Jehovah Proteck Jesus

In one place far away from Israel, had some peopo dat wen believe da stars could guide dem. One night, some guys from da East wen spock out someting dat look like one bright star moving in da sky. So dey wen follow um. Da “star” wen bring dem to Jerusalem. Dey wen kno dat get one boy ova hea who goin be king of da Jews. So dey start fo ask peopo: ‘Wea da boy stay? We like bow down to him.’

Wen Herod, da Jerusalem king, hea about dis new king, he come all stressed out. He ask da main pries guys: ‘Wea da boy stay, dat suppose to come king?’ Dey tell: ‘Da prophets say dat he goin be born in Betlehem.’ So Herod call da guys from da East an tell dem: ‘Go Betlehem an look fo da boy. Den come back an tell me wea he stay, cuz I like go bow down to him too.’ But dat wuz one bulai.

Da “star” wen move again, so da guys follow um to Betlehem. Da “star” stop right above one house, so da guys go inside fo check um out. Dey find Jesus wit his maddah Mary. Dey bow down to da boy an give him all kine gifs like gold, incense, an myrrh perfume. Did Jehovah sen dese guys fo find Jesus? Nope.

Jehovah talk to Joseph in one dream dat night. He tell: ‘Herod like kill Jesus. So take yoa wife an boy, an dig out to Egypt side. Stay ova dea until I tell you iz safe fo come back.’ Right away, Joseph an his ohana go Egypt.

Den Jehovah tell da guys from da East dey betta not go back to Herod. Wen Herod figga out dat dey not coming back, he get all wild. Cuz he no could find Jesus, he wen tell fo kill all da boys in Betlehem dat stay aroun da same age az Jesus. But Jesus wuz safe cuz he wuz far away in Egypt.

Bumbye, Herod mahke. Jehovah tell Joseph: ‘Now stay safe fo you go back.’ So Joseph, Mary, an Jesus go back Israel an dey settle down in Nazaret.