Layta on, da Israel peopo had worship fake kine gods an dey wen bag from Jehovah again. Fo seven years, da Midian peopo had rip off da Israel guys’ animals an buss up dea crops. To get away from dem, da Israel peopo had fo hide in caves an go up mauka. Dey had cry to Jehovah fo save dem. So Jehovah wen send one angel fo tell one young guy named Gideon: ‘Jehovah wen pick you fo be one strong fighta.’ Den Gideon tell: ‘But mista, how can? I one nobody. How I goin save Israel?’

How Gideon kno dat Jehovah had pick him? He put one piece sheep wool on top da groun an tell Jehovah: ‘I goin come back in da morning, an if get dew ony on top da wool an all da groun stay dry, den I goin kno dat you had pick me fo save da Israel peopo.’ He wen come back da nex morning an find da wool all soaking wet an da groun dry! But den Gideon change um up. He had ask dat da nex morning, da wool be dry an da groun wet. An you know wat, da buggah had happen jalike Gideon wen ask! Cuz of dat, he wen kno fo shua Jehovah had pick him. So he hui up his army guys fo fight da Midian peopo.

Jehovah tell Gideon: ‘I goin make da Israel guys win. But cuz you get plenny army guys, you guys might tink you had win da fight all by yoaself. Go tell anyone who stay sked fo go home.’ So 22,000 army guys wen go home, an 10,000 guys wen stay. Den Jehovah tell: ‘You still yet get too much army guys. Take dem to da watta, an tell dem fo drink. Ony keep da guys dat stay watching out fo da enemy wen dey drinking.’ Ony 300 of da guys wen do dat. Jehovah wen promise dem dat dese few wuz goin win ova da 135,000 Midian army guys.

Nite time come, Jehovah tell Gideon: ‘Now da time fo attack da Midian peopo!’ Gideon wen give his guys horns fo blow an big clay jars wit torches inside. He tell dem: ‘Watch me, an copy wat I do.’ Gideon blow his horn, smash his jar, wave his torch, an yell: ‘Dis Jehovah an Gideon’s fight!’ All his 300 guys had make jus lidat. Da Midian peopo wuz so sked dey wuz running all ova da place. Dey neva kno wat wuz goin on, so dey started fo go afta dea own guys. Jehovah had help da Israel guys come out da winna again.

Elkanah, one Israel guy, had two wifes, Hannah an Peninnah. But he wen love Hannah moa. Peninnah wen make fun of Hannah all da time cuz Hannah neva have kids, an Peninnah had choke. Ery year, Elkanah wen take his whole ohana to Shiloh town fo worship Jehovah. One time wen dey wuz dea, he had see his sweetheart Hannah crying. He tell her: ‘Please no cry, Hannah. You get me! I love you plenny you kno.’

Layta on, Hannah wen go pray by herself. Wen she wuz asking Jehovah fo help she no could stop bawling her eyes out. She promise: ‘Jehovah, if you give me one boy, I go hanai him, an give him back to you fo him work fo you da res of his life.’

Eli, da Main Pries Guy, see Hannah crying real hahd, so he wen tink she wuz all wasted. Hannah tell: ‘Oh mista, I no stay all buss! I stay all hammajang inside an stay talking to Jehovah about um.’ Eli feel bad about wat he wen say cuz he had get um wrong about her. So he tell: ‘I hope God give you wat you wen ask.’ Afta dat, Hannah wen feel betta. Befoa you kno it, not even one year had go by an she had give birt to one bebe boy. She had name him Samuel. Ho, try tink how happy she wuz wen dat had happen!

Hannah neva foget wat she had promise Jehovah. Wen she no need breas feed Samuel no moa, she wen bring him to Shiloh town fo work fo Jehovah. She tell Eli: ‘Dis da boy I wen pray fo. I give him back, fo be Jehovah’s boy fo da res of his life.’ From dat time on, Elkanah an Hannah go visit Samuel ery year an give him one new robe she make fo him. Bumbye, Jehovah wen give Hannah three moa boys an two girls.