boys go back Egypt. Dis time dey wen take dea younga braddah, Benjamin, wit dem. Fo tes his braddahs, Joseph wen hide his silva cup in Benjamin’s food bag an blame dem fo stealing um. Wen Joseph’s worka guys wen find da cup in Benjamin’s bag, his braddahs no could believe dat wen happen. Dey wen beg Joseph fo punish dem, not Benjamin.

Now Joseph wen kno his braddahs wen change. Joseph no could hold back how he wuz feeling anymoa. He cry plenny an tell: ‘Dis me, Joseph! Iz my faddah still alive?’ His braddahs neva kno wat fo say. He wen tell dem: ‘No feel bad cuz of wat you wen do to me befoa. God da one wen sen me ova hea so you guys no mahke. So hurry up bring my faddah ova hea.’

Dey wen go home fo tell dea faddah da good news an bring him Egypt side. Afta all dose years, Joseph an his faddah wuz back togedda again.