Talk To Yoa Kids About Alcohol

“Da firs time we wen talk about alcohol wit oua girl, she wuz six years ol. We wuz suprise dat she knew moa den we had tink.”​—Alexander.

• Wat you gotta kno

• Wat you can do

• Wat da Bible tell about alcohol

Wat you gotta kno

Iz supa importan fo talk to yoa kids about alcohol. No wait fo yoa kid be one teen. Khamit, from Russia tell, “I wish we wen talk to oua boy wen he wuz younga about how fo use alcohol. I wen learn how importan wuz da hard way, cuz I found out my boy started fo drink plenny wen he wuz 13.”

How come you gotta talk to dem about alcohol?

• Classmates, ads, an TV can effeck how yoa kid tink about alcohol.

• Da U.S. Centers fo Disease Control an Prevention tell dat 11 percent of all alcohol dat peopo drink in da United States iz from unda age drinking.

Cuz a dat, healt officials tell az importan fo parents teach dea kids from wen dey young how alcohol can be dangerous. How you can do dat?

Wat you can do

Be ready fo yoa kid ask about um. Litto kids are niele an like kno, an olda kids are even moa niele. So you gotta make ready fo how you goin ansa dem.

• If yoa kid like kno how alcohol taste, you can tell um dat wine iz kinda like sour fruit juice an beer can taste strong.

• If yoa kid like taste alcohol, you can tell um dat dea body not ready fo hando alcohol. Tell um how alcohol effeck peopo. It can make somebody feel relax, but if dey drink too much dey come all dizzy, ack stupid, an say stuff dat dey no can take back.​—Smart Guys 23:29-35.

Learn moa about alcohol. Da Bible tell, “Da akamai peopo do stuff cuz dey know wat dey stay do.” (Smart Guys 13:16) Make shua you kno da diffren ways alcohol effeck peopo, an find out da laws an legal limits fo wea you live. Den you goin be ready fo help yoa keiki.

Talk about alcohol wit yoa kids. Mark, one faddah in Britain tell, “Kids can have hard time undastan alcohol. I wen ask my 8 year ol boy if he wen tink drinking alcohol wuz right or wrong. I wen keep um relax an neva presha him, an dis wen help him open up an tell me wat he tink.”

Goin be good fo yoa kids if you talk about alcohol moa den jus one time. Depen on how ol yoa kid stay, you can bring up alcohol wen you talk to dem about odda tings in life, like wen you teach dem about sex an how fo drive safe.

Be one exampo. Kids are like sponges cuz dey soak up da tings aroun dem, an studies wen show dat how parents ack effeck dea kids da mos. Cuz a dat, if da firs ting you do wen you stress out iz drink alcohol fo calm down, yoa kid goin tink dat alcohol iz da ansa fo hando stress. So be one good exampo fo dem, an make shua you use alcohol in one good kine way.